ايەلدەر اراسىنداعى قازاقستاننىڭ ءبىرىنشى راكەتكاسى ەلەنا رىباكينا دۇيسەنبى كۇنى جاڭارعان WTA رەيتينگىندە ەكى ساتى جوعارىلاپ, الەمنىڭ ەڭ ۇزدىك 20 تەننيسشىسىنىڭ قاتارىنا قايتا قوسىلدى.
وتكەن اپتادا اقش-تىڭ ينديان-ۋەللس قالاسىندا مارەسىنە جەتكەن ماستەرس تۋرنيرىندە وتانداسىمىز جارىستىڭ شيرەك فينالىنا دەيىن جەتتى. شيرەك فينالدا رىباكينا الەمنىڭ التىنشى راكەتكاسى گرەكيالىق ماري ساككاريمەن شەبەرلىك بايقاسىپ, ەكى سەتتە 5:7, 4:6 ەسەبىمەن جەڭىلىپ قالعان بولاتىن. وسى ناتيجەسىنىڭ ارقاسىندا ول ايەلدەر اراسىنداعى رەيتينگتە 18-ورىنعا كوتەرىلىپ الدى. سونىمەن قاتار يۋليا پۋتينتسەۆا 47-ءشى, زارينا دياس 112-ورىندارىن ساقتاپ قالدى. ەرلەر اراسىنداعى قازاقستاننىڭ ءبىرىنشى راكەتكاسى الەكساندر بۋبليك ءوز ناتيجەسىن ءبىر ورىنعا جاقسارتتى. بۇعان دەيىن 33-ورىندا تۇرعان ول 32-ساتىعا كوتەرىلدى.
ايتا كەتەيىك, بۇل كۇندەرى تەننيسشىلەرىمىز اقش-تاعى تاعى ءبىر ءداستۇرلى Miami Open تۋرنيرىندە باق سىناپ جاتىر. يۋ.پۋتينتسەۆا العاشقى اينالىمدا گەرمانيالىق ناستاسيا-ماريانا شۋنكتەن باسىم تۇسسە, م.كۋكۋشكين نەگىزگى كەزەڭگە جولداما الدى. ال ە.رىباكينا بۇل جارىستى ەكىنشى كەزەڭنەن باستايدى.