جىل سايىن قاراعاندىدا قوڭىر كۇزدە ولەڭى «وتقا تيگەن داۋىلداي» ارقالى قاسىم امانجولوۆقا ارنالعان ادەبيەت دوداسىن وتكىزۋ داستۇرگە اينالعان. بۇل بايگە جۇرەگىندە وتى بار جاستاردى ەل تۇكپىرىنەن جيناپ كەلەدى. وسىناۋ يگى ءىس بيىل دا ۇزىلگەن جوق. وسىمەن 12-ءشى رەت وتكەن «سەن نەتكەن باقىتتى ەدىڭ, كەلەر ۇرپاق...» اتتى رەسپۋبليكالىق قاسىم امانجولوۆ وقۋلارىندا 16 مەن 28 جاس ارالىعىنداعى جاستار اقىن پوەمالارىن وقۋدان باسەكەلەستى. بايقاۋ ەكى كەزەڭنەن تۇردى.
ءبىرىنشى كەزەڭدە الماتى, استانا, اقتوبە, قىزىلوردا, جامبىل, ۇلىتاۋ, قوستاناي جانە قاراعاندى وڭىرلەرىنەن 32 ۇمىتكەر «قاسىم امانجولوۆ – ەپيك اقىن» تاقىرىبىندا ەسسە جازدى. ال ونىڭ اراسىنان وق بويى وزىق شىققاندار اقىن پوەمالارىن جاتقا وقىپ جارىستى.
سونىمەن قازىلاردىڭ سىنىنان سۇرىنبەي وتكەن 10 ۇزدىكتىڭ ورتاسىنان باس جۇلدەنى جامبىل وبلىسىنىڭ ت.رىسقۇلوۆ اۋدانىنان كەلگەن تۇرار ءجاندىلدا يەلەندى. ءى ورىن قاراعاندىلىق جانسايا جاناتوۆاعا, ءىى ورىن قىزىلوردالىق ارۋجان ابدراحمانوۆاعا, ءىىى ورىن قاراعاندى وبلىسى نۇرا اۋدانى مۇزبەل اۋىلىنان قاتىسقان جانارگۇل سامەتكە بۇيىردى. سونىمەن قاتار بىرقاتار تالانتتى جاسقا ارنايى ديپلومدار دا تابىس ەتىلدى.
قاسىم وقۋلارىنا قازاقستان جازۋشىلار وداعىنىڭ مۇشەسى, «قاسىم» رەسپۋبليكالىق ادەبي-قوعامدىق جۋرنالىنىڭ باس رەداكتورى, جازۋشى سەرىك ساعىنتاي, حالىقارالىق «الاش» ادەبي سىيلىعىنىڭ لاۋرەاتى, اقىن, اۋدارماشى داۋرەن بەرىكقاجى ۇلى, ە.بوكەتوۆ اتىنداعى قاراعاندى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى جانسايا جارىلعاپوۆا قازىلىق ەتتى.
ءداستۇرلى وقۋدى دارىپتەپ, ۇيىمداستىرۋعا ۇيىتقى بولعان ن.گوگول اتىنداعى قاراعاندى وبلىستىق امبەباپ عىلىمي كىتاپحاناسى. قاراعاندى وبلىسىنىڭ مادەنيەت, ارحيۆتەر جانە قۇجاتتاما باسقارماسى قولداۋ كورسەتكەن.
– قاسىمنىڭ رۋحىن اسقاقتاتۋداعى ايماقتىڭ ەڭبەگىن ايتپاي كەتۋگە بولمايدى. ءبىر قاسىمعا ارنالعان كوپ ءىستىڭ بايانىن تابۋىنا وسىنداعى ازاماتتار ىقپال ەتتى. قاراپ وتىرساڭىز, «قاسىم» جۋرنالى, «قاسىم ءۇيى», «قاسىم» پورتالى بار. ءبارى ءبىر كۇندە پايدا بولعان جوق. بارشاسىندا ەرەن ەڭبەك جاتىر. بۇل – دۇركىن-دۇركىن جازۋدىڭ, ماسەلەنى كوتەرۋدىڭ ناتيجەسىندە قول جەتكەن دۇنيە. مۇنىڭ سىرتىندا «قاسىم» كۋبوگى بار. پاندەمياعا بايلانىستى توقتاپ قالدى سوڭعى جىلدارى. «جۋرناليستەر اراسىنداعى بەردىقۇلوۆ اتىنداعى تۋرنير سەكىلدى قاسىم ءتۋرنيرى نەگە جوق؟» دەگەن يدەيانى مەن ايتقانىممەن, ونى ىسكە اسىرعان دا وسى جاقتاعى ادەبيەت جاناشىرلارى. داستۇرگە ارنالعان قاسىم بايقاۋى ءار جىلدا ءتۇرلى جانردى قامتيدى ەكەن. ءبىر جىلى قاسىم اندەرى ناسيحاتتالسا, ەندى ءبىر جىلى قاسىمعا ارنالعان ءمۇشايرا, قايسىبىر جىلدارى قاسىم ولەڭدەرىن جاتقا وقۋدا باق سىناسىپتى جاستار. بيىل قاسىمنىڭ پوەماسىن جاتقا وقۋ ماقسات ەتىپ الىنىپتى. بۇگىندە پوەما تۇگىلى ءبىر شۋماق ولەڭ جاتتايتىن ادام كەمدە-كەم. سوعان بايلانىستى بايقاۋ قيىنداۋ ءارى قاتىسۋشىسى دا ازداۋ بولعان سەكىلدى. دەيتۇرعانمەن, ىنتا بار. رەسپۋبليكانىڭ ءار ايماعىنان كەلگەن جاستاردىڭ ىقىلاسىنا قۋاندىم, – دەدى داۋرەن بەرىكقاجى ۇلى.
قاراعاندى