جالپى جۇرتتىڭ, ونىڭ ىشىندە جاستاردىڭ سپورتپەن اينالىسۋى قۇپتارلىق جاعداي. حالقىمىز ەجەلدەن ۇستانعان سالاماتتى ءومىر سالتى بۇگىندە جالعاسىن تاۋىپ, جاڭا دەڭگەيگە كوتەرىلەدى. ەلىمىزدىڭ ءاربىر اۋدان, اۋىلدارىندا بۇگىندە سپورت نىساندارى كوپتەپ سالىنىپ, مەملەكەت تاراپىنان ءتيىستى كومەك كورسەتىلىپ جاتىر. ناتيجەسىندە, كوپتەگەن جاس سپورت سالاسىندا جەتىستىكتەرگە جەتىپ, ەل مەرەيىن اسىرۋدا. مەملەكەت باسشىسى قاسىم-جومارت توقاەۆ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى بىلتىرعى جولداۋىندا «جۇرتتىڭ جانە بالالاردىڭ سپورتپەن شۇعىلدانۋىنا جاعداي جاسالۋى قاجەت ەكەنىن تاعى دا قايتالاپ ايتامىن», دەگەن بولاتىن.
سونىمەن قاتار «وبلىس اكىمدەرى سپورت ينفراقۇرىلىمىن بىرتىندەپ سالۋدى قامتاماسىز ەتۋگە ءتيىس», دەپ تاپسىرما دا بەرگەن. پرەزيدەنت تاپسىرماسىنا سايكەس, جامبىل وڭىرىندە دە سپورت سالاسىنا ءتيىستى كوڭىل ءبولىنىپ كەلەدى. كەزىندە اتاقتى جاقسىلىق ۇشكەمپىروۆتەن باستاپ, وليمپيا ويىندارىنىڭ تالاي جەڭىمپازدارى شىققان اۋليەاتا جەرىندە سپورت سالاسى ايتارلىقتاي دامىپ كەلەدى.
بۇگىندە وبلىس بويىنشا 4 524 سپورت سەكتسياسى جۇمىس اتقارۋدا. 2020 جىلمەن سالىستىرعاندا سەكتسيا سانى 188-گە وسكەن. سونداي-اق ايماق بويىنشا 51 سپورت مەكەمەسى بار.
«اتالعان ارنايى سپورت مەكەمەلەرىندەگى سپورتتىق سەكتسيالاردا بۇگىندە 29 219 سپورتشى شۇعىلدانۋدا. بۇل سپورتشىلاردىڭ ىشىندە 20 450 ازامات اۋدان سپورتشىلارى بولىپ سانالادى. اتالعان سپورتشىلارمەن 1 045 وقىتۋشى-جاتتىقتىرۋشى جۇمىس ىستەيدى», دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ.
جالپى, وبلىستىڭ سپورت مەكەمەلەرىندە سپورتتىڭ 72 ءتۇرى قامتىلعان. ونىڭ ىشىندە بوكس, دزيۋدو, ەركىن كۇرەس, گرەك-ريم كۇرەسى, كاراتە, تاەكۆوندو, جەڭىل اتلەتيكا, فۋتبول, ءجۇزۋ, ۆەلوسپورت, باسكەتبول, سۋ دوبى سياقتى بارلىعى 25 وليمپيادالىق جانە سپورتتىق اكروباتيكا, ارمرەستلينگ, گىر سپورتى, دويبى, كيكبوكسينگ, شاحمات, بەلبەۋ كۇرەسى سياقتى وليمپيادالىق ەمەس 19 ويىن ءتۇرى بار. سونىمەن قاتار وڭىردە سپورتشىلار قازاق كۇرەسى, كوكپار, اۋدارىسپاق, توعىزقۇمالاق, اسىق اتۋ سياقتى بارلىعى 10 ۇلتتىق ويىنمەن جانە 8 پاراليمپيادالىق, 7 سۋردليمپيادالىق, 3 پاراليمپيادالىق ەمەس سپورت تۇرلەرىمەن دە شۇعىلدانادى.
نۇربول جۇنىسبەكوۆ بۇقارالىق سپورتتى دامىتۋ جانە بالالار مەن جاسوسپىرىمدەردى دەنە شىنىقتىرۋعا تارتۋ ماقساتىندا بىلتىر 1 مامىردان باستاپ مەملەكەتتىك شىعارماشىلىق جانە سپورتتىق تاپسىرىستاردى جۇزەگە اسىرۋ بويىنشا جۇمىستار باستالعانىن ايتتى.
«مەملەكەتتىك سپورتتىق تاپسىرىستى ىسكە اسىرۋ ماقساتىندا بىلتىر جەرگىلىكتى بيۋدجەتتەن 142 ملن 328 مىڭ تەڭگە قاراستىرىلىپ, سپورتتىڭ شاحمات, فۋتبول, تاەكۆوندو, كاراتە, دزيۋدو, ەركىن كۇرەس, ۆولەيبول, ءجۇزۋ, باسكەتبول, فۋتزال, گرەك-ريم كۇرەسى, بوكس, قازاق كۇرەسى, اۋىر اتلەتيكا, سپورتتىق بي, ۇستەل تەننيسى, پاۋەرليفتينگ سياقتى 17 تۇرىنەن 10 998 بالا سپورتقا تارتىلدى», دەيدى ول.
جالپى, جامبىل ءوڭىرىنىڭ سپورت سالاسىندا مەملەكەت قولداۋىنىڭ ناتيجەسى دە بار. بىلتىر توكيو قالاسىندا وتكەن ءحححIى جازعى وليمپيا ويىندارىنا وبلىستىڭ 5 سپورتشىسى ليتسەنزيا جەڭىپ العانى دا ۇلكەن ماقتانىش. بوكسشى ءابىلحان امانقۇل, دزيۋدوشى ەلدوس سمەتوۆ, ەركىن كۇرەستەن الىشەر ەرعالي, سۋ دوبىنان التاي التاەۆ جانە تاەكۆوندودان رۋسلان جاپاروۆ الەمدىك دودادا باق سىنادى. ناتيجەسىندە, توكيو وليمپياداسىندا ەلدوس سمەتوۆ قولا مەدال يەگەرى اتاندى. ال XVI جازعى پاراليمپيادا ويىندارىنا دا ۇلتتىق قۇراما كومانداسى ساپىندا 4 جامبىلدىق سپورتشى سىنعا ءتۇسىپ, ناتيجەسىندە پاراجۇزۋدەن جۇماعالي نۇرداۋلەت قولا مەدالعا يە بولدى. بۇدان بولەك, وبلىس سپورتشىلارى ءتۇرلى رەسپۋبليكالىق جانە حالىقارالىق بايراقتى باسەكەلەردە 741 التىن, 562 كۇمىس, 611 قولا مەدال العان. بۇل جەتىستىكتەردىڭ بارلىعى دا ءوڭىر سپورتىنىڭ وركەندەۋىنە ايتارلىقتاي جول اشىپ وتىر.
ءبىلىم سالاسىنداعى باسەكەنى ارتتىرۋ دا زامان تالابى. اسىرەسە, جاستار ءۇشىن ونەر ۇيرەنۋ, عىلىم يگەرۋ سياقتى قۇندىلىقتار وتە قاجەت. بۇل رەتتە دە مەملەكەت تاراپىنان ءبىلىم بەرۋ سالاسىنا ءتيىستى كوڭىل ءبولىنىپ, ءبىلىم ساپاسى ارتۋدا. وبلىستىق ءبىلىم باسقارماسىنىڭ باس مامانى ەلميرا پەرنەبەكقىزى بۇگىنگى تاڭدا وڭىردە 76 قوسىمشا ءبىلىم بەرۋ مەكەمەلەرىنىڭ بار ەكەنىن, 4 584 ۇيىرمە جۇمىس ىستەيتىنىن ايتتى. ونىڭ ىشىندە 10 مەكەمە قالا سىرتىنداعى لاگەرلەردە بولسا, 58 مەكەمە – مەملەكەت مەنشىگىندە. سونداي-اق 7 مەكەمە جەكەمەنشىك ەسەبىندە تۇر ەكەن. قازىرگى كەزدە وبلىستا قوسىمشا ءبىلىم بەرۋ ۇيىرمەلەرىمەن 67 796 بالا قامتىلعان. بالالار دومبىرا تارتۋ, سۋرەت سالۋ, تەاترلاندىرىلعان كورىنىستەردى قويۋدى ۇيرەنۋ جانە تاعى دا باسقا ءوز قىزىعۋشىلىقتارى بويىنشا ۇيىرمەلەرگە قاتىسا الادى. ءاربىر ۇيىرمەگە جەتەكشى بەكىتىلگەن. ۇيىرمە قاتىسۋشىلارى جىل سايىن ءتۇرلى سالاداعى فەستيۆالدەرگە دە قاتىسىپ, جۇلدەلى بولىپ كەلەدى.
ءاربىر سالادان ناتيجە كۇتىلەتىنى انىق. مەملەكەت قولداۋىمەن وڭ ناتيجەگە قول جەتكىزىپ كەلە جاتقان ءوڭىر سپورتى مەن ءبىلىم سالاسى جاستاردى باسەكەگە قابىلەتتىلىككە باۋلۋدا ءتيىستى جۇمىستار اتقارىپ كەلەدى. ال وڭ ناتيجەنىڭ وڭ وزگەرىستەرگە باستايتىنى بەلگىلى.