وڭىرگە ەرەكشە ءمان بەرىلەدى

مەملەكەت باسشىسى قاسىم-جومارت توقاەۆ تۇركىستان ءوڭىرى جۇرتشىلىعىمەن كەزدەسۋىندە جۇمىس ساپارىنىڭ نەگىزگى ماقساتى وبلىستاعى احۋالمەن تانىسۋ ەكەنىن ايتىپ, وسىنداي دەرەكتەردى كەلتىردى. ءيا, 2019 جىلدان بەرى وبلىسقا 2 ميلليونعا جۋىق تۋريست كەلگەن. كەيىنگى ءۇش جىلدا ايماقتاعى ونەركاسىپ جانە اۋىل شارۋاشىلىعى سالاسى 1,5 ەسە وسكەن. وبلىستا 64 مىڭعا جۋىق تۇراقتى جۇمىس ورنى اشىلدى. سونداي-اق تۇركىستان وبلىسىندا ەكونوميكانىڭ نەگىزگى كورسەتكىشى – جالپى وڭىرلىك ونەركاسىپ ءونىمىنىڭ كولەمى بيىلعى 8 ايدا 534 ملرد تەڭگەنى قۇراپ, وتكەن جىلدىڭ ءتيىستى كەزەڭىمەن سالىستىرعاندا 125 ملرد تەڭگەگە وسكەن. ءوڭىردىڭ ونەركاسىپ الەۋەتىن دامىتۋ ماقساتىندا جالپى قۇنى 12 ملرد 700 ملن تەڭگەگە 26 ينۆەستيتسيالىق جوبا ىسكە قوسىلىپ, 936 جۇمىس ورنى اشىلدى. وبلىس ءۇشىن ماڭىزدى ءىرى جوبالاردى ىسكە اسىرۋ جوسپارلانىپ وتىر. اتاپ ايتقاندا, كاۋستيكالىق سودا, پۆح, كاربيد كالتسي, تسەمەنت وندىرەتىن, 5 كلاستى موتور مايى مەن مۇناي ونىمدەرىن وندىرەتىن جانە فوسفوريت وڭدەۋ زاۋىتى ىسكە قوسىلادى. بۇل جۇمىستار مەملەكەتتىك قولداۋ ناتيجەسىندە جۇزەگە اسىرىلىپ وتىر.

ءوڭىر جۇرتشىلىعىمەن كەزدەسۋىندە پرەزيدەنت تۇركىستاندى اتاجۇرتىمىزدىڭ التىن قازىعى دەپ اتاپ ءوتتى. «تۇركىستان – ءبارىمىزدىڭ ماقتانىشىمىز, ەكى دۇنيە ەسىگى, ەر تۇرىكتىڭ بەسىگى اتانعان بۇكىل الەمگە تانىمال قاسيەتتى جەر. وسى كيەلى شاھاردىڭ ءتول تاريحىمىزدا ايرىقشا ورنى بار. تۇركىستان تورىندەگى قوجا احمەت ياساۋي كەسەنەسى – رۋحانياتىمىزدىڭ مىزعىماس دىڭگەگى. سوندىقتان تۇركىستانعا جالپى, وسى وبلىسقا ەرەكشە ءمان بەرۋىمىز كەرەك. بۇل ەڭ الدىمەن, ۇكىمەتىمىزدىڭ باستى مىندەتى», دەدى پرەزيدەنت.

مەملەكەت باسشىسىنىڭ ءار ساپارىنان جاعىمدى جاڭالىق, وڭ وزگەرىس كۇتەتىن جۇرتشىلىق قاستەرلى مەكەنگە باس ءيىپ, اتا-بابادان كەلە جاتقان اماناتقا دەگەن قۇرمەتىن دە جوعارى باعالاپ وتىر. ەڭ اۋەلى قازاقتىڭ ىلگەرىدە دۇنيەدەن وتكەن يگى جاقسىلارىنىڭ جامباسى تيگەن قوجا احمەت ياساۋي كەسەنەسىنە زيارات ەتكەن ونەگەلى قادامىندا دا تەرەڭ ماعىنا جاتىر.

قايرات بالابيەۆ,

تۇركىستان وبلىستىق ءماسليحاتىنىڭ حاتشىسى