قاراعاندى وبلىسىندا قۇرىلىس سالاسىنداعى ەكپىننىڭ قارقىن الىپ تۇرعانىن بۇدان بۇرىن دا بىرنەشە مارتە ايتقانبىز. مىسالى, وتكەن جىلدىڭ 9 ايىندا 400 مىڭ شارشى مەتر تۇرعىن ءۇي پايدالانۋعا بەرىلىپتى. ال بيىل 662 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان.
تۇرعىن ءۇي قۇرىلىسى وسىنشا قارقىنمەن ءجۇرىپ جاتقاندا, وعان قاجەتتى ماتەريالداردىڭ وزىمىزدە جاساپ شىعارىلاتىنى دا ءبىر ەسەپتەن داتكە قۋات. بۇعان ناقتى دالەل رەتىندە شاحتينسك قالاسىنداعى پەنوپلاست ماتەريالىن وندىرۋمەن اينالىساتىن كاسىپورىندى ايتۋعا بولادى.
جالپى, قىتىمىر قىسى التى ايعا سوزىلاتىن ارقا توسىندە سالىناتىن ۇيلەردىڭ ءبىرىنشى كەزەكتە جىلى بولماعىنا باسا نازار اۋدارىلادى. وسى ورايدا, جىلۋدى جاقسى ۇستايتىن پەنوپلاست ماتەريالىنىڭ اتالعان باعىتتاعى ماڭىزى مەن تيىمدىلىگى زور. بۇل ءونىم جاڭا عيماراتتاردىڭ قۇرىلىسىندا پايدالانىلادى. سونىمەن بىرگە پەنوپلاست ماتەريالى جىلۋ وقشاۋلاعىش پليتالار جاساۋ, پوليستيرول بەتونىن ءوندىرۋ ءۇشىن كەڭىنەن قولدانىلادى.
ايتا بەرسە, پەنوپلاستىڭ امبەباپ قاسيەتتەرى كوپ. مىسالى, بۇل ءونىم قۇرىلىس يندۋسترياسىندا جىلۋ وتكىزگىشتىگى مەن دىبىس وقشاۋلاي الاتىنى ءۇشىن جوعارى باعالانادى. سونىمەن قاتار ماتەريال بەرىكتىگىمەن دە ەرەكشەلەنەدى. سوندىقتان دا اسا تانىمال جانە ءجيى قولدانىلاتىن پەنوپلاستقا دەگەن سۇرانىس قازىرگى ۋاقىتتا ەلىمىز بويىنشا وتە زور بولىپ تۇر.
ءبىز اڭگىمە قىلىپ وتىرعان كاسىپورىننىڭ باسشىسى, جەكە كاسىپكەر سەرگەي ماتيۋحين پەنوپلاست وندىرۋمەن 2000-جىلداردىڭ باسىنان بەرى اينالىسىپ كەلەدى.
– وعان دەيىن ناۋبايحانا, جۇك تاسىمالداۋ سياقتى بيزنەس تۇرلەرىن كاسىپ ەتتىم. ءسويتىپ ءجۇرىپ, قۇرىلىس سالاسىنا اسا قاجەتتى پەنوپلاست وندىرۋمەن اينالىسسام با دەگەن وي كەلدى. سودان بوس قالعان كوكونىس بازاسىن ساتىپ الدىم دا, ينجەنەرلىك كوممۋنيكاتسيالاردى قالپىنا كەلتىرىپ, جەلى ساتىپ الدىم. ءوندىرىستى 2007 جىلى ىسكە قوستىم. بىراق ول كەزدە قۇرىلىس قازىرگىدەي قىزۋ جۇرە قويماعان ەدى: العاشقى ەكى جىل مينۋسپەن جۇمىس ىستەۋگە تۋرا كەلدى. بىرتىندەپ سۇرانىس وسە باستادى. ال 2010 جىلى پايداعا شىقتىق. ءارتۇرلى قيىندىقتار كەزدەسكەنىمەن, قازىرگى ۋاقىتتا ءىسىمىز وڭعا باسىپ تۇر, – دەيدى ول.
پەنوپلاست ءوندىرۋ كۇردەلى ۇدەرىستەن تۇرادى: بۇل جۇمىستاردىڭ بارلىعى اۆتوماتتاندىرىلعان. اۋەلى شيكىزات ارنايى اگرەگاتقا سالىنادى. ودان ءارى پوليستيرول تۇيىرشىكتەرى كوبىكتەنىپ, كولەمىن ۇلعايتادى. ماشينا كومەيىنەن شىققان اپپاق پەنوپلاست بلوكتارى بىردەن كەپتىرۋگە اپارىلادى. ماتەريال ءبىراز ۋاقىت جاتقان سوڭ, ارنايى سىم ىشەكتەرى بار ستانوكپەن ءتۇرلى ولشەمدەر بويىنشا كەسىلەدى. ال دايىن ءونىم تۇتىنۋشىعا جالپاق پليتا نەمەسە دومالاق تۇيىرشىكتەر تۇرىندە جەتكىزىلەدى.
قازىرگى تاڭدا كاسىپورىندا 25-كە جۋىق ادام جۇمىس ىستەيدى. جاز ايلارىنا قاراي قۇرىلىس ماتەريالدارىنا دەگەن سۇرانىس ارتقاندا, قوسىمشا جۇمىسشىلار قابىلدانادى. جانە بۇل باعىتتا جەرگىلىكتى تۇرعىندارعا باسىمدىق بەرىلەدى.
شاحتينسك قالاسىنداعى اتالعان كاسىپورىننىڭ باستى تۇتىنۋشىسىنىڭ ءبىرى – وبلىستا قابىرعالارى جىلىتىلعان ۇيلەر سالاتىن قۇرىلىس كومبيناتى. سونىمەن قاتار بۇل قات ءونىم ەلىمىزدىڭ باسقا دا وڭىرلەرىنە ارنايى جۇك كولىكتەرىمەن جەتكىزىلەدى.
قازىرگى تاڭدا كاسىپورىن دامۋدىڭ داڭعىلىنا تۇسكەن. جۇكتەمە ۇلعايعان سايىن, جاڭا جەلى قوسىپ وتىرۋ دا جوسپاردا بار. وسى ورايدا ءوندىرىستى ۇلعايتۋ ماقساتىندا جەكە كاسىپكەر سەرگەي ءماتيۋحيننىڭ «مونوقالالاردى دامىتۋ» باعدارلاماسى اياسىندا مەملەكەتتىك قولداۋدى ءساتتى پايدالانىپ جۇرگەنىن دە ايتا كەتكەن ءلازىم.
قاراعاندى وبلىسى,
شاحتينسك قالاسى