قاي ەلدى مەكەننىڭ دە تازا بولۋى نەمەسە كۇل-قوقىسقا بەلشەسىنەن باتىپ جاتۋى سوندا تۇراتىن ادامداردىڭ كوڭىل كۇيىنە جاقسى نە جامان جاعىنان اسەر ەتەتىنى ايتپاسا دا تۇسىنىكتى جايت. سوندىقتان كىم-كىمدە ءوزى ءومىر ءسۇرىپ جاتقان جەرىنىڭ تازالىعىنا قاجەتتى دەڭگەيدە ءمان بەرسە, سوعان ساي كوڭىل كۇيىنىڭ دە ءار كەز كوتەرىڭكى جۇرەتىنى كۇمانسىز.
ياعني وسى يگىلىكتى ىسكە باسشى مەن قوسشى دا, ەلدى مەكەن تازالىعىنا تىكەلەي جاۋاپتى مەكەمە قىزمەتكەرلەرى مەن جۇمىسشىلارى دا, ءتىپتى قاراپايىم تۇرعىندار دا قال-قادەرلەرىنشە ۇلەستەرىن قوسسا, نۇر ۇستىنە نۇر بولاتىنى تاعى ايان.
وسى ورايدا ايتا كەتەتىن ءبىر جايت – كەز كەلگەن ءىرىلى-ۇساقتى ەلدى مەكەندەردەگىدەي, قالا تازالىعىنا تىكەلەي جاۋاپتى «قىزىلوردا تازالىعى» دا تىرشىلىگى قىسى-جازى تولاس تاپپايتىن مەكەمەلەردىڭ ءبىرى. جۇمىس بارىسىندا تازالىقشىلار قوعامدىق كولىكپەن كۇنىنە بىرنەشە مارتە شاھاردىڭ ءار بۇرىشىنا قاتىناپ جاتادى. ءار مىنگەن سايىن 90 تەڭگە تولەپ, جالاقىسىنىڭ ءبىراز بولىگىن جولعا جۇمسايتىن مەكەمە جۇمىسشىلارىنىڭ وسى ماسەلەسى جۋىردا شەشىمىن تاپتى.
«قىزىلوردا تازالىعى» كمم جۇمىسشىسى گۇلايىم قارعاباەۆانىڭ وسى سالادا جۇمىس ىستەپ كەلە جاتقانىنا 20 جىلعا جۋىقتاپتى. وبلىس اكىمى نۇرلىبەك نالىباەۆتىڭ تۇرعىنداردى جەكە ماسەلەلەرىمەن قابىلداۋىنا جازىلعان ول جولكىرەنىڭ قالتانى ورتايتىپ تۇرعانىن ايتىپ, ايماق باسشىسىنان كومەك سۇرايدى. تۇرعىن تىلەگىنە تۇسىنىستىكپەن قاراعان ايماق باسشىسى ءدال سول مەزەتتە قالا اكىمى اسىلبەك شامەنوۆكە 1 ماۋسىمنان باستاپ قوعامدىق كولىكتە تازالىقشىلار ءۇشىن تەگىن ءجۇرۋ بيلەتىن ازىرلەۋدى تاپسىرعان-تىن.
«كۇننىڭ ىستىق, سۋىعىنا قاراماستان قالانىڭ تازالىعىن ساقتاپ جۇرگەن جۇمىسشىلارعا قۇرمەتىمىز ەرەكشە. شاھاردىڭ شىرايىن كىرگىزىپ تۇرعان وسى ازاماتتارعا بارىنشا قولداۋ كورسەتىلۋى قاجەت. سول سەبەپتى, 1 ماۋسىمنان باستاپ بۇل مەكەمەنىڭ بارلىق قىزمەتكەرىنىڭ قوعامدىق كولىكتە تەگىن ءجۇرۋىن ۇيىمداستىرامىز», دەگەن بولاتىن وبلىس باسشىسى.
ءبىز بۇل حابارىمىزبەن كەز كەلگەن ءىرى قالالاردا, وبلىس ورتالىقتارىندا ەنگىزۋگە بولاتىن جاعىمدى جاڭالىق رەتىندە بولىسە كەتكەندى ءجون كوردىك.
باقىتجان ابىزوۆ,
قالا تۇرعىنى
قىزىلوردا