الىمجەتتىكتىڭ اۋرەسى

جاقىندا الماتى وبلىسىنىڭ قاراساي اۋدانىندا 6 بالاسى بار ايەلگە بەلگىسىز بىرەۋ الىمجەتتىك جاساپ, ءولىمشى ەتىپ ساباعانى جايىندا حابار تارادى. وكىنىشتىسى, ءتارتىپ ساقشىلارى بۇل وقيعاعا قاتىستى قاتاڭ شارا قولدانۋدى جاعداي الەۋمەتتىك جەلىدە جاريا بولعاننان كەيىن عانا قولعا العان كورىنەدى. كەيىننەن اۋداندىق پوليتسيا باس­قارماسى 6 بالانىڭ اناسىن زورلاماق بول­عان جانە ءولىمشى قىلىپ ساباعان ادامنىڭ بوس­تاندىقتا جۇرگەنى تۋرالى جازباعا بايلانىستى تۇسىنىكتەمە بەردى.

– پوليتسيا باسقارماسىنىڭ كەزەكشى بو­لىمىنە قاراساي اۋدانى, قاسكەلەڭ قالاسى اۋرۋحاناسىنىڭ جانساقتاۋ بولىمىنە 35 جاستاعى ايەلدىڭ اۋىر جاراقاتپەن تۇسكەنى تۋرالى اقپارات ءتۇستى. بۇل دەرەك قىلمىس­تىق كودەكستىڭ 106-بابىنىڭ 1-بولىمىندە كوزدەلگەن قىلمىستىق قۇقىق بۇزۋشىلىق بەلگىلەرى بويىنشا تىركەلدى. جۇرگىزىلگەن جەدەل ىزدەستىرۋ ءىس-شارالارىنىڭ ناتيجەسىن­دە 23 جاستاعى كۇدىكتى اۋداندىق پوليتسيا باسقارماسىنا جەتكىزىلدى, – دەپ حابارلادى اۋداندىق پوليتسيا باسقارماسىنىڭ وكىلى.

قازىر بۇل قىلمىستىق ءىس بويىنشا بار­لىق قاجەتتى تەرگەۋ ارەكەتتەرى جۇرگىزىلىپ جاتىر. كىنالى ءسوزسىز سازايىن تارتادى دەگەن سەنىمدەمىز.

جالپى, بيىل ايماقتا تۇرمىستىق زور­لىق-زومبىلىققا ۇشىراعان ايەلدەر مەن بالالاردىڭ سانى ازايماي وتىر. جىل باسىنان بەرى 39 ادام اكىمشىلىك كودەكستىڭ 461-بابى بويىنشا جاۋاپكەرشىلىككە تارتىلسا, زاڭنىڭ 73-بابىنا سايكەس ازامات­تار پوليتسياعا 1 311 رەت ارىز-شاعىم قالدىر­عان ەكەن. اتالعان ارىزداردى قاراستىرۋ ناتيجەسىندە 435 ازامات اكىمشىلىك قاماۋعا الىنىپ, 298 ازاماتقا ەسكەرتۋ جاسالعان. سونداي-اق ەكى تاراپتىڭ تاتۋلاسۋىنا بايلانىستى 578 ءىس توقتاتىلعان كورىنەدى.

– وتكەن 7 ايدا وڭىردە 45 قىلمىس تىر­كەلدى. بۇل قىلمىستىق ىستەردى زەرتتەۋ ناتي­جەسىندە 31 قىلمىس ادامداردىڭ ىشىمدىككە سىلقيا تويىپ الىپ, ماس كەزىندە جاسالعانى بەلگىلى بولدى, – دەيدى وبلىستىق پوليتسيا دەپارتامەنتىنىڭ وكىلى.

ايتپاقشى, وبلىس ءتارتىپ ساقشىلارى الدىدەن الىمجەتتىك كورگەن ايەلدەر مەن بالالاردى الماتى قالاسىنداعى انا مەن بالا قۇقىعىن قورعايتىن ورتالىققا جەتكىزەدى ەكەن. جىل باسىنان بەرى پوليتسيانىڭ كومە­گىنە جۇگىنگەن 30 ايەل مەن 91 بالا وسى ورتا­لىقتى پانالاعان.

الماتى وبلىسى