تەننيستەن قازاقستان ەرلەر قۇراماسى بيىلعى «دەۆيس كۋبوگىنىڭ» ىرىكتەۋ كەزەڭىندە نورۆەگيامەن شەبەرلىك بايقاسىپ, قارسىلاستارىنان باسىم ءتۇستى. وسىلايشا, جەرلەستەرىمىز قاتارىنان ءۇشىنشى جىل مادريدتە (يسپانيا) وتەتىن جارىستىڭ فينالىندا ونەر كورسەتۋ مۇمكىندىگىنە يە بولدى.
نورۆەگيا – قازاقستان قۇرامالارى اراسىنداعى تارتىستى كەزدەسۋ ناۋرىزدىڭ 4-5-ءى كۇندەرى وسلوداعى Oslo Tennisarena سپورت كەشەنىندە ءوتتى. 2000 جىلى بوي كوتەرگەن جابىق كەشەندەگى تەننيس ورتالىعى كەيىنگى جىلدارى جەرگىلىكتى قۇراماعا ساتتىلىك اكەپ, وسى ورتالىقتا بىرقاتار ويىندا جەڭىسكە جەتكەن ەكەن. اتاپ ايتقاندا, ولار بىلتىر باربادوس (4:0), وزبەكستان (3:1) جانە ۋكراينا (3:1) تەننيسشىلەرىن تىزە بۇكتىرگەن. نورۆەگيالىقتار بيىل دا 2021 جىلداعى جەڭىستى جولىن جالعاستىرۋعا نيەتتى ەدى. الايدا الەكساندر بۋبليك باستاعان جىگىتتەر الەمنىڭ 8-راكەتكاسى سانالاتىن كاسپەر رۋدتىڭ وتانداستارىنا ەش مۇمكىندىك قالدىرمادى.
ىرىكتەۋ جارىسىنىڭ جەرەبەسى بويىنشا, 4 ناۋرىزداعى العاشقى ويىن كۇنى ءبىرىنشى بولىپ كورتقا ميحايل كۋكۋشكين مەن كاسپەر رۋد, سودان كەيىن الەكساندر بۋبليك پەن ۆيكتور دۋراسوۆيچ شىعاتىن بولدى. ەكىنشى كۇنگە جوسپارلانعان ءۇش كەزدەسۋدە الدىمەن الەكساندر نەدوۆەسوۆ پەن اندرەي گولۋبەۆ جۇپتىق سىندا كاسپەر رۋد – ۆيكتور دۋراسوۆيچپەن, سوسىن بۋبليك پەن رۋد, كۋكۋشكين مەن دۋراسوۆيچ كەزدەسەتىن بولىپ بەكىتىلدى.
ءبىرىنشى جارىس كۇنىنىڭ باسەكەسىندە كورتقا ءبىرىنشى بولىپ الەمنىڭ 160-راكەتكاسى ميحايل كۋكۋشكين مەن ATP رەيتينگىندە 8-ورىندا تۇرعان كاسپەر رۋد شىقتى. العاشقى سەتتە كاسپەر جەرلەسىمىزدەن ەش قيىندىقسىز ايلاسىن اسىردى – 6:1. ەكىنشى كەزەڭدە رۋد جەڭىسكە جەتۋ ءۇشىن ءبىراز ەڭبەكتەنۋگە تۋرا كەلدى. ويتكەنى م.كۋكۋشكين ويىن تىزگىنىن ءوز قولىنا الىپ, دوپتى ويىنعا قوسۋ كەزەگىندە ۇنەمى ەسەپتە العا شىعىپ وتىردى. التىنشى گەيمگە دەيىن تارازى باسى 3:3 بولىپ تەڭەسىپ تۇرعان-دى. بىراق جەتىنشى گەيمدە رۋد برەيك جاساپ, ەسەپتە العا شىقتى. نورۆەگيانىڭ ءبىرىنشى راكەتكاسى كەيىنگى گەيمدە دە بىلگەنىنەن جاڭىلماي, بۇل سەتتى دە ءوز پايداسىنا جازدى – 6:4. وسىلايشا, كاسپەر رۋد نورۆەگيا قۇراماسىنا العاشقى جەڭىسىن سىيلادى.
ءبىرىنشى كۇننىڭ ەكىنشى كەزدەسۋىندە الەكساندر بۋبليك پەن ۆيكتور دۋراسوۆيچ كىم مىقتىنى انىقتادى. بۋبليك قازاقستاننىڭ ءبىرىنشى, الەمنىڭ 32-راكەتكاسى بولسا, قارسىلاسى دۇنيەجۇزىلىك رەيتينگتە 321-ورىندا تۇر. ءبىرىنشى پارتيادا بىردەن ويىن تىزگىنىن قولىنا العان قازاقستاندىق تەننيسشى ەكى گەيمنەن برەيكپەن العا شىقتى – 2:0. وسى باسىمدىقتى ءبىرىنشى پارتيانىڭ سوڭىنا دەيىن ساقتاي بىلگەن وتانداسىمىز 6:3 ەسەبىمەن جەڭىسكە جەتتى. ەكىنشى سەتتە ەسەپ 2:2 بولعان كەزدە بۋبليك برەيك جاساپ, العا شىقتى. كەيىننەن تاعى دا ءبىر برەيككە قول جەتكىزدى – 5:2. ال كەزدەسۋدىڭ سوڭعى گەيمىن ەيسپەن اياقتادى – 6:2. ءبىر ساعاتتان ءسال استام ۋاقىتقا سوزىلعان باسەكە بارىسىندا بۋبليك 11 ەيس جاساپ, 3 برەيككە قول جەتكىزدى. ءسويتىپ الەكساندر قازاقستان – نورۆەگيا ماتچىندا تارازى باسىن تەڭەستىرىپ, جانكۇيەرلەرگە قۋانىش سىيلادى.
وسى كەزدەسۋدەگى ءبىرىنشى سەتتىڭ ەكىنشى گەيمىندە وسلوداعى تەننيس ارەناسىندا ەلەكتر جارىعى ءوشىپ, تورەشى كەزدەسۋدى 10 مينۋتقا توقتاتۋعا ءماجبۇر بولدى. ماتچتان كەيىنگى ءباسپاسوز ءماسليحاتىندا الەكساندر بۋبليك ەلەكتر قۋاتىنىڭ ءوشۋى ويىننىڭ باسىندا بولعاندىقتان, ونىڭ كوڭىل كۇيىنە اسەر ەتپەگەنىن ايتتى. «ەگەر بۇل تاي-برەيكتە ورىن السا, بالكىم بۇل ەكەۋمىزدىڭ بىرىمىزگە زيان تيگىزەر ەدى. سوندىقتان ءبىز جاعدايدى سالقىنقاندى قابىلداۋعا تىرىسۋىمىز كەرەك. ۆيكتور جاقسى وينادى, كەي ساتتەردە ازداپ قوبالجىدى. مەن جاقسى وينادىم, سولاي بولۋى كەرەك ەدى. سوندىقتان ماتچتىڭ بارىسى نەگىزىنەن انىق بولدى», دەدى ا.بۋبليك.
وسلوداعى نورۆەگيا – قازاقستان ماتچىنىڭ ەكىنشى ويىن كۇنىن جۇپتىق سىندا باق سىنايتىن تەننيسشىلەر باستاپ بەردى. بۇل باسەكەدە نورۆەگيالىقتار ساپىندا كاسپەر رۋد پەن ۆيكتور دۋراسوۆيچ جۇپ قۇراپ ونەر كورسەتۋى كەرەك ەدى. الايدا نورۆەگيا قۇراماسىنىڭ كاپيتانى (باس جاتتىقتىرۋشى) اندەرس حوسەت رۋدقا دەمالىس بەرىپ, 23 جاستاعى سيمەن سۋندە براتحولمگە سەنىم ارتتى. ءسويتىپ ول ۆيكتور دۋراسوۆيچپەن بىرگە قازاقستاندىقتار اندرەي گولۋبەۆ پەن الەكساندر نەدوۆەسوۆكە قارسى تۇردى. ءبىرىنشى سەتتە نورۆەگيالىق جۇپ 4:1 ەسەبىمەن العا شىقتى. دەگەنمەن قازاقستاندىق تەننيسشىلەر سوڭعى ساتكە دەيىن ويناپ, 12 گەيمدە تارازى باسىن تەڭەستىردى. سوسىن تاي-برەيكتە 12:10 ەسەبىمەن باسىم ءتۇسىپ, جەڭىستى ج ۇلىپ الدى – 6:7. ەكىنشى سەتتە قازاقستاندىق جۇپ تاعى ءبىر برەيك جاساپ, ماتچتى جەڭىسپەن ءتامامدادى – 6:3. ەكى ساعاتقا جۋىق ۋاقىتقا سوزىلعان ماتچتا قازاقستاندىقتار 1 ەيس جاساپ, 7 برەيك-پوينتتىڭ ەكەۋىن پايدالانا ءبىلدى. ەكىنشى كۇننىڭ ءبىرىنشى ماتچىنان كەيىن قازاقستان قۇراماسى 2:1 ەسەبىمەن العا شىقتى.
ءتورتىنشى كەزدەسۋدە قازاقستان مەن نورۆەگيانىڭ ءبىرىنشى راكەتكالارى الەكساندر بۋبليك پەن كاسپەر رۋد شەبەرلىك بايقاستى. بۇل كەزدەسۋ جەرلەسىمىز ءۇشىن وتە ەرەكشە ماتچ بولاتىن. ويتكەنى بۋبليك بۇعان دەيىن رۋدپەن كورتتا ءۇش مارتە كەزدەسىپ, ۇشەۋىندە دە جەڭىلىپ قالعان بولاتىن. سوندىقتان بۇل ماتچ الەكساندرعا كاسپەردەن ەسە قايتارۋعا جانە قازاقستان قۇراماسىن مەرزىمىنەن بۇرىن ءتۋرنيردىڭ فينالىنا شىعارۋعا تاماشا مۇمكىندىك ەدى. قۋانىشقا قاراي, كەزدەسۋ بۋبليك جوسپارلاعانداي ءوتىپ, وتكەن ءۇش جەڭىستىڭ ەسەسىن قايتاردى. اسا تارتىستى كەزدەسۋدىڭ ءبىرىنشى پارتياسىندا برەيك جاساعان قازاقستاندىق تەننيسشى باسىمدىق تانىتتى – 6:4. ەكىنشى سەتتە ك.رۋد ەسە قايتاردى – 7:5. ءۇشىنشى, شەشۋشى پارتيانى بۋبليك اۋەلى برەيكتىڭ ارقاسىندا جەڭىسپەن باستاپ (2:0), ماتچ سوڭىندا 6:4 ەسەبىمەن جەڭىسكە جەتتى.
وسىلايشا, قازاقستان قۇراماسى قوناقتا نورۆەگيا قۇراماسىن 3:1 ەسەبىمەن ۇتىپ, بيىل كۇزدە وتەتىن دەۆيس كۋبوگىنىڭ فينالدىق كەزەڭىنە جولداما الدى. فينالدا قازاقستاننان بولەك, ىرىكتەۋدە جەڭىسكە جەتكەن اۋستراليا, وڭتۇستىك كورەيا, نيدەرلاند, يسپانيا, فرانتسيا, ارگەنتينا, بەلگيا, شۆەتسيا, يتاليا, اقش جانە گەرمانيا قۇرامالارى مەن تىكەلەي جولداماعا يە بولعان حورۆاتيا, ۇلىبريتانيا سەربيا جانە بىلتىرعى چەمپيون رەسەي قۇراماسى وينايدى. بىراق ازىرگە رەسەيدىڭ يسپانياعا بارۋ-بارماۋى شەشىلگەن جوق.