كاسىپقوي بوكستاعى قازاقستاننىڭ شوقجۇلدىزى, ورتا سالماقتاعى IBF جانە IBO تۇجىرىمدارى بويىنشا الەم چەمپيونى گەننادي گولوۆكين (41-1-1, 36 كو) ءدال وسى سالماق دارەجەسىندەگى WBA Super بەلبەۋىنىڭ يەگەرى جاپونيالىق ريوتا مۋراتامەن (16-2, 13 كو) وتەتىن جەكپە-جەكتىڭ رەسمي كۇنى بەلگىلى بولدى. ورتا سالماقتىڭ ءۇش بەلبەۋى ءۇشىن بولاتىن ايقاس 9 ساۋىردە جاپونيانىڭ سايتاما قالاسىنداعى 37 مىڭ جانكۇيەر سىياتىن Saitama Super Arena سپورت كەشەنىندە وتەدى.
بوكس جانكۇيەرلەرىنىڭ ەسىندە بولسا, ەكى بوكسشى بۇعان دەيىن 2021 جىلدىڭ 29 جەلتوقسانىندا جۇدىرىقتاسۋعا ءتيىس ەدى. الايدا پاندەمياعا بايلانىستى بۇل ايقاس بەلگىسىز مەرزىمگە شەگەرىلگەن بولاتىن. سول كەزدە جاپونيا بيلىگى كوروناۆيرۋس ىندەتىنە بايلانىستى جاڭا قاۋلى قابىلداپ, وندا شەتەل ازاماتتارىنىڭ ەلگە كىرۋىنە تىيىم سالىنعان-دى.
وسىلايشا, اراعا ەكى اي سالىپ قوس تاراپتىڭ پروموۋتەرلەرى جەكپە-جەكتىڭ جاڭا ۋاقىتىن بەلگىلەدى. بۇل تۋرالى كۇنى كەشە ەكى بوكسشى وزدەرىنىڭ الەۋمەتتىك جەلىدەگى پاراقشالارىندا مالىمدەدى. ءبىر قىزىعى, جەكپە-جەكتەن ءبىر كۇن بۇرىن, ياعني 8 ساۋىردە گەننادي گولوۆكين 40 جاسقا تولادى.
جەرلەسىمىز كەيىنگى جەكپە-جەگىن 2020 جىلدىڭ جەلتوقسانىندا پولشالىق كاميل شەرەمەتامەن وتكىزگەن بولاتىن. اقش-تىڭ فلوريدا شتاتىنداعى Seminole Hard Rock Hotel & Casino ارەناسىندا ۇيىمداستىرىلعان ايقاستا وتانداسىمىز قارسىلاسىن جەتىنشى راۋندتا تەحنيكالىق نوكاۋتپەن جەڭگەن ەدى.
ال ريوتا مۋراتا بولسا, سوڭعى رەت شارشى الاڭعا 2019 جىلدىڭ جەلتوقسانىندا كوتەرىلدى. سول جىلى ول كانادالىق ستيۆەن باتلەرمەن (28-1-1) ءوز ەلىندە جۇدىرىقتاسىپ, بەسىنشى راۋندتا تەحنيكالىق نوكاۋتپەن باسىم تۇسكەن بولاتىن.
امەريكالىق جۋرناليست مايك كوپپيندجەردىڭ مالىمەتى بويىنشا جەكپە-جەك كەشى جاپونيا تەلەارناسىنداعى پرايم-تايم ۋاقىتىنا بەلگىلەگەن. ال كەشتىڭ باستى ايقاسى جەرگىلىكتى ۋاقىت بويىنشا 22:20-عا جوسپارلانعان بولسا, قازاقستاندىق جانكۇيەرلەر بۇل كەزدەسۋدى نۇر-سۇلتان ۋاقىتى بويىنشا كەشكى 19:20-دا كورە الادى.