جاقىن رەزەرۆتىڭ دەڭگەيىن بايقادىق

اقپان ايىنىڭ باسىندا قازاقستان فۋتبول فەدەراتسيا­سىنىڭ ءباسپاسوز قىزمەتى ۇلتتار ليگاسى اياسىندا مولدوۆا قۇراماسىمەن بولاتىن ويىنعا دايىندىق رەتىندە قپل كلۋبتارىنىڭ لەگيونەرلەرى كومانداسىمەن جولداستىق ماتچ وتەتىنى تۋرالى حابارلادى. رەسمي مالىمدەمەدەن كەيىن كەيبىر فۋتبول جانكۇيەرلەرى قفف-نىڭ بۇل شەشىمىن تۇسىن­بەي: «لەگيونەرلەرمەن ويناعانشا, نەگە وزگە ەلدىڭ قۇرامالارىمەن ماتچ وتكىزبەيدى؟ فەدەراتسيانىڭ مۇنىسى نەسى؟» دەپ تاڭدانىس بىلدىرگەن ەدى. كەيىننەن قفف مۇنى اقپان ايىندا فيفا-نىڭ رەسمي كۇندەرى جوق ەكەنىن, سوندىق­تان وزگە قۇرامالارمەن ماتچ وتكىزۋ مۇمكىن ەمەس ەكەنىن كولدەنەڭ تارتقان ەدى.

جالپى, بۇل جەردە ماڭىزدىسى كىممەن ويناۋدا ەمەس, قازاقستان قۇراماسىنىڭ الداعى جاۋاپتى ويىنعا دايىندىعى, قانداي تاكتيكا ۇستاناتىنى جانە جاڭا فۋتبولشىلاردى سىناقتان وتكىزىپ الۋدا ەدى. ءدال وسى جاعداي تۋرالى فۋتبول ساراپشىسى ايدىن قوجاحمەت ءوزىنىڭ تەلەگرامم ارناسىندا بىلاي دەپ جازدى: «كەز كەلگەن ارەكەتتىڭ ماعىناسى جانە تۇپكى ناتيجەسى بولۋى كەرەك. ەگەر سىزگە بىردەڭە كەرەك بولسا, سوعان قول جەتكىزۋ ءۇشىن ءبارىن جاسايسىز. ياعني سىزدە قانداي دا ءبىر ماقسات بولۋ كەرەك. الايدا ءبىز قازاقستان قۇراماسىنىڭ كەشەگى ويىنداعى تۇپكى ماقساتىن تۇسىنە المادىق. ەگەر باپكەرلەر قۇرامانىڭ جاقىن بولاشاقتاعى رەزەرۆىن تەكسەرىپ كورگىسى كەلگەن بولسا, بۇل بولەك اڭگىمە ەدى. سونداي-اق ماڭىزدى ويىن الدىنداعى جولداستىق ماتچقا شەتەلدىك كلۋبتاردا ونەر كورسەتەتىن باقتيەر زاينۋتدينوۆ, مارات بىستروۆ, الەكسەي ششەتكين, گەورگي جۋكوۆ, ستاس پوكاتيلوۆ, يان ۆوروگوۆسكي, يگور شاتسكي جانە تاعى باسقا فۋتبولشىلار قاتىسپاعان سوڭ مۇنى دايىندىق دەپ تە ايتۋعا كەلمەيدى. جالپى, كەشەگى ويىن ماعىناسىز ماتچ بولدى». بۇل پىكىرمەن كەلىسۋگە دە, كەلىسپەۋگە دە بولادى.

لەگيونەرلەرمەن وتكەن جولداستىق ويىندا قازاقستان قۇراماسى 2:1 ەسەبىمەن جەڭىسكە جەتتى. جالپى, شەتتەن كەلگەن­دەردىڭ شەبەرلىگى جەرگىلىكتى فۋتبولشىلاردان ءبىر باس جوعارى بولۋعا ءتيىس. بىراق بۇل ويىندا ونداي ارتىق­شىلىق بايقالمادى. ال كەزدەسۋگە كەلسەك, ءبىرىنشى تايمدا جەرلەستەرىمىزدەن اسحات تاعىبەرگەن (5-مينۋت) مەن ورالحان ومىرتاەۆ (21) مەرگەندىگىمەن كوزگە تۇسسە, ەكىنشى تايمدا قارسىلاستاردان «قىزىلجاردىڭ» بەلورۋسسيالىق شابۋىلشىسى كيريلل سيدورەنكو گول سوقتى.

ۇلتتىق قۇرامانىڭ ويىندار تاريحىنا زەر سالار بولساق, بۇل قازاقستان فۋتبولىنداعى تۇڭعىش جاعداي ەمەس ەكەنىن اڭعارامىز. 2012 جىلدىڭ تامىزىندا الماتىداعى ورتالىق ستاديوندا دا ميروسلاۆ بەرانەك باپتاعان ۇلتتىق قۇرامامىز سول كەزدەگى قپل لەگيونەرلەر كومانداسىمەن كەزدەسكەن ەدى. تارتىستى وتكەن ماتچتا 4 گول سوعىلىپ, 15 مىڭ جانكۇيەردىڭ كوڭىلىنەن شىققان ويىن بولعان-تىن.

قازاقستان – لەگيونەرلەر اراسىنداعى ويىننىڭ رەسمي حاتتاماسى:

قازاقستان قۇراماسى: قاقپاشى – مۇحامەدجان سەيسەن, قورعاۋشىلار – دميتري شومكو, تەمىرلان ەرلانوۆ, الەكساندر ماروچكين, ادىلبەك جۇماحانوۆ, باعدات قايىروۆ, جارتىلاي قورعاۋشىلار – اسحات تاعىبەرگەن, سەرىكجان مۇجىقوۆ (كاپيتان), ارمان كەڭەسوۆ, شابۋىلشىلار – ورالحان ومىرتاەۆ, ابىلايحان جۇمابەك.

ەكىنشى تايمداعى قۇرام: قاقپاشى – بەكحان شايزادا, قورعاۋشىلار – سەرگەي مالىي, دىنمۇحامەد قاشكەن, ساعا­دات تۇرسىنباي, ماقسات تايكەنوۆ, الىبەك قاسىم, نۇر­لان دايىروۆ, جارتىلاي قورعاۋشىلار – يسلامبەك قۋات, ەلحان استانوۆ, شابۋىلشىلار – ستانيسلاۆ باسمانوۆ, ابات ايىمبەتوۆ.

لەگيونەرلەر قۇرامى: قاقپاشى – ماركو ميلوشەۆيچ («استانا»), قورعاۋشىلار – ەۆگەني كوزلوۆ («قىزىلجار»), الي گادجيبەكوۆ («اقسۋ»), تاراس بوندارەنكو («كاسپي»), برۋنو («ورداباسى»), جارتىلاي قورعاۋشىلار – سەرگەي تيحونوۆ­سكي («قىزىلجار»), راتي ارزاداشۆيلي («اق­جايىق»), شافيك تيگرۋدجا («كاسپي»), شابۋىلشىلار – ەيدەر كوستا («تاراز»), سيموناس ۋربيس (كلۋبسىز), رافاەل وليۆەيرا («قىزىلجار»).

قوسالقى قۇرام: قاقپاشى – سەرگەي ليتوۆچەنكو («ماقتاارال»), قورعاۋشىلار – يسلام جيلوۆ («اقسۋ»), پلامەن ديموۆ, ۆلاديمير گينيايتيس (ەكەۋى دە – كلۋبسىز), جارتىلاي قورعاۋشىلار – تودور پەتروۆيچ («اتىراۋ»), پارو يۋسۋف (كلۋبسىز), نيكيتا مالياروۆ («اقتوبە»), اناتولي كاتريچ («اتىراۋ»), راسامبەك احماتوۆ («ماقتاارال»), شابۋىلشىلار – كيريلل سيدورەنكو («قىزىلجار»), كوروما. باس باپكەر – اندرەي كارپوۆيچ.

ايتا كەتەيىك, ناۋرىزدىڭ سوڭىندا قازاقستان قۇراماسى ۇلتتار ليگاسى اياسىندا مولدوۆامەن ەلەكتىك ويىن وتكىزەدى. سول ماتچتا جەرلەستەرىمىز جەڭىسكە جەتسە, س ليگاداعى ورنىن ساقتاپ قالادى, ەگەر جەڭىلىپ قالسا, D ليگاعا ءتۇسىپ قالادى.