تەننيستەن ەلىمىزدىڭ ءبىرىنشى راكەتكاسى ەلەنا رىباكينا جاڭارتىلعان الەمدىك رەيتينگتە ءبىر ساتى جوعارىلاپ, ءوزىنىڭ جانە قازاقستاننىڭ جەكە رەكوردىن جاڭارتتى.
بۇعان دەيىن دۇنيەجۇزىلىك رەيتينگتە 14-ورىندا تۇرعان ەلەنا رىباكينا كۇنى كەشە جاڭارعان ەڭ ۇزدىك تەننيسشىلەردىڭ تىزىمىندە 13-ساتىعا جايعاسىپ, ۇزدىك وندىققا جاقىنداي ءتۇستى. وسىدان بىرەر كۇن بۇرىن ول اۋستراليادا مارەسىنە جەتكەن ءتۋرنيردىڭ فينالىندا باق سىناپ, باس جۇلدە ءۇشىن وتكەن باسەكەدە الەمنىڭ 1-راكەتكاسى, اۋستراليالىق ەشلي بارتيدەن ەكى سەتتە 6:3, 6:2 ەسەبىمەن جەڭىلىپ قالعان ەدى. سونداي-اق جاڭارعان رەيتينگتە يۋليا پۋتينتسەۆا 43-ساتىدا بولسا, زارينا دياس 102-دەن 108-ورىنعا سىرعىدى.
ەرلەر اراسىندا قازاقستاننىڭ ءبىرىنشى راكەتكاسى الەكساندر بۋبليك 35-ورنىن ساقتاپ قالدى. ال دميتري پوپكو 180-نەن 177-گە, ميحايل كۋكۋشكين 182-دەن 180-گە كوتەرىلدى.