بيلىكسىز پارلامەنت
ۇلىبريتانيادا وتكەن پارلامەنت سايلاۋىندا كۇتكەندەگىدەي 13 جىل بيلىكتە بولعان لەيبوريستەر پارتياسى جەڭىلىس تاپتى. بىراق جەڭىسكە جەتكەن كونسەرۆاتورلار پارتياسىنىڭ دا جەكە-دارا ۇكىمەت قۇرۋعا مۇمكىندىگى جوق. پارلامەنتتەگى 650 ورىننىڭ 305-ءى كونسەرۆاتورلارعا, 255-ءى لەيبوريستەرگە, 61-ءى لەيبەرال-دەموكراتتارعا ءتيىپ وتىر.
ەندى ماسەلە كواليتسياعا بارىپ تىرەلەدى. لەيبوريستەر مەن كونسەرۆاتورلار وداقتاسپايتىنى انىق. ۇكىمەت تاعدىرىن ليبەرال-دەموكراتتاردىڭ كىممەن وداقتاساتىنى شەشپەك. الدا-جالدا كواليتسيا قۇرۋدىڭ ءساتى تۇسپەسە, جاڭا پارلامەنت سايلاۋى وتۋگە ءتيىس.
گرەكتەر قىسپاقتا
گرەكيا داعدارىس قۇشاعىندا. باسقالارعا قارىزدار, قارجىسى تاپشى. سوعان وراي جالاقىنى, زەينەتاقىنى قىسقارتپاق. امال جوقتىقتان. كوپ ادام ونى تۇسىنگىسى جوق. ۇكىمەت قىساستىقپەن جاساپ جاتقانداي كورەدى. ءسويتىپ, قارسىلىق ءبىلدىرىپ جاتىر. قارسىلىق بولعاندا, الدەكىمدەردىڭ ارانداتۋلارىمەن جاستار قول جەتكەندى قيراتىپ, جاناتىندى ورتەۋگە كىرىستى. سونداي-اق ەلدە جاپپاي ەرەۋىلگە شىعۋ ءورىس الدى. ونى ۇيىمداستىرعان كاسىپوداقتاردىڭ مالىمدەۋىنشە, وعان 100 مىڭنان استام ادام قاتىسقان.
ۋكرايندىقتار توبەلەسكىش
اعايىندى بوكسشىلار كليچكولاردى الەم جۇرتشىلىعى بىلەدى. ولار الەمگە ۋكراينداردىڭ قالاي توبەلەسە الاتىنىن تانىتقان. ءسىرا ولاردان دەپۋتاتتار مەن شەنەۋنىكتەر دە قالىسقىسى جوق. جاقىندا پارلامەنتتەگى توبەلەستى تالاي كۇن تەلەارنالاردان بۇكىل الەم تاماشالاسا, كۇنى كەشە ەكونوميكا ءمينيسترى ۆاسيلي تسۋشكو وزىنە كەلگەن وپپوزيتسيونەر دەپۋتات انتون ياتسەنكونى يەكتەن ۇرىپ, سۇلاتىپ سالىپتى. سەبەبى, ايقىن ەمەس – ءسوزىن وتكىزە الماعان دەپۋتات, قانداي نيەتپەن ەكەنىن ءوزى بىلەدى, مينيسترگە تۇرا ۇمتىلسا كەرەك, سوندا كابينەت يەسى قارسى سوققى جاساعان كورىنەدى.
ءتىل تابىسۋعا جاقىن
ەكى ايعا جۋىق قاسارىسقان قارسىلىقتان كەيىن تايلاند وپپوزيتسياسىنىڭ باسشىلىعى بيلىكتىڭ ۇسىنىستارىن قاراۋعا كىرىستى. پرەمەر-مينيستر ابحيسيت ۆەتچاچيۆانىڭ ۇكىمەتى قاراشا ايىندا سايلاۋ وتكىزۋدى ۇسىنىپ وتىر. ال وپپوزيتسيا بۇعان دەيىن ۇكىمەتتىڭ قىزمەتتەن كەتۋىن, پارلامەنتتى تاراتۋدى تالاپ ەتكەن بولاتىن. ۇكىمەت بەلگىلى دارەجەدە ىڭعايعا جىعىلسا, بۇل ەڭ الدىمەن ادامداردىڭ قۇرباندىعىنا جول بەرمەۋدى ويلاعانى انىق. بۇعان دەيىن قاقتىعىستان 27 ادام قازا تاپقان ەدى. دەگەندە, وپپوزيتسيانىڭ حالىق سايلاعان پارلامەنتتى تاراتۋدى تالاپ ەتۋىن نەگىزدى دەۋگە كەلمەيدى.
بانكير – قىلمىسكەر
وسىدان بىرنەشە جىل بۇرىن عانا يسلانديا الەمدەگى ەڭ تۇراقتى, ادام ءومىر سۇرۋىنە ەڭ قولايلى ەلدەردىڭ ءبىرى سانالاتىن. سودان الەمدىك داعدارىس دەندەگەندە, ەڭ الدىمەن قىسپاققا تۇسكەن دە يسلانديا بولدى. شاعىن ەلدىڭ جەتەكشى – ءۇش بانكتىڭ قارىزى 61 ميلليارد دوللارعا جەتىپ, ۇكىمەت ولاردى مەملەكەت يەلىگىنە الۋعا ءماجبۇر بولدى. سول ءۇش بانكتىڭ ەڭ ءىرىسى ءKauptىngتىڭ كۇيرەۋىنە تەك داعدارىس قانا ەمەس, ونىڭ جەتەكشىسى حەيدار مار سۋگۋردسسون دا ايىپتى ەكەن. ول قۇجاتتاردى قولدان جاساپ, بيرجادا الدامشى ويىندار وتكىزىپ, تاعى باسقا قۋلىق-سۇمدىقپەن ءبىراز بانك قارجىسىن جىمقىرىپتى. ەندى بانكير تۇتقىنعا الىنىپ وتىر.
ۇلتى كورسەتىلمەيدى
بۇدان بىلاي رەسەيلىك تولقۇجاتتاردا يەسىنىڭ ۇلتىن كورسەتەتىن گرافا بولمايدى. نەگە بۇلاي دەپ ايقايلاعاندار بولعان ەكەن, وعان ەلدىڭ كونستيتۋتسيالىق سوتى زاڭدىق تۇرعىدا ءبىر ۇلتتىڭ وكىلى بولۋ رەسەي ازاماتتىعىن الۋعا ىقپال ەتپەيدى دەپ جاۋاپ بەرىپتى. ەندى مەن اعا ۇلتتىڭ وكىلىمىن. مەملەكەت قۇراۋشى ۇلتتىڭ وكىلىمىن دەپ ەشكىمنىڭ باسقالارعا قوجاڭداۋىنا جول بەرىلمەيدى.
ماويستەردىڭ تالابى
نەپالدا ماويستىك ۇيىمداردىڭ باستاماسىمەن باستالعان قارسىلىق اكتسياسى بارعان سايىن كەڭ ەتەك الىپ وتىر. ولار ۇكىمەتتىڭ كەتۋىن تالاپ ەتەدى. جاپپاي ەرەۋىلدىڭ سالدارىنان دۇكەندەر, تاماقتاندىرۋ ورىندارى عانا ەمەس, كاسىپورىندار دا جۇمىسىن توقتاتىپتى. مەكتەپتەر دە, مەملەكەتتىك مەكەمەلەر دە جابىلعان كورىنەدى. وسىعان قاراعاندا, ەلدە ماويستەردىڭ ىقپالى ايتارلىقتاي ەكەنىن اڭعاراسىڭ.
ازىرلەگەن ماماديار جاقىپ.