بوكستان جاستار مەن جاسوسپىرىمدەر اراسىنداعى ازيا چەمپيوناتىنا قاتىسىپ جاتقان قازاقستان قۇراماسىنىڭ بوكسشىلارى بايراقتى دودانى جەڭىسپەن باستادى.
يوردانيانىڭ باس شاھارى – امماندا ءوتىپ جاتقان سارى قۇرلىق باسەكەسىندەگى جارىستىڭ ءبىرىنشى كۇنىندە شارشى الاڭعا بەس وتانداسىمىز شىعىپ, بارلىعى دا قارسىلاستارىنان باسىم ءتۇستى. اتاپ ايتقاندا, 48 كيلوداعى بەكسۇلتان بورانبەك تاجىكستاندىق سۋفيدجون سۋدجونوۆتى ءۇشىنشى راۋندتا تەحنيكالىق نوكاۋتپەن جەڭسە, ايدار قادىرحان تاعى ءبىر تاجىكستاندىق دامير مۋباليحونوۆتى 5:0 ەسەبىمەن ۇتتى.
سونداي-اق 63 كيلو سالماقتا جۇدىرىقتاسقان احمەت ۇسەن جارىس قوجايىندارىنىڭ وكىلى وۋن الحاديديگە ەش مۇمكىندىك قالدىرمادى – 5:0. ال 70 كيلودا سىنعا تۇسكەن دامير سينەەۆ تاجىكستاندىق ميرزوباحتيارحون اتاەۆتى ءبىرىنشى راۋندتا-اق نوكاۋتقا ءتۇسىردى. ماديار بەكسۇلتانوۆ (80 كيلو) تا يراك بوكسشىسى مەحدي رااد حاۆي ءال-ساەدتى ايقىن باسىمدىقپەن (5:0) جەڭدى.
امماندا ءوتىپ جاتقان ازيا بىرىنشىلىگى 14 ناۋرىزدا اياقتالادى.