مەملەكەت باسشىسى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىن جاريالاپ, ەل دامۋىنىڭ الداعى ۋاقىتتاعى باسىم باعىتتارىن جۇيەلى تۇردە بەلگىلەپ بەردى. جولداۋدا جاڭا ەكونوميكالىق ساياسات, ەكونوميكانىڭ ناقتى سەكتورىن دامىتۋ, مەملەكەتتىڭ ەكونوميكاداعى ۇلەسىن ازايتۋ, مەملەكەتتىك باسقارۋدى قايتا جاڭعىرتۋ, قۇقىق ۇستەمدىگى قاعيداتتارىن ىسكە اسىرۋ جانە تاعى باسقا ستراتەگيالىق باعىتتار تۋرالى ايتىلدى.
جاڭا ەكونوميكالىق ساياساتتىڭ ماقساتى – ساپالىق جانە ينكليۋزيۆتىك تۇرعىدان حالىقتىڭ ءال-اۋقاتىن ارتتىرۋ. ونىڭ اسا ماڭىزدى قاعيدالارى جەكە كاسىپكەرلىك باستامالاردى ىنتالاندىرۋ, باسەكەلەستىكتى دامىتۋ جانە ۇلتتىق تابىستى ءادىل ءبولۋ ەكەنىن اتاپ وتكەن ءجون.
پرەزيدەنتىمىز مەملەكەتتىك كاپيتاليزمنەن جانە مەملەكەتتىڭ ەكونوميكاعا شەكتەن تىس ارالاسۋىنان باس تارتۋ قاجەتتىگىن ايتتى. سونداي-اق الەۋمەتتىك جاعىنان ءالسىز توپتاعى ازاماتتاردىڭ مۇددەلەرىن قاتار ەسكەرە وتىرىپ, باعا بەلگىلەۋ سالاسىندا ەكونوميكالىق سۋبەكتىلەرگە ءتيىستى مۇمكىندىكتەر بەرىلەدى.
الەۋمەتتىك-ەكونوميكالىق سالادا ادىلەتتىلىك قاعيداتىن ىسكە اسىرۋ ءۇشىن سالىق رەفورماسىن جۇرگىزۋ كوزدەلىپ وتىر. سوعان سايكەس ەكونوميكانىڭ ءتۇرلى سالاسىندا ديففەرەنتسيالدى سالىق مولشەرلەمەسىنە كوشۋ جانە ء«سان-سالتاناتقا سالىق» سالۋدى ەنگىزۋ ماسەلەسى كوتەرىلدى.
مەملەكەت باسشىسى جولداۋدا ازاماتتاردىڭ ۇلتتىق قوردىڭ قاراجاتىن ءادىل بولۋگە قاتىستى سۇرانىستارىنا دا جاۋاپ بەردى.
«ۇلتتىق قور – بالالارعا» اتتى اسا ماڭىزدى باستامانىڭ ءدال بالالار جىلىندا جاريالانۋى سيمۆوليكالىق مانگە يە. وسى يگى باستاما اياسىندا ۇلتتىق قوردىڭ جىل سايىنعى ينۆەستيتسيالىق تابىسىنىڭ جارتىسى بالالاردىڭ ارناۋلى جيناقتاۋشى ەسەپشوتىنا ولار 18 جاسقا تولعانعا دەيىن اۋدارىلىپ تۇرادى. جيناقتالعان قارجى بولاشاقتا بالالاردىڭ باسپانا نەمەسە ءبىلىم الۋىنا جۇمسالادى.
ۇلتتىق قوردىڭ نەگىزگى مىندەتى بولاشاق ۇرپاقتىڭ جيناعى رەتىندە قىزمەت ەتۋ ەكەنى بەلگىلى. جاڭا باستاما قوردىڭ سول ميسسياسىنىڭ ءىس جۇزىندەگى كورىنىسى دەۋگە تولىق نەگىز بار.
سونىمەن قاتار جولداۋدا ساياسي سالانى ءارى قاراي دامىتۋ ماسەلەلەرى دە قامتىلدى. مەملەكەت باسشىسى كەزەكتەن تىس پرەزيدەنت سايلاۋى جانە پارلامەنت ءماجىلىسى مەن ءماسليحاتتار سايلاۋى تۋرالى جاريالادى.
الداعى كەزەڭدەگى ەلەكتورالدى تسيكلدىڭ مەرزىمىن اشىق جاريالاۋ جاڭا ساياسي مادەنيەتتىڭ كورىنىسى ەكەنى ءسوزسىز. مۇنداي قادام قوعام مەن بيلىك اراسىنداعى سەنىمدى كۇشەيتە تۇسەدى.
رەسپۋبليكالىق رەفەرەندۋمدا قولداۋ تاپقان كونستيتۋتسيالىق رەفورمانىڭ اۋقىمدى بولىگى باستى ساياسي ينستيتۋتتاردى, ياعني پارلامەنتتى, پارتيالاردى, ءماسليحاتتاردى, سونداي-اق پارتيالىق جانە سايلاۋ جۇيەسىن تاباندى تۇردە قايتا جاڭعىرتۋعا باعىتتالعانى بەلگىلى. وسى رەتتە كەزەكتەن تىس سايلاۋ نەگىزگى بيلىك ورگاندارىن كونستيتۋتسيانىڭ جاڭارتىلعان نورمالارىنا سايكەستەندىرەتىنىن اتاپ وتكەن ءجون.
بۇل وزگەرىستەر مەن باستامالاردىڭ ءبارىن ءتيىستى دەڭگەيدە زاڭنامالىق تۇرعىدان قامتاماسىز ەتۋ قاجەت.
سەناتورلار جاڭا, ادىلەتتى قازاقستاننىڭ قۇقىقتىق بازاسىن قالىپتاستىرۋ ءۇشىن وسى باعىتتا ءماجىلىس پەن ۇكىمەتتەگى ارىپتەستەرىمەن, ساراپشىلارمەن جانە قوعام وكىلدەرىمەن بىرلەسىپ, بەلسەندى جۇمىس ىستەيدى.
ماۋلەن اشىمباەۆ,
پارلامەنت سەناتىنىڭ توراعاسى