فۋتبولدان قازاقستان ۇلتتىق قۇراماسىنىڭ باس باپكەرى تالعات ءبايسۋفينوۆتىڭ وكىلەتتىلىگى مەرزىمىنەن بۇرىن توقتاتىلدى. ونىڭ ورنىنا باس باپكەردىڭ مىندەتىن اتقارۋشى بولىپ اندرەي كارپوۆيچ تاعايىندالدى.
سەمەي فۋتبول مەكتەبى تۇلەگىنىڭ ەسىمى قازاقستاندىق جانكۇيەرلەرگە جاقسى تانىس. ول ۇلتتىق قۇرامادا ەڭ كوپ ماتچ (55) وتكىزگەن ويىنشىلاردىڭ بەستىگىنە كىرەدى. بىرنەشە رەت ۇلتتىق قۇرامانى كاپيتان رەتىندە الاڭعا باستاپ شىققان بولاتىن. 41 جاستاعى جەرلەسىمىز ءوزىنىڭ كلۋبتىق مانسابىندا «ەلىم-اي», «ەرتىس», «قايرات», «لوكوموتيۆ», «ورداباسى», «شاحتەر», «اتىراۋ», «التاي», سونداي-اق رەسەيلىك «روستسەلماش» جانە ماسكەۋلىك «دينامو» كوماندالارىندا وينادى.
كارپوۆيچ باپكەرلىك مانسابىن «قايرات» كلۋبىنىڭ جۇيەسىندە باستاپ, ودان كەيىن ەكى جىل كوكشەتاۋدىڭ «وقجەتپەسىن» جاتتىقتىردى. ال 2021 جىلدىڭ باسىنان باستاپ پەتروپاۆلدىڭ «قىزىلجارىن» جاتتىقتىرىپ كەلەدى. ەل چەمپيوناتىنىڭ بىلتىرعى ماۋسىمىندا «قىزىلجار» تۋرنير كەستەسىندە 4-ورىنعا تابان تىرەپ, ەۋروكۋبوك جولداماسىن جەڭىپ العان ەدى.
ۇلتتىق قۇرامانىڭ جاڭا باس باپكەرى ءۇشىن العاشقى سىناق 24 ناۋرىزدا مولدوۆا قۇراماسىنا قارسى ويىندا بولادى.