وڭتۇستىكقازاقستاندىقتاردىڭ اتىنا ومىردەگى بارلىق قارا كۇيەنى باتتاستىرىپ جاعا سالعىسى كەلىپ تۇراتىن كەيبىر زامانداستارىما ابدەن زىعىردانىم قايناعاننان تۋعان جەردىڭ تۇيمەدەي تۇيتكىلىنە ىشەگى ءتۇيىلىپ قالا جازدايتىن جازعانقۇلدانبىز. «شىمكەنتتىكتەر ديپلومدى ساتىپ الادى», «ولاردىڭ مەكتەپتى 5-كە وقىدىم دەگەندەرىنىڭ ءبىلىمى «ءۇش» دەگەن باعادان ءارى اسپايدى» دەپ جازى ۇزاق جاقتىڭ جاستارىن ءبىر سىپىرعىمەن جاپىرا سالۋعا بەيىم تۇراتىنداردىڭ ءبارىنىڭ اۋزىنا تۇگەل قۇم قۇيا الماسپىز. تۋعان جەرىمە, مەكتەبىمە ءتىل تيگىزۋدى اناما, ەڭ ىزگى ارمانىما, بالا قيالىما, ءمولدىر تۇنىعىما, باستاۋىما ءتيىسۋ دەپ تۇسىنەتىن بىزدەر مۇنداي جاڭساق ويلاردىڭ اۋا جايىلىپ كەتۋىنە قانشا جەردەن قارسى بولعانىمىزبەن ابدەن ميعا ءسىڭىپ كەتكەن الگىندەي قاۋەسەتتەر, اسىرەسە, باستى ءبىلىم سىناعى – ۇبت-نىڭ تۇسىندا وتقا ماي قۇيعانداي ءورشي تۇسەتىنى تاعى اقيقات.
كوكىرەگىمىزگە ءبىلىمنىڭ كاۋسار ءدانىن سەپكەن, «التىن ۇيانى» ايالاي بىلۋگە ۇيرەتكەن مەكتەبىمىز الدىنداعى قارىز بەن پارىزدى نەمەن وتەرىن بىلمەي جۇرگەن سانداعان تۇلەكتىڭ ءبىرى رەتىندە وقىعان ورتامدى, وتىرعان پارتامدى اق ءسۇت بەرگەن انامداي ابزال تۇتامىن. ەرىنبەي الىپپەنى جاتتاتقىزىپ, ەڭ العاش قولعا قالام ۇستاتقىزعان قارشىعا اپايدىڭ جىلى شىرايلى ءجۇزىن, ك ۇلىمدەگەن كەلبەتىن جاسىمىز جەر ورتاسىنان اۋعانمەن, ءالى سول جاس قالپىندا ساعىنامىز. قازاق ءتىلى مەن ادەبيەتتەن ساباق بەرگەن اعايلار مەن اپايلاردىڭ سىڭعىرلاعان اسەم داۋىستارى قۇلاعىمىزدىڭ تۇبىندە جاڭعىرادى. ەسەپتەن ساباق بەرگەن نيات اعايدىڭ مىنەزىنىڭ قاتالدىعى مەن سىرتقى تۇرىنە دەيىن ۋنيۆەرسيتەتتەگى ۇستازىمىز مارقۇم تەمىربەك قوجەكەەۆتەن اۋماي قالعان ەدى. قۇداي-اۋ, ودان بەرى ءومىر اتتى كىتاپتىڭ قانشاما بەتىن وقىپ تاۋىستىق دەسەڭشى. كوبىن قازىر ىزدەپ تابا المايسىڭ. و, دۇنيەلىك. ۇستاز, مۇعالىم ۇعىمىنىڭ ۇساقتالىپ كەتۋىنە ءبىزدىڭ ۇرپاق كىنالى ەمەس. ونىڭ قادىر-قاسيەتى قاي كەزدەن باستاپ وزگەرگەنىن ءوزىمىز بايقاماي قالعان سياقتىمىز. قۇرعىر, جىل سايىن وسى ۇبت باستالعاندا ەسىڭە قۇلدىراڭداعان ق ۇلىن كەزىڭ, دۇنيەدە ودان ەڭسەلى, ودان بيىك ەشتەڭە جوقتاي كورىنگەن ءزاۋلىم مەكتەبىڭ, ايداي اسەم اپايلارىڭ مەن سىيلى, زيالى اعايلارىڭ ورالىپ, كوگەرشىن كوڭىل تىم الىستاعى بۋالدىر ساعىمدارعا ءسىڭىپ, ساعىنىش مۇڭىنا ورانادى. قايران, كەزدەر-اي! بالداۋرەن شاقتىڭ اعاش پارتاسى سىنبايتىن تەمىر ءۇستەلدەرگە اينالىپ كەتكەنى قاشان.
العاشقى مەكتەبىن ىزدەمەيتىن ادام بولا ما؟ ءبىزدىڭ مەكتەپتىڭ اتى وزگەرگەن جوق. «قىزىل تاڭ» دەپ اتالادى. كەڭەستىك داۋىردەگى قىزىلداردىڭ جۇرناعى ەمەس. ول تۇرعان توبەدەن تومەن سىرعىپ, قىزىل-تاباق كۇننىڭ باتىپ بارا جاتقان ءساتىن قىزىقتاپ, ۇزاق ويعا شوماتىنبىز. ءبىزدى قيالشىل, ارمانشىل ەتكەن بالكىم وسى ءبىر كەرەمەت سۋرەت شىعار. تاڭ اتىپ كەلە جاتقانداعى كۇننىڭ شۇعىلاسى ودان بەتەر تاماشا ەدى. ادەتتە ارايلاپ اتقان اق تاڭ دەمەيتىن بە ەدى؟ ال ءبىزدىڭ تاڭ – قىزىل. ەشبىر جەرگە ۇقسامايدى. حالقى قۇمىرسقا سياقتى, قىسى-جازى قىبىر-قىبىر. بارلىق ءونىم قىپ-قىزىل بەينەتپەن وسەدى. تىرلىكسىز تاڭ بولا ما ەكەن؟! وسىلاي بايىپتاپ, بەينەلەپ جەتكىزگەندە اتىنىڭ ار جاعىنان ەلدەگى تىرشىلىكتىڭ سونداي بەيمازا تىنىسى سەزىلىپ قالاتىن سياقتى. ءجا, اڭگىمە اتاۋ تۋرالى ەمەس. ءبىلىم نارىمەن سۋسىنداتقان سول مەكتەبىمىزدىڭ كەيىنگى تۇلەكتەرى قاي جەرلەردە ءبىلىم الىپ, قاي جەرلەردە جۇمىس ىستەپ ءجۇر ەكەن دەگەن سۇراق. مارحابات اعامىز ماقتاارالداعى ءبىر مەكتەپ-گيمنازيانىڭ بيىلعى ۇبت-داعى كورسەتكىشى ءجۇزدىڭ ۇستىنەن اسىپ جىعىلعانىن جازعاندا, ءىشىم بۇلك ەتە قالدى. اپىر-اي, «قىزىل تاڭنىڭ» جاعدايى قالاي ەكەن؟ مەكتەبىڭنىڭ ابىرويى ءوزىڭنىڭ ابىرويىڭا اينالىپ كەتەدى ەكەن-اۋ, ءتايىرى. نەگە سونشاما جۇرەگىم اۋزىما تىعىلا جازدادى؟ نەگە مازالاندىم؟ سويتسەم, بايگەگە بالالار ەمەس, ەڭ الدىمەن ەلدىڭ, جەردىڭ, مەكتەپتىڭ نامىسى ءتۇسىپ جاتىر ەكەن عوي... جاس تۇلەكتىڭ تۇياعى ءسۇرىنىپ كەتپەسە يگى. ونى بىتىرگەن جاستار كەلەشەكتە وكسفورد, كەمبريدج, نازارباەۆ ۋنيۆەرسيتەتتەرىندە ءبىلىم السا يگى. دەگەن تىلەكتى الىستاعى مەكتەبىمە كوڭىلىمدەگى اق, ادال سەزىم الىپ ۇشا جونەلگەندەگى ءسات ە-ەڭ كەرەمەت ءسات.