مەملەكەت باسشىسى قاسىم-جومارت توقاەۆ قاراعاندى وبلىسىنا ساپارى بارىسىندا ءوڭىردىڭ دامۋ باعىتتارىن بەلگىلەپ, بىرقاتار قوماقتى تاپسىرما جۇكتەدى. ەلىمىزدىڭ وركەندەۋىنە سۇبەلى ۇلەس قوسىپ وتىرعان ءوندىرىستى ايماقتىڭ مۇمكىندىكتەرىن كورسەتىپ, حالىقتىڭ تۇرمىسى مەن ءال-اۋقاتىن ارتتىراتىن سەرپىندى جوبالاردى اتادى.
ونىڭ ىشىندە وبلىستاعى ىرگەلى ايماقتىڭ ءبىرى قارقارالى اۋدانىنا قاتىستى سەرپىندى جوباعا جەكەلەي توقتالىپ, قارقارالى-قاراعاندى تاس جولىن جوندەۋ بويىنشا ناقتى تاپسىرما بەردى. ەل پرەزيدەنتىنىڭ بۇل تاپسىرماسى وزەكتى جوباعا تىڭ سەرپىن قوساتىنى انىق.
قارقارالى-قاراعاندى تاس جولى – رەسپۋبليكالىق ماڭىزداعى قاراعاندى-اياگوز-بۇعاز باعىتىنداعى جولدىڭ ەلەۋلى بولىگى. بۇل جول سوڭعى جىلدارى ابدەن توزىپ, ءوڭىردىڭ دامۋ قارقىنىن تەجەپ وتىرعان ەدى. بيىل وسى جولعا ورتاشا جوندەۋگە رەسپۋبليكالىق بيۋدجەتتەن 600 ميلليون تەڭگە كولەمىندە قاراجات ءبولىنىپ, جولدىڭ 197-207 شاقىرىم بولىگىنىڭ 10 شاقىرىمىنا جوندەۋ جۇرگىزىلدى. بۇل جۇمىستار ساپالى ءارى ۋاقىتىندا اياقتالىپ, قارقارالىعا كەلۋشى قوناقتار دا, جەرگىلىكتى تۇرعىندار دا يگىلىگىن كورۋدە. ەندى پرەزيدەنت تاپسىرماسىنا سايكەس وسى باستالعان جۇمىستى كەلەر جىلى جالعاستىرىپ, ساپالى ءارى ۋاقىتىلى اياقتاۋ مىندەتى تۇر. پرەزيدەنت «قارقارالىنىڭ تۋريستىك الەۋەتىن ارتتىرۋ ماقساتىندا بۇل جۇمىستى الداعى ەكى جىلدىڭ ىشىندە اياقتاۋ قاجەت» دەپ اتاپ ايتتى. ياعني الدىمىزدا ايقىن مىندەت, ناقتى مەجە تۇر, سونى لايىقتى دەڭگەيدە ورىنداۋعا كۇش سالامىز.
اۋدانداعى 23 اۋىلدىق وكرۋگ, 62 ەلدى مەكەندە تۇراتىن 34 مىڭ تۇرعىننىڭ لايىقتى ءومىر سۇرۋىنە قارىمدى قادامدار جاسالۋدا. بۇل اۋداننىڭ الەۋمەتتىك-ەكونوميكالىق دامۋىنا ۇلكەن سەرپىن بەرەتىنى ءسوزسىز. قويىلعان مىندەتتىڭ ماڭىزدىلىعى وراسان. كۇرە جول اۋدانىمىزدى وبلىس ورتالىعىمەن قوسا, جاڭادان اشىلعان اباي وبلىسىمەن, سەمەي وڭىرىمەن جالعايدى. ەكى وبلىستىڭ ارا قاتىناسىن نىعايتۋ ماقساتىندا بۇل جولدى قالىپقا كەلتىرۋدى جالعاستىرۋدىڭ ماڭىزى زور.
قارقارالىنىڭ قارا ورمانىن تاماشالاپ, اسەم تابيعات اياسىنا كەلىپ دەمالۋشى تۋريستەردىڭ سانى جىل ساناپ وسۋدە. تۋريستەرگە وڭىردە ورنالاسقان 36 نىسان قىزمەت كورسەتەدى. جىل سايىن جاڭا نىساندار اشىلۋدا. تۋريستەردى نەگىزىنەن اۋدان اۋماعىنداعى قارقارالى مەملەكەتتىك تابيعي پاركى قىزىقتىرادى. پارك اۋماعىندا الداعى ۋاقىتتا قوسىمشا 65 ۋچاسكە تۋريستىك ماقساتتا پايدالانۋ ءۇشىن جالعا بەرىلمەك. بىلتىرعى التى ايدا اۋدانىمىزعا 7 534 ادام كەلسە, وسى جىلدىڭ التى ايىندا 8 842 تۋريست دەمالۋعا كەلگەن. ارينە, بۇل تەك رەسمي دەرەكتەر. انىعىندا, بۇل ساندار بىرنەشە ەسە ارتىق. سوندىقتان قاراعاندى مەن قارقارالى ارالىعىنداعى تاس جولدىڭ جوندەلۋى وڭىرىمىزگە دەمالۋعا كەلەتىن تۋريستەر سانىن ارتتىراتىنى انىق. دەمەك وسى باعىتتاعى جۇمىستاردى شيراتۋىمىز كەرەك.
پرەزيدەنت «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىندا 2025 جىلعا دەيىن جەرگىلىكتى جولداردىڭ 95 پايىز جوندەۋدەن وتەتىنىن ايتتى. مەملەكەت باسشىسىنىڭ تاپسىرماسى جولداۋداعى وسى ماڭىزدى مىندەتتەرمەن ۇندەسىپ, ەلىمىزدىڭ دامۋ باعدارلاماسىنىڭ اجىراماس بولىگىنە اينالارى انىق. اۋدانىمىزدا وسى باعىتتا قولعا الىنىپ جاتقان جۇمىستار بار. وڭىردەگى رەسپۋبليكالىق, وبلىستىق, اۋداندىق ماڭىزى بار جولداردى قالىپقا كەلتىرۋ, جوندەۋ جۇمىستارى باستالدى. بۇعان دەيىن مۇلدە اسفالت توسەلمەگەن, جوندەۋ جۇمىستارى جۇرگىزىلمەگەن شالعايداعى ەلدى مەكەندەردىڭ توزىعى جەتكەن جولدارى قالىپقا كەلتىرىلىپ جاتىر. اقتاستى-ايرىق, بالقانتاۋ, قوياندى-مامىراەۆ اۋىلدارىنىڭ اۆتوجولدارىنا ورتاشا جوندەۋ جۇمىستارى جۇرگىزىلۋدە. وسىنداي جۇمىستار كەلەر جىلعا دا جوسپارلانعان.
جىلما-جىل وسى جۇمىستاردى اتقارا الساق, اۋدان جولدارىنىڭ جاعدايى ەداۋىر جاقساراتىنى ءسوزسىز. ياعني پرەزيدەنت اتاپ وتكەندەي, ءوڭىرىمىزدىڭ تۋريستىك الەۋەتىن ارتتىرىپ, العا باستىرۋ, اۋداننىڭ الەۋمەتتىك-ەكونوميكالىق دامۋىن تىڭ سەرپىن بەرۋ كوزدەلۋدە.
سونىمەن قاتار اۋداندا اۋىز سۋ ماسەلەسىن شەشۋدىڭ كەشەندى جوبالارى, حالىقتىڭ دەنساۋلىعىن نىعايتۋ بويىنشا ىرگەلى باستامالار قولعا الىندى. ماسەلەن, كەلەر جىلى جارلى-قارقارالى توپتىق سۋ جۇيەسى ىسكە قوسىلسا, اۋدان بويىنشا ەلدى مەكەندەردە 20 مەديتسينالىق نىسان سالىنادى. «اۋىل – ەل بەسىگى» جوباسى كەڭەيتىلىپ, اۋىلداردى جوباعا قوسۋ بويىنشا جۇمىستار جۇرگىزىلىپ جاتىر. بۇگىندە جوبا اياسىندا ءتورت اۋىلدىق وكرۋگتە اۋقىمدى جۇمىس اتقارىلىپ كەلەدى. قاراعايلى كەنتىندە اۋىز سۋ جانە كارىز جۇيەلەرى جوندەلۋدە. ەگىندىبۇلاق اۋىلىندا زاماناۋي دەنەشىنىقتىرۋ-ساۋىقتىرۋ كەشەنىنىڭ قۇرىلىسى قاراشا ايىندا اياقتالىپ, پايدالانۋعا بەرىلمەك. جوبا اياسىندا بۇركىتتى, كوكتاس اۋىلدارىندا ءتيىستى جۇمىس جاسالىپ جاتىر.
پرەزيدەنت وبلىس جۇرتشىلىعىمەن كەزدەسۋى بارىسىندا ءوڭىردىڭ وندىرىستىك الەۋەتىمەن قوسا, تاريحي, رۋحاني قۇندىلىقتارىنا دا ەرەكشە توقتالدى. شەرتپە كۇيدىڭ شەبەرى تاتتىمبەت, كۇرەسكەر اقىن ءمادي, داۋىلپاز قاسىم – ءبارى دە قارقارالىنىڭ كيەلى توپىراعىنان جارالعان ايتۋلى تۇلعالار. قارقارالى – كەزىندە الاش ارىستارىنىڭ ازات يدەيالارىنىڭ ءپىسىپ-جەتىلگەن, قاناتتانعان جەرى. سوندىقتان تاريحى تاعلىمعا تولى شەجىرەلى ولكەنىڭ ءورىسىن كەڭەيتىپ, كەشەندى تۇردە دامىتۋ جۇمىسىن جالعاستىرا بەرەمىز.
ەرلان قۇسايىن,
قارقارالى اۋدانىنىڭ اكىمى