وتاندىق وقۋشىلار اقش-تىڭ حيۋستون قالاسىندا وتكەن دۇنيەجۇزىلىك «FIRST World Championship» چەمپيوناتىندا ءۇش اتالىمدا ۇزدىك اتاندى.
6 جاستان 10 جاسقا دەيىنگى ەڭ جاس ساناتتاعى الماتىلىق «Adeptus Mechanicus» كومانداسى جوعارى ىنتا-جىگەرى, ىنتىماقتاستىق رۋحى جانە ءوزارا سىيلاستىعى ءۇشىن «Core Values Award» ماراپاتىن يەلەندى. باستاۋىش سىنىپ وقۋشىلارىنىڭ يننوۆاتسيالىق جوباسى مەن تەحنيكالىق ازىرلەمەلەرى ۇزدىكتەردىڭ قاتارىنان تابىلدى.
«Play 4 Energy» كومانداسىنىڭ ساپىندا ونەر كورسەتكەن «LEAS» مەكتەبىنىڭ وقۋشىلارى 10-16 جاس ارالىعىنداعى ورتا ساناتتاعى «Robot Design Award» جوعارى تەحنيكالىق سىيلىعىن جەڭىپ الدى. ولار كۇردەلى تاپسىرمالاردى ورىنداي الاتىن بەرىك ءارى ءتيىمدى روبوت جاساۋ ارقىلى تاماشا باعدارلامالاۋ جانە ينجەنەرلىك داعدىلارىن پاش ەتتى.
12 جاستان 18 جاسقا دەيىنگى جوعارى ساناتتاعى «Motivate Award Finalist» تورەشىلەردىڭ ەرەكشە ماراپاتىنا الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ «AENTA» كومانداسى يە بولدى. روبوتتاردىڭ كەرەمەت ويىنىن جاساۋمەن قاتار, بالالار «STEM» مادەنيەتىن بەلسەندى تۇردە ناسيحاتتاپ ءجۇر جانە ءوز مەكتەپتەرىندە «FIRST» نەگىزدەرىن ەنگىزگەن. حالىقارالىق قازىلار القاسىنىڭ مۇشەلەرى اتاپ وتكەندەي, بۇل كوماندا الەمدىك ارەنادا جوعارى كاسىبيلىك كورسەتتى. ايتا كەتەيىك, بۇعان دەيىن وقۋشىلار تەگىن فەستيۆالدار مەن ترەنينگتەر وتكىزىپ, ءوز قۇرداستارىنا روبوتتەحنيكا مەن باعدارلامالاۋ نەگىزدەرىن ۇيرەتكەن بولاتىن.
– وقۋشىلار تاماشا ناتيجەلەر كورسەتىپ, ەلىمىزدىڭ ابىرويىن اسىردى. شاكىرتتەرىمىزدىڭ جەڭىسىنە ىقپال ەتكەن جاندارعا العىسىمىز شەكسىز. بۇل قازاقستانداعى «STEM» دامۋىنداعى ۇلكەن ءارى جەمىستى جولدىڭ باسى عانا, – دەيدى «USTEM Robotics» قوعامدىق قورىنىڭ نەگىزىن قالاۋشى نۇرداۋلەت دوسماعامبەت.
ەسكە سالا كەتەيىك, ءبىزدىڭ قۇراما وسى جىلدىڭ اقپان ايىندا وقۋ-اعارتۋ مينيسترلىگىنىڭ قولداۋىمەن وتكەن «FIRST Central Asia» ورتالىق ازيا ويىندارىندا جاساقتالعان بولاتىن.
– جارىستا 110 ەلدىڭ وكىلدەرى باق سىنادى. بالالارىمىزدىڭ جوعارى كاسىبيلىك كورسەتىپ, لايىقتى ماراپاتتارعا يە بولعانىنا قۋانىشتىمىز. ولاردىڭ جارقىن جەڭىستەرى وزگە وقۋشىلار ءۇشىن موتيۆاتسيا بولارى داۋسىز, – دەيدى «دارىن» رەسپۋبليكالىق عىلىمي-پراكتيكالىق ورتالىعى پەداگوگيكالىق شەبەرلىك زەرتحاناسىنىڭ جەتەكشىسى ايگۇل قاراقۇلوۆا.
روبوتتەحنيكا بويىنشا الەمدىك چەمپيوناتقا بارلىعى 36 مىڭ بالا قاتىسقان. ەل نامىسىن 50-گە جۋىق وقۋشى قورعادى.