بۇۇ بالالار قورىنىڭ (يۋنيسەف) قازاقستانداعى كەڭسەسى Astana Hub IT ستارتاپتار حالىقارالىق تەحنوپاركىمەن بىرلەسىپ, ەلىمىزدىڭ 11 وبلىسىندا 12 مىڭنان استام مۇعالىمدى ارالاس فورماتتا تسيفرلى ينكليۋزيۆتى ءبىلىم نەگىزدەرىن وقىتۋدى جوسپارلاپ وتىر. وقىتۋ ءبىلىم جانە عىلىم مينيسترلىگىنىڭ وبلىستىق باسقارمالارىمەن جانە ءبىلىم دەپارتامەنتتەرىمەن بىرلەسىپ جۇزەگە اسادى. ترەنينگكە قالالىق جانە اۋىلدىق مەكتەپتەردىڭ مۇعالىمدەرى قاتىسادى. بۇگىنگى تاڭدا كۋرسقا ون مىڭنان استام تىڭداۋشى تىركەلدى.
«COVID-19 پاندەمياسى ەڭ وسال بالالارعا – ەرەكشە ءبىلىم بەرۋ قاجەتتىلىكتەرى بار بالالارعا بىلىمگە قولجەتىمدىلىكتى شەكتەۋ جانە قاشىقتان وقىتۋعا كوشۋدەن ەڭ كوپ زارداپ شەگەتىنىن انىق كورسەتتى. ءبىزدىڭ ماقساتىمىز – ولاردىڭ قاجەتتىلىكتەرىنە قاراماستان ءار بالاعا بىردەي قولجەتىمدى ءبىلىم بەرۋ پروتسەسىن قولداۋ. تسيفرلى تەحنولوگيا قولدانىسىمەن جۇزەگە اساتىن ارالاس فورمات وقۋ ۇدەرىسىن يكەمدى جانە ءبىلىم بەرۋ ورتاسىن بەيىمدەلگىش ەتەدى. بىراق مۇندا مۇعالىمدەردىڭ بىلىكتىلىگى مەن ءبىلىمى باستى ءرول اتقارادى. سوندىقتان Astana Hub-پەن بىرلەسە وتىرىپ, كوپتەگەن مۇعالىمدى جاڭا ساندىق قۇرالدارعا ۇيرەتە الاتىنىمىزعا قۋانىشتىمىن», دەدى يۋنيسەف-ءتىڭ قازاقستانداعى وكىلى ارتۋر ۆان ديزەن.
ارالاس فورمات – ارنايى اقپاراتتىق تەحنولوگيالاردى پايدالانا وتىرىپ, سىنىپتا وقىتۋدىڭ ءداستۇرلى فورمالارىن بىرىكتىرۋدى كوزدەيتىن زاماناۋي ءبىلىم بەرۋ ءتاسىلى. قازاقستاندىق مۇعالىمدەرگە ارنالعان ارالاس فورماتتاعى تسيفرلى ينكليۋزيۆتى ءبىلىم بەرۋ كۋرسى Okoo.kz ءبىلىم بەرۋ پلاتفورماسىندا وتۋدە. كۋرس تىڭداۋشىلاردىڭ ءبىرىنشى توبى «ينكليۋزيا» تەرمينىن, قالىپتاسقان قاعيدالار مەن قاتە تۇسىنىكتەردى زەرتتەي باستادى. وعان قوسا ولار ەرەكشە ءبىلىم بەرۋ قاجەتتىلىكتەرى بار بالالاردى وقۋعا تارتۋدىڭ جاڭا تەحنولوگيالارىمەن تانىسادى.
ولار مەكتەپتە قولايلى جاعداي جاساۋ ءۇشىن ءارتۇرلى تسيفرلى قۇرالدى پايدالانا وتىرىپ, قاشىقتان جانە ينتەراكتيۆتى ساباقتاردى ۇيىمداستىرۋ ادىستەرىن زەرتتەيدى.
«تسيفرلى تەحنولوگيالار تسيفرلى ءبىلىم بەرۋدى قولجەتىمدى جانە ينكليۋزيۆتى ەتۋ سياقتى جاھاندىق ماسەلەلەرگە اسەر ەتە الاتىنى قۋانتادى. بولاشاقتا IT-تەحنولوگيالار ەرەكشە ءبىلىم بەرۋ قاجەتتىلىكتەرى بار بالالاردىڭ وقۋ باعدارلاماسىنا قاتىسۋىنا كەدەرگى كەلتىرەتىن بارلىق كەدەرگىنى تولىعىمەن جەڭۋگە كومەكتەسەدى دەپ سەنەمىز», دەدى Astana Hub IT-ستارتاپ تەحنوپاركىنىڭ باس ديرەكتورى ماعجان ماديەۆ.
كۋرس اياسىندا مۇعالىمدەر Mural, Padlet, ZOOM, Canva, Kahoot جانە ت.ب. قۇرالداردى پايدالانۋدى ۇيرەنەدى.
ءبىلىم جانە عىلىم مينيسترلىگىنىڭ مالىمەتتەرىنە سايكەس 2020 جىلدىڭ 1 قاڭتارىنداعى جاعداي بويىنشا قازاقستاندا 161 826 ەرەكشە ءبىلىم بەرۋدى قاجەت ەتەتىن بالا تۇرادى, ولار ءۇشىن 99 ارنايى مەكتەپ قۇرىلدى, وندا 15 مىڭ بالا وقيدى. سونداي-اق 42 مەكتەپكە دەيىنگى ارنايى ۇيىم بار. قالعان بالالار ينكليۋزيۆتى ورتادا جالپى ءبىلىم بەرەتىن مەكتەپتەردە وقىتىلادى.