ەلىمىزدە بىرلەسكەن ءبىلىم بەرۋ جوباسى ءساتتى جۇزەگە اسىپ جاتىر. جەرگىلىكتى جوعارى وقۋ ورىندارىندا شەتەلدىك وزىق ۋنيۆەرسيتەتتەردىڭ باعدارلاماسى ەنگىزىلىپ, ستۋدەنتتەر شەكارا اسپاي-اق ءبىلىم كوكجيەگىن كەڭەيتە تۇسكەن.
ماسەلەن, ءال-فارابي اتىنداعى قازاق ۇلتتىق ۋنيۆەرسيتەتىندە بيىلعى وقۋ جىلىنان باستاپ رەسەيدىڭ «ماسكەۋ ينجەنەرلىك-فيزيكالىق ينستيتۋتى» ۇلتتىق يادرولىق زەرتتەۋ ۋنيۆەرسيتەتىنىڭ فيليالى جۇمىسىن جالعاستىرىپ جاتىر. بىرلەسكەن ءبىلىم بەرۋ جوباسى مەملەكەت باسشىسى قاسىم-جومارت توقاەۆ العا قويعان رەسەيدىڭ وزىق تەحنيكالىق جوعارى وقۋ ورىندارى فيليالدارىن قۇرۋ تۋرالى ستراتەگيالىق مىندەتىن ورىنداۋ اياسىندا جۇزەگە اسىرىلعانىن اتاپ وتكەن ءجون.
قازۇۋ-دىڭ فيزيكا-تەحنيكالىق فاكۋلتەتى بازاسىندا اشىلعان فيليالدىڭ قۇرىلۋى «يادرولىق ەنەرگەتيكا جانە تەحنولوگيالار», «ينفورماتيكا جانە ەسەپتەۋ تەحنيكاسى» ماماندىقتارى بويىنشا بىلىكتى كادرلار دايىنداپ, ەلدە يادرولىق ەنەرگەتيكانىڭ دامۋىنا جول اشتى. ستۋدەنتتەر بىلىكتى مامانداردان ءدارىس الىپ, ينجەنەرلىك بىلىمدەرىن جەتىلدىرىپ, زاماناۋي عىلىمي زەرتحانالاردا تاعىلىمدامادان ءوتىپ, عىلىممەن اينالىسۋعا مۇمكىندىك الدى.
قازۇۋ-دا ستۋدەنتتەردى ساپالى وقىتۋ ءۇشىن بارلىق جاعداي جاسالعان. ءدارىسحانالار, زەرتحانالار, كىتاپحانالار, جاتاقحانالار مەن سپورت زالدارى زاماناۋي ۇلگىدە جابدىقتالعان. ال ەلىمىزدەگى يادرولىق فيزيكا ينستيتۋتى تاجىريبەلىك ساباقتارعا ارنالعان الاڭ ۇسىناتىن بولادى. «ميفي فيليالىن قۇرۋ – جۋىردا زەرتتەۋ ۋنيۆەرسيتەتى مارتەبەسى بەرىلگەن جوعارى وقۋ ورنى ءۇشىن ۇلكەن جاۋاپكەرشىلىك. قازۇۋ ۇنەمى دامۋ ساتىسىندا, ول زەرتتەۋ ۋنيۆەرسيتەتى رەتىندە قازاقستاندىق عىلىم مەن ءبىلىمدى الەمدىك دەڭگەيگە كوتەرۋدى ماقسات ەتەدى», دەيدى ۋنيۆەرسيتەت باسشىلىعى.
ال پەتروپاۆل قالاسىندا 155 ستۋدەنت اقش جوعارى وقۋ ورىندارى باعدارلاماسى بويىنشا ءبىلىم الىپ جاتىر. قوس ديپلومدىق وقىتۋ باعدارلاماسى اريزونا ۋنيۆەرسيتەتى (الەمنىڭ ۇزدىك 100 جوعارى وقۋ ورىندارىنىڭ قاتارىنا كىرەدى) مەن قوزىباەۆ ۋنيۆەرسيتەتى اراسىنداعى بايلانىستى نىعايتا ءتۇستى. وقىتۋ ءۇش تىلدە: اعىلشىن, قازاق جانە ورىس تىلدەرىندە جۇرگىزىلەدى. ستۋدەنتتەر گرانتتىق نەگىزدە ءبىلىم الادى.
«جاڭا جوبا شەڭبەرىندە ستۋدەنتتەردىڭ العاشقى لەگى وقىپ جاتىر. بۇگىندە بىرلەسكەن باعدارلاما بويىنشا ءبىلىم الۋشىلاردىڭ 2 توبى بار. ءبىرىنشى توپتا 50-گە جۋىق ستۋدەنت قوس ديپلوم باعدارلاماسى اياسىندا وقۋىن جالعاستىرىپ جاتىر. ياعني ولار وقۋلارىن اياقتاعاننان كەيىن امەريكا ۋنيۆەرسيتەتىنىڭ ديپلومىن الادى. مۇندا وقىتۋ تەك اعىلشىن تىلىندە. ەكىنشى توپتا 100-گە جۋىق ستۋدەنت اريزونا ۋنيۆەرسيتەتىنىڭ قولداۋىمەن قۇرىلعان قوزىباەۆ ۋنيۆەرسيتەتىنىڭ حالىقارالىق باعدارلاماسىمەن وقيدى. مۇندا ەكى ديپلوم قاراستىرىلماعان, بىراق اكادەميالىق ساپا ستاندارتتارى بويىنشا قۇرىلعان باعدارلاما. سونىمەن قاتار اريزونا ۋنيۆەرسيتەتى پەتروپاۆل قالاسىندا ساباق بەرۋ ءۇشىن شەتەلدىك پروفەسسورلاردى شاقىرۋعا كومەكتەسەدى. وقىتۋ نەگىزىنەن مەملەكەتتىك جانە ورىس تىلدەرىندە جۇرگىزىلەدى», دەيدى قوزىباەۆ ۋنيۆەرسيتەتىنىڭ باسقارما توراعاسى – رەكتورى ەرلان شۇلانوۆ.
جالپى, بىرلەسكەن جوبا بويىنشا وڭىرگە قاجەتتى 10-عا جۋىق ءبىلىم بەرۋ باعىتى تاڭدالدى. ول: بيوتەحنولوگيا, IT, ءبىلىم, ينجەنەريا سالاسى. ەستەرىڭىزگە سالا كەتەيىك, جوبا وتكەن جىلى مەملەكەت باسشىسىنىڭ قازاقستاندا بەدەلدى شەتەلدىك جوو فيليالدارىن اشۋ جونىندەگى تاپسىرماسىن ىسكە اسىرۋ ماقساتىندا قولعا الىندى. بۇل جوبا جاستارعا ەلىمىزدەن تىس جەرلەرگە شىقپاي-اق شەتەلدىك ءبىلىم الۋعا مۇمكىندىك بەرەدى. سونداي-اق تالانتتى جاستاردىڭ قاتارىن ارتتىرىپ, ءوڭىردى بىلىكتى كادرلارمەن قامتاماسىز ەتۋگە ىقپال ەتەدى.
اتىراۋدا 73 ستۋدەنت ي.م.گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىنىڭ (ۇلتتىق زەرتتەۋ ۋنيۆەرسيتەتى) باعدارلاماسى بويىنشا ءبىلىم الىپ جاتىر. اتالعان وقۋ ورداسى كوپتەگەن ونجىلدىق بويى الەمنىڭ 100-دەن استام ەلىنە مۇناي-گاز سالاسىنىڭ ماماندارىن دايارلاپ كەلەدى. جوو تۇلەكتەرى ءوز ەلدەرىنىڭ جەتەكشى كومپانيالارىندا ەڭ جوعارى لاۋازىمدارعا يە.
قازىرگى ۋاقىتتا ۋنيۆەرسيتەت باكالاۆريات, ماگيستراتۋرا جانە اسپيرانتۋرا باعدارلامالارى بويىنشا وقىتۋدى جانە ماقساتتى باعىتتار بويىنشا قابىلداۋدى جۇزەگە اسىرادى, سونداي-اق دايىندىق كۋرستارى, دوكتورانتۋرا جانە 250-دەن استام قوسىمشا كاسىپتىك ءبىلىم بەرۋ باعدارلامالارى بار. ستۋدەنتتەردى وقىتۋ باكالاۆرلاردى دايارلاۋدىڭ 19 باعىتى, ماگيسترلەردى دايارلاۋدىڭ 11 باعىتى جانە 3 ماماندىق بويىنشا جۇرگىزىلەدى. اسپيرانتۋرادا عىلىمي-پەداگوگيكالىق كادرلاردى دايارلاۋدىڭ 17 باعدارلاماسى ىسكە اسىرىلىپ وتىر. شەتەلدىك ۋنيۆەرسيتەتتەرمەن بىرلەسىپ ماگيستراتۋرانىڭ 6 ءبىلىم بەرۋ باعدارلاماسى جۇزەگە اسىپ وتىرعانىن اتاپ وتكەن ءجون.