وبلىستىق تاريحي-ولكەتانۋ مۇراجايىنداعى كونە جادىگەرلەردىڭ قاتارىندا اتاقتى اقىن, ءانشى-سازگەر باسىقارا بالاسى قاناپيانىڭ شاپانى دا تۇر. تۇركىستانعا ءتاۋ ەتۋگە كيىپ بارعان شاپانى ەكەن.
بەرتىنگە دەيىن سەرىنىڭ اتالاس ۇرپاعى سماعۇل مولدانىڭ ۇيىندە ساقتالىپ كەلگەن. ول كىسى دۇنيەدەن وتەرىندە كەلىنى ساقىپقا تاپسىرىپ كەتىپتى. كونەتوز كوك شاپاندى بيىل رۋدنىي قالاسىندا تۇراتىن سماعۇل مولدانىڭ جيەنى كۇلاش كودەباەۆا مۋزەيگە اكەلىپ تاپسىرعان.
ءسىبىر مەن ورىنبورعا اتى شىققان قاناپيا باسىعارا ۇلى 1840 جىلى اۋليەكول وڭىرىندەگى بەساعاش اۋىلىندا تۋعان. اسا اۋقاتتى ورتادان شىقسا كەرەك.
– باسىقارا بالاسى قاناپيا دەگەندە كوز الدىمىزعا كوزى كومىر شوعىنداي, ءسوزى ءمىردىڭ وعىنداي, سەگىز قىرلى, ءبىر سىرلى, ەكى يىعىنا ەكى كىسى مىنگەندەي باتىر تۇلعالى, كەسەك مىنەزدى جىگىت ەلەستەيدى. وتكەن كۇننەن ساقتالعان سۋرەتى جوق. بىراق ەل اۋزىندا ساقتالعان دەرەك كوپ. كوزى اشىق, كوكىرەگى سەرگەك قاناپيا ءبىرجان سالعا ولەڭمەن حات جازعان. بۇل حاتتان ەكەۋىنىڭ دوس بولعانى بايقالادى, – دەيدى بەلگىلى اقىن اقىلبەك شاياحمەت.
قالامگەر اعامىزدىڭ ايتۋىنشا, قاناپيا 1917 جىلدىڭ ناۋرىز ايىندا سۇزەكتەن قايتىس بولعان.
قوستاناي وبلىسى