وتكەن دەمالىس كۇندەرى فۋتبولدان قازاقستان چەمپيوناتىنىڭ جاڭا ماۋسىمى باستالدى. 2022 جىلعى ەل بىرىنشىلىگىنىڭ 1-تۋر ويىندارى جانكۇيەرلەردىڭ ەسىندە قالاتىنداي ەرەكشە وقيعالارعا تولى بولدى. ءبىرىنشى كۇنگە جوسپارلانعان ءبىرىنشى تۋرداعى بەس ماتچتىڭ تورتەۋىندە جەڭىمپاز كوماندا انىقتالمادى.
العاشقى تۋردىڭ شىمىلدىعىن شىمكەنتتىڭ «ورداباسى» مەن پرەمەر-ليگا دەبيۋتانتى – تۇركىستان وبلىسىنىڭ «ماقتاارال» كوماندالارى اشتى. شىمكەنتتەگى قاجىمۇقان اتىنداعى ستاديوندا وتكەن وڭتۇستىك دەربيىندە كوماندالاردىڭ كۇشى تەڭ بولدى. كەزدەسۋدىڭ ەسەبىن جانە بيىلعى چەمپيوناتتىڭ تۇڭعىش گولىن «ماقتاارالدىڭ» فرانتسيالىق لەگيونەرى بيللال سەبايحي سوقتى. دەگەنمەن الاڭ قوجايىندارى ءبىرىنشى تايمنىڭ سوڭىنا دەيىن تارازى باسىن تەڭەستىرىپ ۇلگەردى. گول اۆتورى – سەرجا نيۋادزي.
سونىمەن قاتار ءبىرىنشى تۋردىڭ تاعى ءۇش كەزدەسۋىندە دە تەڭ ەسەپ تىركەلدى. بيىلعى بىرىنشىلىكتىڭ تاعى ءبىر دەبيۋتانتى – «اقسۋ» (پاۆلودار وبلىسى) دا سىرت الاڭدا «اتىراۋمەن» تەڭ ويناپ (0:0), قارسىلاسىنان ۇپاي السا, تۇركىستانداعى «تۇران» – «تاراز» جانە «استانا ارەناداعى» «استانا» – «شاحتەر» ويىنىندا ەسەپ اشىلمادى. بىراق سوڭعى ماتچتاعى باسەكەدە «استانا» كلۋبىنىڭ باس باپكەرى سردجان بلاگوەۆيچ الاڭعا ءبىر مەزەتتە 7 لەگيونەر شىعارىپ, چەمپيونات ەرەجەسىن بۇزدى. ەندى ەلوردا كومانداسىنا تەحنيكالىق جەڭىلىس جازىلۋى مۇمكىن. ويتكەنى قازاقستان بىرىنشىلىگىنىڭ ەرەجەسى بويىنشا, الاڭدا ءبىر ۋاقىتتا 6 لەگيونەردىڭ ويناۋىنا رۇقسات ەتىلگەن.
بىلتىر بىرىنشىلىكتىڭ تۋرنير كەستەسىندە ءتورتىنشى ورىنعا تابان تىرەپ, ەۋروكۋبوك باسەكەسىنە جولداما العان پەتروپاۆلدىڭ «قىزىلجارى» اقتاۋدا «كاسپيدەن» 0:1 ەسەبىمەن جەڭىلىپ قالدى. ويىنداعى جالعىز ءارى جەڭىستى گولدى 66-مينۋتتا اسلان ءادىل سالدى.
جەكسەنبى كۇنى الماتىداعى ورتالىق ستاديوندا «قايرات» پەن «اقتوبە» كەزدەستى. ماۋسىمارالىق ۇزىلىستە قۇرامىن بىرقاتار تاجىريبەلى فۋتبولشىمەن كۇشەيتكەن اقتوبەلىكتەر ءبىرىنشى تايمدا ءتاۋىر ويناپ, الاڭ يەلەرى قاقپاسىنىڭ ماڭايىندا ءبىراز قاۋىپتى شابۋىل ۇيىمداستىردى. ال جاستارعا سەنىم ارتقان «قايرات» قورعانۋمەن بولدى. ەكىنشى تايمدا الاڭعا حوسە كانتە شىققانعا دەيىن دە قوناقتار ويىندا باسىمدىق تانىتىپ جاتقان ەدى. گۆينەيالىق شابۋىلشى ماتچقا ارالاسقان ساتتەن كەيىن «قايراتتىڭ» ويىنىنا قان جۇگىرىپ, شابۋىلدا ءجيى بوي كورسەتە باستادى. ءسويتىپ 66-مينۋتتا كانتە 11 مەترلىك ايىپ دوبىن ءساتتى ورىنداپ, ەسەپ اشسا, 86-مينۋتتا ءدۋبلدىڭ اۆتورى اتاندى. وسىلايشا, «قايرات» ءبىرىنشى تۋرداعى ەڭ ءىرى ەسەپتى تىركەدى – 2:0.
بىلتىرعى ەل چەمپيونى – «توبىل» قوستانايدا ورالدىڭ «اقجايىق» كلۋبىن قابىلداپ, 1:0 ەسەبىمەن جەڭدى. ماتچ الدىندا فۋتبول ماماندارى بۇل كەزدەسۋدە «توبىل» فۋتبولشىلارى ەش قيىندىقسىز ءىرى ەسەپپەن جەڭىسكە جەتەدى دەپ بولجام جاساعان ەدى. الايدا «توبىل» ءبىرىنشى تايمدا «اقجايىقتىڭ» اجەپتاۋىر قارسىلىعىنا ۇشىراپ, گول سوعا المادى. ماتچتىڭ ەكىنشى تايمىندا دا «توبىل» ۇزاق ۋاقىت قارسىلاس كوماندانىڭ قاقپاسىنان ساڭلاۋ تابا المادى. تەك 78-مينۋتتا عانا وزبەكستاندىق شابۋىلشى يگور سەرگەەۆ گول سوعىپ, «توبىلعا» ماڭىزدى ءۇش ۇپاي سىيلادى.
ءبىرىنشى تۋردىڭ ستاتيستيكالارىنا توقتالار بولساق, چەمپيوناتتىڭ العاشقى گولىن, جوعارىدا ايتىپ وتكەندەي, بيللال سەبايحي سوقتى, ال العاشقى سارى قاعازدى «ماقتاارالدىڭ» قورعاۋشىسى ءىلياس امىرسەيىتوۆ الدى. جالپى, ءبىرىنشى تۋردا 27 فۋتبولشى سارى قاعازبەن جازالاندى. العاشقى قىزىل قاعاز «شاحتەردىڭ» لەگيونەرى ابدەل لامانجەگە كورسەتىلدى. سونداي-اق ءبىرىنشى تۋردا «تۇراننىڭ» قورعاۋشىسى سۇلتان ابىلعازى دا الاڭنان قۋىلدى. العاشقى پەنالتيدى حوسە كانتە ءساتتى ورىندادى.
سونىمەن قاتار بيىلدان باستاپ قازاقستان چەمپيوناتىندا VAR جۇيەسى قولدانىلىپ جاتىر. «قايرات» – «اقتوبە» ويىنىندا باس تورەشى گريگوري موسكوۆچەنكو ءبىرىنشى بولىپ VAR كومەگىنە جۇگىندى. ءبىرىنشى تۋرداعى جەتى ويىندى تاماشالاۋ ءۇشىن جەتى قالاداعى ستاديونعا جالپى سانى 19 300 كورەرمەن كەلدى. ەڭ كوپ جانكۇيەر (9 200 ادام) «قايرات» – «اقتوبە» ماتچىن تاماشالادى.
2-تۋر ويىندارى 10-11 ناۋرىز كۇندەرى وتەدى. 10 ناۋرىزدا (بەيسەنبى) «اقسۋ» – «استانا», «تاراز» – «ورداباسى», «قىزىلجار» – «شاحتەر» كوماندالارى, ال 11 ناۋرىزدا (جۇما) «ماقتاارال» – «قايرات», «كاسپي» – «توبىل», «اقتوبە» – «اتىراۋ» جانە «اقجايىق» – «تۇران» كوماندالارى كەزدەسەدى.