قۇرلىقتىق حوككەي ليگاسىندا باق سىناعان ەلوردانىڭ «بارىسى» ءۇشىن بيىلعى ماۋسىم اياقتالدى. گاگارين كۋبوگى جولىنداعى پلەي-وفف كەزەڭىندە ونەر كورسەتكەن قازاقستاندىق كوماندا بەس ويىننىڭ قورىتىندىسى بويىنشا «مەتاللۋرگتەن» 4:1 ناتيجەسىمەن جەڭىلىپ قالدى.
سىرت ايدىندا وتكەن العاشقى ەكى ويىندا كوماندالار ءبىر-ءبىر جەڭىسكە قول جەتكىزدى. ءبىرىنشى ويىندا «بارىس» 3:2 ەسەبىمەن باسىم تۇسسە, كەيىنگى ماتچتا ايدىن يەلەرى ۇستەمدىك تانىتتى – 6:2. ال «بارىس ارەنادا» وتكەن ەكى ويىندا دا «مەتاللۋرگ» حوككەيشىلەرىنىڭ مەرەيى ۇستەم بولدى. العاشقى كەزدەسۋ – 5:3, ەكىنشى ماتچ 5:2 ەسەبىمەن اياقتالدى.
ال ماگنيتوگورسكىدەگى شەشۋشى, بەسىنشى ماچتا مۇزايدىن يەلەرى «بارىس» ويىنشىلارىن 3:1 ەسەبىمەن قاپى قالدىردى. كەزدەسۋدىڭ ەسەبىن ءبىرىنشى بولىپ رەسەيلىك كوماندا اشتى. ويىننىڭ 16-مينۋتىندا سەميون كوشەلەۆ مەرگەندىگىمەن كوزگە ءتۇستى. ەكىنشى كەزەڭدە حوككەيشىلەر ءبىر-ءبىرىنىڭ قاقپاسىنا گول سوعا المادى. ال 40-مينۋتتا كيريلل ساۆيتسكي تارازى باسىن تەڭەستىرىپ, قازاقستاندىق جانكۇيەرلەرگە ءۇمىت سىيلاعان ەدى. الايدا اينالدىرعان ءتورت مينۋتتىڭ ىشىندە «مەتاللۋرگ» حوككەيشىلەرى نيكيتا بوياركين قورعاعان قاقپاعا تاعى ەكى گول سوعىپ, «بارىستى» جارىس جولىنان ىعىستىردى. بەس ويىندا 4:1 ەسەبىمەن جەڭىسكە جەتكەن «مەتاللۋرگ» 1/4 فينالعا جولداما الدى.