ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە عىلىم جانە جوعارى ءبىلىم ءمينيسترى ساياسات نۇربەك پەن ەۇۋ باسقارما توراعاسى – رەكتورى ەرلان سىدىقوۆتىڭ قاتىسۋىمەن جاڭا فورماتتاعى قوعامدىق قابىلداۋ بولمەسى اشىلدى. جوو اقپاراتتىق اشىقتىق قاعيداتىن ۇستانادى جانە جۇرتشىلىقپەن ءتيىمدى ءوزارا ءىس-قيمىل جاساۋدا كوممۋنيكاتسيالاردىڭ جاڭا ارنالارىن قۇرادى.
قوعامدىق قابىلداۋ «حالىق ۇنىنە قۇلاق اساتىن مەملەكەت» تۇجىرىمداماسى اياسىندا ستۋدەنتتەرمەن, ۇجىممەن, قوعاممەن بايلانىس ورناتۋ ءۇشىن قۇرىلدى. زاماناۋي اقپاراتتىق تەحنولوگيالاردى قولدانۋ – قارىم-قاتىناستىڭ جاڭا فورماتى. قوعامدىق قابىلداۋ بولمەسىنىڭ ەرەكشەلىگى, ءوتىنىشتى وففلاين رەجىمدە عانا ەمەس, سونىمەن قاتار ۋنيۆەرسيتەتتىڭ بارلىق وقۋ عيماراتىندا, جاتاقحانالارىندا ورنالاسقان QR كودى ارقىلى ونلاين رەجىمىندە دە بەرۋگە بولادى. ارنايى QR كودىن سكانەرلەپ, سۇراۋلار مەن ۇسىنىستاردى جىبەرۋ جەتكىلىكتى. سۇراق اۆتوماتتى تۇردە قوعامدىق قابىلداۋ بولمەسىنە تۇسەدى, جاۋاپ ونلاين رەجىمدە كەلەدى.
QR كود ۋنيۆەرسيتەتتە ازىرلەنگەن Smart.ENU. قوسىمشاسىنا بەكىتىلگەن. وسىلايشا, ەۇۋ-دا تسيفرلىق ەكوجۇيە بەلسەندى قالىپتاسۋدا.
عىلىم جانە جوعارى ءبىلىم ءمينيسترى ساياسات نۇربەك اتاپ وتكەندەي, بۇگىندە ەلىمىزدىڭ جوعارى وقۋ ورىندارىندا قوعامدىق قابىلداۋلار قۇرىلىپ جاتىر. بۇل رەكتوراتقا وقىتۋشىلاردىڭ, ستۋدەنتتەردىڭ, سونداي-اق بەي-جاي قارامايتىن ازاماتتاردىڭ بارلىق ماسەلە, ۇسىنىس جانە يدەيالارىن باقىلاۋعا مۇمكىندىك بەرەدى.
«ۋنيۆەرسيتەت ميسسيالارىنىڭ ءبىرى – جەرگىلىكتى قوعاممەن جۇمىس ىستەۋ. ۋنيۆەرسيتەتتىڭ عىلىمي, ءبىلىم بەرۋ, تاربيەلىك مىندەتتەرىنەن باسقا, زەرتتەۋ ورتالىعى رەتىندە قىزمەت ەتۋ, ايماقتىڭ ەكونوميكالىق جانە الەۋمەتتىك دامۋىنا ۇلەس قوسۋ ءۇشىن ەرەكشە ميسسياسى بار. جوعارى وقۋ ورىندارىنىڭ اكىمشىلىگىنە ءتيىمدى كەرى بايلانىس ارنالارىن بەرۋ قاجەت. بارلىق ۇسىنىس, ماسەلە ۋاقتىلى شەشىلۋى ءۇشىن «حالىققا قىزمەت كورسەتۋ ورتالىقتارى» ءتارىزدى ورىندار قاجەت. ءبىز بۇل پروبلەمالاردىڭ قوعامدىق قابىلداۋ بولمەلەرىندە قالماي, تاپسىرماعا اينالىپ, ءتيىمدى شەشىمىن تابۋدىڭ الگوريتمدەرىن پىسىقتاپ جاتىرمىز», دەدى س.نۇربەك.
ەۇۋ باسقارما توراعاسى – رەكتورى ەرلان سىدىقوۆ ءوز كەزەگىندە قوعامدىق قابىلداۋ بولمەسىنىڭ نەگىزگى مىندەتى – وزەكتى ماسەلەلەردى شەشۋ, ۋنيۆەرسيتەت قىزمەتىن جاقسارتۋعا قاتىستى ستۋدەنتتەردەن, وقىتۋشىلاردان جانە قىزمەتكەرلەردەن كەرى بايلانىس الۋ ەكەنىن اتاپ ءوتتى.
«باستى ماقسات – ءبىلىم الۋشىلاردى, قىزمەتكەرلەردى, اتا-انالاردى الاڭداتاتىن ماسەلەلەردى جىلدام شەشۋ, ۋنيۆەرسيتەتتى دامىتۋدا ولاردىڭ پىكىرىن, يدەيالارىن جانە ۇسىنىستارىن ەسكەرۋ. مەملەكەت باسشىسى «تىڭدايتىن مەملەكەت» تۇجىرىمداماسى اياسىندا قوعاممەن «بايلانىس كوپىرىن» نىعايتۋ قاجەتتىگىنە باسا نازار اۋداردى. بۇل باعىتتا جاڭا فورماتتاعى قوعامدىق قابىلداۋدى اشۋدى ۇيعاردىق. سونىڭ ناتيجەسىندە, قوعاممەن ءوزارا بايلانىستىڭ ءتيىمدى جانە كوپشىلىككە ىڭعايلى جولدارىن دامىتۋعا تىرىسامىز», دەدى رەكتور.
قوعامدىق قابىلداۋ بولمەسىنە ستۋدەنتتەر دە, ۋنيۆەرسيتەت قىزمەتكەرلەرى دە ۋنيۆەرسيتەتتىڭ جۇمىسىن جاقسارتۋ بويىنشا ءوز ۇسىنىستارىمەن جۇگىنە الادى. بەكىتىلگەن كەستە بويىنشا وفلاين قابىلداۋدى جوو باسشىلىعى جۇرگىزەدى. ەۇۋ قوعامدىق قابىلداۋ بولمەسىنىڭ اشىلۋىندا عىلىم جانە جوعارى ءبىلىم ءمينيسترى ساياسات نۇربەك قوعامدىق قابىلداۋ بولمەلەرى اشىلعان ەلىمىزدىڭ جوعارى وقۋ ورىندارىمەن بەينەكونفەرەنتسبايلانىس وتكىزدى.