قاراعاندى وبلىسىندا قىسقى ۇبت 25 قاڭتار مەن 22 اقپان ارالىعىندا قاراعاندى, بالقاش جانە جەزقازعان قالالارىندا وتەدى. ماماندار تەستىلەۋدىڭ بارلىق سانيتارلىق-ەپيدەميالىق شارالاردى ساقتاي وتىرىپ ۇيىمداستىرىلاتىنىن ايتىپ وتىر.
ماسەلەن, كوروناۆيرۋس ينفەكتسياسىنىڭ تارالۋ قاۋپىن ازايتۋ ءۇشىن تەستىلەۋ پۋنكتتەرىندە تۇلەكتەر مىندەتتى تۇردە ماسكا تاعۋى كەرەك. تەرمومەتريا دا جۇزەگە اسىرىلادى. سونىمەن قاتار تەست سىناعىن وتكىزۋگە جاۋاپتى ماماندار بارلىق پۋنكتتەردىڭ سانيتايزەرلەرمەن, شەكتەۋ لەنتالارىمەن, دەزينفەكتسيالاۋ كىلەمشەلەرىمەن جابدىقتالعانىن ايتادى. ءاربىر اۋديتوريادا پايدالانىلعان ماسكالارعا ارنالعان قوقىس جاشىكتەرى, رەتسيركۋلياتورلار جانە باكتەريتسيدتى شامدار ورناتىلعان.
ۇلتتىق تەستىلەۋ ورتالىعى قاراعاندى فيليالىنىڭ باسشىسى دينارا بايماعامبەتوۆا 2021 جىلدان باستاپ ۇبت ء«بىر كومپيۋتەر – ءبىر كامەرا – ءبىر تەست تاپسىرۋشى» قاعيداتى بويىنشا ەلەكتروندى فورماتتا وتكىزىلە باستاعانىن تاعى ءبىر مارتە ەسكە سالدى.
بيىل تەستىلەۋ سىناعىندا وبلىس بويىنشا 5 مىڭعا جۋىق تالاپكەر باق سىناپ كورمەك. تىركەلۋ كەزىندە تۇلەكتەرگە ۇبت تاپسىرۋ كۇنىن, ۋاقىتىن جانە ورنىن وزدەرىنىڭ تاڭداۋىنا قۇقىق بەرىلگەن.
دينارا بايماعامبەتوۆا تەستىلەۋ كەزىندە ۇبت وتكىزۋ پۋنكتىنىڭ اۋماعىندا اتا-انالاردىڭ, مۇعالىمدەردىڭ جانە باسقا دا ادامداردىڭ بولۋىنا جول بەرىلمەيتىنىن ايتادى.
– اۋديتوريالارعا تەست تاپسىرۋشىلاردى قاشىقتىقتى ساقتاي وتىرىپ, بارريكادالىق تاسپالار ارقىلى كەزەك-كەزەكپەن وتكىزەدى. تۇلەكتەر ءبىر-بىرىنەن كەمىندە ءبىر مەتر قاشىقتىقتا وتىرعىزىلادى. ءاربىر تەستىلەنۋشىنىڭ ورگانيكالىق شىنىمەن قورشالعان ءوز ورنى بولادى, – دەيدى ول.
جالپى, تەست سىناعىندا تۇلەكتەرگە 120 سۇراق بەرىلەدى. ۇمىتكەر ءاربىر ءپان بويىنشا كەمىندە بەس بالل جيناۋى ءتيىس. ولاردىڭ دۇرىس جاۋاپتارى 140 بالل بولىپ ەسەپتەلەدى. ياعني مامانداندىرىلعان پاندەردە كەيبىر سۇراقتار 0-دەن 2 باللعا دەيىن, ال قالعان سۇراقتار ءبىر باللمەن باعالانادى.
ءبىلىم بەرۋ گرانتىن بەرۋ جونىندەگى كونكۋرسقا قاتىسۋ ءۇشىن نەمەسە اقىلى نەگىزدە وقۋعا قابىلدانۋ ءۇشىن تۇلەكتەرگە قاجەتتى شەكتى بالدار بەلگىلەنگەن. مىسالى, «پەداگوگيكالىق عىلىمدار» ءۇشىن كەمىندە 75 بالل بولۋى كەرەك. «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» سالاسىنا تىرناق ىلىكتىرۋگە كەمىندە 65 بالل كەرەك. «اۋىل شارۋاشىلىعى جانە بيورەسۋرستار» جانە «ۆەتەريناريا» ماماندىقتارىن تاڭداعاندارعا كەمىندە 60 بالل جيناعانى ءجون. ال ۇلتتىق جوعارى وقۋ ورىندارىنا, سونداي-اق باسقا جوعارى وقۋ ورىندارىنىڭ ستۋدەنتى اتالۋى ءۇشىن تۇلەكتەر, سايكەسىنشە, كەمىندە 65 بالل جانە 50 بالل الۋى كەرەك.
قاراعاندى وبلىسى