قىرعىز رەسپۋبليكاسىنىڭ پرەزيدەنتى سادىر جاپاروۆ 23 تامىزدى رەسەي فەدەراتسياسىنداعى جول-كولىك وقيعاسىندا قازا تاپقاندارعا ارنالعان جالپى ازا تۇتۋ كۇنى دەپ جاريالادى, دەپ حابارلايدى Egemen.kz.
سادىر جاپاروۆ رەسەي فەدەراتسياسىنىڭ ۋليانوۆ وبلىسىندا بولعان جول-كولىك وقيعاسى سالدارىنان وتانداستارىنىڭ قازا بولۋىنا بايلانىستى ۇندەۋ جاسادى.
«قۇرمەتتى قىرعىزستاندىقتار! رەسەي فەدەراتسياسىنىڭ ۋليانوۆ وبلىسىندا بولعان وقيعا ارقايسىمىزدى ەلەڭ ەتكىزدى. بۇل ورنى تولماس قايعى بارشانىڭ جۇرەگىن سىزداتتى. مەن زارداپ شەككەندەردىڭ تۋىستارىنىڭ قايعىسىنا ورتاقپىن. ولار ءۇشىن قازىر وتە قيىن. مۇنداي جاعدايلاردا جاناشىر سوزدەردى ايتۋ قيىن. دەگەنمەن, اپاتتان قازا تاپقاندار مەن زارداپ شەككەندەردىڭ تۋىستارى مەن جاقىندارىنا كوڭىل ايتامىن. قايعىلارىڭىزدى بارلىعىمەن ءبولىسىپ, اللا تاعالادان كۇش-قۋات, سابىر بەرۋىن سۇرايمىن», دەدى س.جاپاروۆ.
مەملەكەت باسشىسى اپات سالدارىنان قازا تاپقاندار مەن زارداپ شەككەندەردىڭ تۋىستارى مەن جاقىندارىنا كومەك كورسەتۋدى جەكە باقىلاۋىنا الاتىنىنا سەندىردى.
«قۇرمەتتى وتانداستار, بۇل قايعىلى وقيعا بارشا حالقىمىز ءۇشىن ۇلكەن قايعى, وسىعان بايلانىستى 23 تامىزدى قىرعىز رەسپۋبليكاسىنىڭ اۋماعىندا جالپى ازا تۇتۋ كۇنى دەپ جاريالايمىن», دەلىنگەن پرەزيدەنت اكىمشىلىگىنىڭ سايتىندا جاريالانعان حابارلامادا.
قىرعىزستان سىرتقى ىستەر مينيسترلىگىنىڭ حابارلاۋىنشا, ۋليانوۆ وبلىسىنداعى جول اپاتى سالدارىنان 14 قىرعىزستاندىق قازا تاۋىپ, قىرعىزستاننىڭ تاعى ءۇش ازاماتى اۋرۋحاناعا جاتقىزىلعان.