پرەزيدەنت قاسىم-جومارت توقاەۆ پارلامەنت ءماجىلىسى وتىرىسىنداعى سويلەگەن سوزىندە شەتەلدىك وقۋ ورىندارىنىڭ 5 فيليالىن اشۋ كەرەك ەكەنىن ايتتى. سوعان بايلانىستى تارقاتاتىن بولساق, شىن مانىندە دە ءبىز ءوز سورپامىزدا ءوزىمىز قايناپ, ءالى كۇنگە دەيىن ىشىمىزدەگى قالىپتاسقان جوعارى وقۋ ورىندارىن حالىقارالىق دەڭگەيگە شىعارا العان جوقپىز.
كيمەپ نەمەسە نازارباەۆ ۋنيۆەرسيتەتى بولسىن, ءبارى شەتەلدىك عالىمداردىڭ, شەتەلدىك ءبىلىم بەرۋ مەنەدجمەنتىنىڭ وزىق ۇلگىلەرىندە بولماسا دا, زاماناۋي ۇلگىلەرگە ساي ىسكە اسىپ جاتىر. سوندىقتان ەندىگى اشىلاتىن وقۋ ورىندارى مىندەتتى تۇردە شەتەلدىك وقۋ ورىندارىنىڭ ۇلگىسىمەن, سولاردىڭ فيليالى رەتىندە اشىلعانى ءجون دەپ ويلايمىن. جانە ولار ءار وڭىردە بولسا, ارتىقتىق ەتپەيدى.
سونىمەن قاتار مەملەكەت باسشىسى «قازاقستان حالقىنا» قوعامدىق الەۋمەتتىك قورى قۇرىلاتىنىن اتاپ ءوتتى. بۇل مۇقتاج ازاماتتاردى جان-جاقتى قولداۋعا باعىتتالعان اۋقىمدى جوبا بولماق. اتالعان قور ەشبىر مەملەكەتتىك ورگانعا قارامايتىن, دەربەس, ناعىز حالىقتىق سيپاتتا بولادى. بىلىكتى باقىلاۋشىسى بار جاۋاپتى باسشى تاعايىندالىپ, قىزمەتى مەن بيۋدجەتى بۇقاراعا اشىق جۇرگىزىلەدى. «قازاقستان حالقىنا» قورىنا ەلىمىزدەگى ءىرى بيزنەس نىساندارى, اۋقىمدى كومپانيالار مەن اۋقاتتى تۇلعالار جۇيەلى تۇردە اۋدارىم جاساپ تۇرۋى ءتيىس. پرەزيدەنتتىڭ ايتۋىنشا, حالىق وزىنە تيەسىلى ۇلەستى الاتىن كەز جەتتى. وسى كەزدە بۇعان دەيىن ىسكە اسىپ كەلگەن «ۇلتتىق قور» نە بولادى, وندا قانشا قاراجات قالدى, ول قالاي جۇمىس ىستەيدى دەگەن زاڭدى سۇراق تۋىندايتىنى تاعى بار.
ۇلتىمىزدىڭ, مادەنيەتىمىزدىڭ تىرەگى قازاق ءتىلى ەكەنى انىق. قازاق تىلىنە بايلانىستى ءالى دە بولسا, جوعارعى بيلىكتە تۇبەگەيلى, ناقتى ۇستانىم جوق. ءالى دە بولسا جالتاقتاۋ, ءالى دە بولسا قازاق ءتىلىن باسقا دا ءبىر ساياسي-ەكونوميكالىق مۇددەلەرگە قۇرباندىققا شالۋ بولىپ وتىر. سوندىقتان وسىعان بايلانىستى كوڭىل تولارلىقتاي جاعداي جوق.
ءتالىم-تاربيە, ءبىلىم بەرۋدىڭ ناقتى ينسترۋمەنتتەرىنىڭ ءبىرى – سپورت. مىسالى, سپورتقا بايلانىستى ءالى دە بولسا قوردالانعان ماسەلەلەر كوپ. ولاردىڭ ىشىندە جاتتىقتىرۋشىلاردىڭ جەتىسپەۋشىلىگى, قازىرگى بار باپكەرلەردىڭ باسىم بولىگى – ءورىستىلدى ماماندار. سوندىقتان بۇگىنگى تاڭدا ەلوردادا نەمەسە باسقا ءبىر ءىرى قالادا, مۇمكىن ءبىر ورتالىقتا بولا ما ەكەن, قازاق ۇلتتىق سپورت اكادەمياسى اشىلۋى كەرەك. جانە ول جەردەگى ءبىلىم بەرۋ باعدارلامالارى تەك قانا دەنەشىنىقتىرۋ ءپانىنىڭ مۇعالىمى ەمەس, جاتتىقتىرۋشى دەگەن بىلىكتىلىك بەرەتىندەي باعدارلامالار بولسا ەكەن. وسىعان كىرىسەتىن ۋاقىت جەتتى دەپ ويلايمىن.
پرەزيدەنت ءوز سوزىندە اسكەري كۇشتەردىڭ, ارنايى جاساقتاردىڭ جۇمىسىن رەفورمالاۋ, جاڭا باعىتتا جۇمىس جۇرگىزۋ سياقتى ماسەلەلەردى كوتەردى. بۇل دۇرىس. وسىنى پايدالانىپ بۇگىندە قاجەتسىز, ۇرىس-سوعىس كەزىندە تۇك پايداسى جوق اۋىر تەحنيكا سياقتى سالالارعا وڭتايلاندىرۋ كەرەك. بۇل رەتتە شەكارانى كۇشەيتۋ, بارلاۋ قىزمەتتەرىنە باسا نازار اۋدارىلۋى ءتيىس.
جالپى, قورىتىندىلايتىن بولساق, مەنىڭ ويىمشا حالىق كەشەگى جيىنعا قۇلاعىن ءتۇرىپ, تۇبەگەيلى وزگەرىستەر بولادى دەپ كۇتكەن سياقتى. پرەزيدەنت ەلدىڭ ارقاسىندا بايلىققا كەنەلگەندەر تۋرالى قاتاڭ دا, قاتال ويلارىن جەتكىزدى. بۇل اقيقات. وتىز جىل قازىنامىز ۇستاعاننىڭ قولىندا, تىستەگەننىڭ اۋزىندا كەتتى. ەندى وسىعان توسقاۋىل بولۋى كەرەك دەپ ويلايمىن.
رامازان ساتتار ۇلى,
الەۋمەتتانۋشى