قاراعاندى ايماعىندا بارىمتامەن بايىماق بولعانداردىڭ «قارىمتاسى» دايىن. ۇرىلاردىڭ جولىن بلوكبەكەت كەسپەك. ارنايى توپ كۇنى-ءتۇنى كۇزەتەتىن بەكەت كۇز تۇسە كۇشەيەتىن مال ۇرلىعىنىڭ الدىن الماق.
توپتىڭ قۇرامىندا كريمينالدىق پوليتسيا, ۋچاسكەلىك پوليتسيا ينسپەكتورلارى, پاترۋلدىك پوليتسيا قىزمەتكەرلەرى بار. وسىنداي 18 بلوكبەكەت قاراعاندى وبلىسى اۋماعىنان وتەتىن رەسپۋبليكالىق ماڭىزى بار جانە وبلىستىق تاس جولداردىڭ بويىندا ورنالاسقان.
– وزدەرىڭىزگە بەلگىلى, قازىر سوعىم ۋاقىتى جاقىنداپ كەلەدى. بۇل كەزدە بارىمتاشىلاردىڭ دا حالىقتىڭ مالىنا تىنىشتىق بەرمەيتىنى انىق. سولاردىڭ كەسىرىنەن ءتورت ت ۇلىگىن بورداقىلاپ وتىرعان قاراپايىم قوجالىق يەلەرى جاپا شەگەدى. ناقتى مىسال كەلتىرە كەتەيىن, وتكەن اپتادا عانا وسى تاس جولدا پاترۋلدىك پوليتسيا باتالونىنىڭ قىزمەتكەرلەرى ەشقانداي قۇجاتسىز 6 جىلقىنى اكەتىپ بارا جاتقان اۆتوكولىكتى توقتاتتى. تەكسەرە كەلگەندە جىلقىلاردىڭ جايىلىمنان ۇرلانعانى انىقتالدى. كۇدىكتى ۇستالىپ, تەرگەۋ امالدارى جۇرگىزىلۋدە, – دەدى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
قاراعاندى وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وبلىس اۋماعىندا جىل باسىنان بەرى مال ۇرلىعىنا بايلانىستى 47 دەرەك تىركەلىپ, 22 قىلمىس اشىلعان.
«سونىمەن قاتار تۇراقتى تۇردە مال ۇرلىعىمەن اينالىسقان ەكى قىلمىستىق توپ ۇستالدى. بارىمتاشىلاردىڭ 14 قىلمىسقا قاتىستىلىعى انىقتالىپ, قازىرگى ۋاقىتتا ءىس سوتقا جىبەرىلدى», دەيدى قاراعاندى وبلىستىق پوليتسيا دەپارتامەنتىنىڭ ءباسپاسوز قىزمەتى.
قاراعاندى وبلىسى