سوڭعى جىلدارى ەلىمىزدە كوپتەگەن تىڭ باستاما, ناقتى ۇسىنىستار ورتاعا تاستالىپ جاتىر. مۇنىڭ ءبارى ادىلەتتى قازاقستان قۇرۋ باعىتىنداعى رەفورمانى ايعاقتايدى. مەملەكەت باسشىسى 1 قىركۇيەكتەگى قازاقستان حالقىنا جولداۋىندا ساياسي رەفورمالاردىڭ جالعاسى رەتىندە بيىل پرەزيدەنت سايلاۋىن, كەلەسى جىلى پارلامەنت سايلاۋىن كەزەكتەن تىس وتكىزۋ تۋرالى ۇسىنىس جاسادى.
پرەزيدەنت سايلاۋدىڭ قاتاڭ تۇردە زاڭعا سايكەس وتەتىندىگىنە كەپىلدىك بەرەتىنىن جانە سايلاۋدىڭ شەتەلدىك, وتاندىق بايقاۋشىلاردىڭ قاتىسۋىمەن ءادىل ءارى اشىق وتەتىنىن قاداپ تۇرىپ ايتتى. قازاقستان ساياسي جاڭعىرۋمەن قاتار الەۋمەتتىك-ەكونوميكالىق باعىتتا وڭ وزگەرىستەر ورىن الىپ, ونىڭ يگىلىگىن بار حالىق كورەتىنىنە سەنىمدىمىن.
اسا مانىزدى رەفورما رەتىندە پرەزيدەنتتىڭ ءبىر عانا مەرزىمگە سايلانۋى ۇسىنىلدى. جەتى جىل مەرزىم راسىندا دا بارلىق ويعا العان ماسەلەلەردى, سايلاۋالدى باعدارلامالاردى ىسكە اسىرۋعا تولىقتاي جەتەتىن ۋاقىت. بۇل – تىڭ باستاما. اشىق دەموكراتيالىق جول.
قازاقستاننىڭ وزىندىك ورنى بار, باعىتى ايقىن, ماقساتى انىق. مەملەكەتتىڭ, ۇلتتىڭ الدىندا تۇرعان ماقسات-مۇددەلەر وزگەرمەيدى. ول – اتا-بابادان قالعان جەردى ساقتاۋ, ەلدى قورعاۋ, ەلدىڭ ازاماتتارىنىڭ ءوسىپ-ونۋىنە, باسەكەگە قابىلەتتى بولۋىنا جاعداي جاساۋ, ياعني ەكونوميكالىق وركەندەۋ, الەۋمەتتىك جاڭعىرۋ, اشىق, ادىلەتتى قوعام قۇرۋ. سوندىقتان بۇل رەفورما دەموكراتيا جولىنداعى باتىل قادام. تاۋەكەلگە بەل بۋساق تا, وسىنداي شەشىم حالقىمىزدىڭ جارقىن بولاشاعى ءۇشىن كەرەك دەپ كامىل سەنەمىن. «بۇل رەفورما نە ءۇشىن جاسالماق؟», دەگەن سۇراق پايدا بولۋى مۇمكىن. ماسەلە مىنادا: پرەزيدەنتتىك لاۋازىمعا كوپ جىل بويى ءبىر عانا ادام يە بولماۋى كەرەك. الەمدە بولسىن, ءبىزدىڭ ەلىمىزدە بولسىن كوپ جىل بويى ءبىر عانا ادام ەڭ جوعارى لاۋازىمعا يە بولسا, مۇنداي جاعداي ەلگە دە, مەملەكەت باسشىسىنا دا ابىروي اكەلمەيدى. ەلىمىز بولاشاققا نىق سەنىممەن قاراپ, ادال, دارىندى ساياساتكەرلەرگە جول اشىلعانىن قالايدى. جالپى, جۇرت ءبىزدىڭ ساياسي جۇيەنى وزگەرتۋ تۋرالى باستامالاردىڭ ءمان-ماڭىزىن جاقسى ءتۇسىنىپ وتىر. وسى جۇمىستاردى ودان ءارى جالعاستىرۋ ءۇشىن جاڭا كونستيتۋتسياعا ساي پرەزيدەنت سايلاۋىن وتكىزىپ, مەملەكەت باسشىسىنا ماندات بەرۋىمىز كەرەك.
بۇل – قازاقستان جاڭارۋىنىڭ باسى, بارشامىزدىڭ قاتىسۋىمەن ورىندالاتىن ۇلكەن كۇردەلى ۇدەرىس. ول ءۇشىن ۇكىمەت حالىقتىڭ ءال-قۋاتىن ارتتىرۋعا, الەۋمەتتىك جاعدايىن كوتەرۋگە, ەرتەڭگى كۇنىنە, بالالارىنىڭ بولاشاعىنا الاڭدامايتىنداي جاعداي قالىپتاستىرۋى قاجەت. ادال ەڭبەگىمەن يگىلىككە جەتكىسى كەلەتىن ءاربىر ازاماتقا مۇمكىندىك بەرۋ ءۇشىن اتقارىلار جۇمىستار شاش-ەتەكتەن. مۇنى جۇزەگە اسىرۋ ءۇشىن ۇلكەن كۇش-جىگەر, ۇلت بىرلىگى قاجەت. ساياسي ناۋقان زاڭعا سايكەس, ءادىل جانە اشىق وتەتىنىنە سەنەمىز. قازاقستاندىقتار سايلاۋعا بەلسەندى قاتىسىپ, ءوز تاڭداۋىن جاسايدى دەگەن ۇمىتتەمىن.
سەرىكباي تۇرىموۆ,
سەنات دەپۋتاتى