قاراعاندىلىق سۋرەتشى كارىپبەك كۇيىكوۆتىڭ تۋىندىلارىنا حاس ونەردى اسا اسپەتتەيتىن فرانتسۋزدار دا كۋا بولىستى. 8 كۇندە فرانتسيانىڭ ءتۇرلى قالالارىنداعى كورمەدە فرانتسۋزدار كارىپبەكتىڭ تاعدىرى مەن تۋىندىسى ارقىلى جالپى يادرولىق قارۋدىڭ قانداي زۇلمات ەكەنىنە جانە ءبىر كوز جەتكىزدى.
كورمەنى ۇيىمداستىرۋعا مۇرىندىق بولعاندار قاتارىندا – الەم قوزعالىسى (Mouvementdelapaix), رەنا-الماتى باۋىرلاستىق كوميتەتى, قازاقستاننىڭ فرانتسياداعى ەلشىلىگى جانە ستراسبۋرگتەگى قازاقستاننىڭ باس كونسۋلدىعى بار. سۋرەتشىنىڭ ساپارىنا قارجى-قاراجات الەۋمەتتىك جەلى ارقىلى جينالسا, قاراعاندى وبلىسى اكىمى جەڭىس قاسىمبەك, Amanat پارتياسىنىڭ فيليالى زور قولداۋ كورسەتكەنىن اتاعان ءجون.
ەۋروپا كەڭەسىندە (ستراسبۋرگتە), ستراسبۋرگ ۋنيۆەرسيتەتىندە, قازاقستاننىڭ فرانتسياداعى ەلشىلىگىندە (پاريج), سەناتتا (ليۋكسەمبۋرگ سارايى, پاريج), اسسوتسياتسيا ۇيىندە (رەنن) وتكەن كورمەلەر كوپتىڭ كوڭىلىنەن شىعىپ, كوكىرەگىنە قوناقتاپ جاتقانىن فرانتسۋزدار دا جاسىرمادى.
كورمەنى ۇيىمداستىرۋشىنىڭ ءبىرى, الەمگە تانىمال قوعامدىق ۇيىم – الەم قوزعالىسىنىڭ ۇلتتىق حاتشىسى رولان نيۆە كارىپبەككە كارتينالارىن ساتۋدا كومەك قولىن سوزاتىنىن اتاپ ءوتۋ كەرەك.
تورسي قالاسى مەرىنىڭ ورىنباسارى بريس ماسسەكس كارىپبەكتىڭ ءومىر تاريحىنىڭ جان تەبىرەنتەرلىگىن ايتادى.
– مەن ونىڭ ءومىربايانىنا, وسىنداي جاعدايعا قالاي جەت- كەنىنە قايران قالامىن. بۇگىندە مىناداي اقپاراتتاردى بىلۋگە ءتيىسپىز. كارىپبەك ارقىلى كوپ جايتتان حاباردار بولدىم, –دەيدى بريس ماسسەكس.
تاعدىرى كۇردەلى سۋرەتشى فرانتسۋزدىقتار نازارىنا 17 ەڭبەگىن ۇسىندى. ونىڭ تۋىندىسىنىڭ باسىم بولىگى انتيادرولىق تاقىرىپپەن بىرگە قازاقستاننىڭ پەيزاجىنا ارنالعان. سۋرەتشىنىڭ سما دەرتىنەن زارداپ شەگەتىن, «زولگەنسما» ەكپەسىنە اسا مۇقتاج كىشكەنتاي قاراعاندىلىق ايكۇمىس سارسەندى قولداۋعا ارنالعان تۋىندىسىن قازاقستاننىڭ فرانتسياداعى ەلشىلىگى ساتىپ الدى. تۇسكەن قاراجات بالانىڭ اتا-اناسىنا بەرىلمەك.
سۋرەتشى وزىنە بۇل كورمەنىڭ زور مارتەبە ەكەنىن ايتادى. جاڭا كىتاپتىڭ پاراعى اشىلعانداي اسەردە ەكەنىن جەتكىزدى.
– فرانتسيادا بۇرىن-سوڭدى بولماعان ەدىم. فرانتسۋزداردىڭ ەڭبەكتەرىمدى تاماشالاۋى كەۋدەمە ماقتانىش سەزىمىن ۇيالاتتى. ارينە, وسى ارادا قازاقستانىمىزدىڭ تاريحى, سەمەي پوليگونىنىڭ تاريحى تۋرالى ايتۋعا بولادى. پاريجدە سەناتتا يادرولىق قارۋمەن كۇرەسۋگە ۇلەس قوسقاندار جينالدى. مەنىڭ وسىندا كەلۋىمە ىقپال ەتكەن, كومەكتەسكەننىڭ بارىنە العىسىم شەكسىز, – دەيدى ك.كۇيىكوۆ.
قاراعاندى وبلىسى