اباي وبلىسىنىڭ جاستارى عىلىم جانە جوعارى ءبىلىم مينيسترلىگىنىڭ باستاماسىمەن قولعا الىنعان EcoStudentKZ ەكولوگيالىق اكتسياسى اياسىندا سەنبىلىك ۇيىمداستىرىپ, سەمەيدىڭ كورىكتى جەرلەرىن تۇرمىستىق قالدىقتان تازارتتى.
بۇل ورايدا قازان ايىنان باستالعان اكتسيا ەلىمىزدىڭ بارلىق وڭىرىندە ىسكە اسىپ جاتقانىن ايتا كەتكەن ورىندى. سەمەيدە ونىڭ وتۋىنە Alikhan Bokeikhan University ستۋدەنتتەرى باستاماشىلدىق تانىتقان.
«عىلىم جانە جوعارى ءبىلىم مينيسترلىگى جانىنداعى كەڭەستىڭ ۇيىمداستىرۋىمەن قازاننىڭ 2-ىنەن ەلىمىزدىڭ وقۋ ورىندارى اراسىندا EcoStudentKZ ەكولوگيالىق اكتسياسى باستالعان بولاتىن.
وسى رەتتە سەمەي قالاسىنداعى Alikhan Bokeikhan University ستۋدەنتتەرىنىڭ باستاماسىمەن, سول سەكىلدى شاھارداعى جوعارى وقۋ ورىندارى ستۋدەنتتەرىنىڭ قولداۋىمەن رەسپۋبليكالىق اكتسياعا ءوز ۇلەسىن قوسۋ ءۇشىن جاستار بەيبىتشىلىك ارالىنا جينالىپ, اۋماقتى تۇرمىستىق قالدىق پەن قوقىستان تازارتۋدى ۇيعاردى.
اتالعان ءىس-شاراعا قالاداعى 5 وقۋ ورنىنىڭ ستۋدەنتتەرى قاتىستى. تۇتاستاي العاندا, 150-دەي ستۋدەنت وسى اكتسياعا قاتىسۋعا نيەت تانىتتى. ولاردىڭ قاتارىندا Alikhan Bokeikhan University-دەن 76 ستۋدەنت, سەمەي مەديتسينا ۋنيۆەرسيتەتىنەن 20 ستۋدەنت, ر.بايسەيىتوۆ اتىنداعى سەمەي قارجى-ەكونوميكالىق كوللەدجىنەن 15 ستۋدەنت, Innovative college ءبىلىم بەرۋ ۇيىمىنان 15 ستۋدەنت جانە م.تولەباەۆ اتىنداعى مۋزىكالىق كوللەدجدەن 15 ستۋدەنت بار», دەدى ۇيىمداستىرۋ كوميتەتىنىڭ وكىلى ەرسىن مۇراتحان.
سەمەيدەگى ەكولوگيالىق اكتسياعا ستۋدەنتتەردەن بولەك ساياباقتا سەرۋەندەپ جۇرگەن مەكتەپ وقۋشىلارى دا اتسالىسىپ, شاھاردى تازارتۋعا كومەكتەستى.
سەمەي حالقى جاستاردىڭ باستاماسىنا ريزاشىلىقتارىن جەتكىزىپ, الداعى ۋاقىتتا وبلىس ورتالىعىنىڭ باسقا اۋداندارىن بىرلەسىپ تازارتۋعا دايىن ەكەندەرىن ءبىلدىردى.
تۇتاستاي العاندا, سول كۇنى 80 قاپ قوقىس جينالىپ, بەيبىتشىلىك ارالىن اجارلانا ءتۇستى. تاياۋ ۋاقىتتا ۇيىمداستىرۋشىلار وسىنداي ەكولوگيالىق اكتسيالاردى قالالىق جانە وبلىستىق دەنگەيدە جالعاستىرۋدى كوزدەپ وتىر.
اباي وبلىسى