«وتان وتباسىنان باستالادى» دەسەك, ۇرپاقتى بالا كەزىنەن وتانسۇيگىشتىككە, وتباسى قۇندىلىقتارىن ساقتاۋعا ۇيرەتۋدە ارداگەرلەرىمىزدىڭ ورنى ەرەكشە. ەلىمىزدىڭ ەرتەڭى, بولاشاعى – بالالارىمىز ءۇشىن اپا-اجەلەر باعا جەتپەس بايلىق, ولشەمى جوق عيبرات. جاماندىق اتاۋلىدان ساقتايتىن, بەينەبىر اقىلدىڭ كەنىشى سانالاتىن اجەلەردىڭ قاشاندا ۇرپاق تاربيەسىندە ويىپ الار ورنى بار.
قازاق قارتى جاسىنا لايىق اۋزى دۋالى, ءسوزى ءۋالى, ءىسى بەرەكەلى, اقىلى كەرەگەدەي كەڭ بولىپ كەلەدى. وسىنداي ۇلاعاتتى دا ءماندى سوزدەرىمەن قالا كۇنىنە جانە 1 قازان – حالىقارالىق قارتتار كۇنىنە وراي تاراز قالالىق اكىمدىگىنىڭ قولداۋىمەن, قالالىق ارداگەرلەر كەڭەسىنىڭ ۇيىمداستىرۋىمەن جىلداعى قالىپتاسقان ءداستۇر بويىنشا «مەن اجەمىن ۇرپاعىن الديلەگەن» اتتى اجەلەر سايىسى ۇلكەن بەلسەندىلىكپەن ءوتتى.
سايىسقا قاتىسقان بەس اجەنىڭ بارلىعى دا ۇلكەن جاۋاپكەرشىلىكپەن, دايارلىقپەن كەلگەندىكتەرىن پاش ەتىپ, كورەرمەندەردىڭ ريزاشىلىعىنا بولەندى. ياعني اپا-اجەلەرىمىزدىڭ قولىنان كەلمەيتىن ءىس جوق ەكەن. ولار ءان مەن جىردان عانا ەمەس, قول ونەرىمەن دە بىرىنەن ءبىرى اسىپ ءتۇسىپ, كوزدىڭ جاۋىن العان كەستەلى ورامالدارىن, قۇراق كورپەلەرىن, زەرمەن كومكەرىلگەن مامىق كوپشىكتەرى مەن توقىما كيىم-كەشەكتەرىن, ت.ب. بۇيىمدارىن جۇرتشىلىق نازارىنا ۇسىندى. بۇعان قوسا, قازىرگى قوعامداعى وزەكتى ماسەلەلەر جايلى وي-پىكىرلەرى دە جينالعان كوپشىلىكتىڭ كوڭىلىنەن شىقتى.
قورىتىندىسىندا ياكۋل شۋاق كورەرمەن كوزايىمىنا اينالعان «سۇيكىمدى اجە», ءنازيپا سادىقوۆا سىنى كەتپەگەن, ونەگە الاتىن «يناباتتى اجە», اينۇر نۇكىسباەۆا بەسىك جىرىن توگەتىن «ونەرلى اجە», عالىمحان قۇسايىنوۆا ۇيرەتۋدەن جالىقپاعان «پاراساتتى اجە», گۇلميرا قاراباەۆا مەيىرىمىن توككەن «مەيىرىمدى اجە» دەپ تانىلىپ, بارلىعى دا ورتاق جەڭىسكە قول جەتكىزدى.
بايقاۋدى قورىتىندىلاعان تاراز قالالىق ارداگەرلەر كەڭەسىنىڭ ءتورايىمى كۇلاش ابدىكەشوۆا سايىسقا قاتىسقان اياۋلى اجەلەرگە سىي-سياپات جاسادى.
الدابەردى ماقاشەۆ,
تاراز قالالىق ارداگەرلەر كەڭەسىنىڭ مۇشەسى
جامبىل وبلىسى