كەشە تاۋەلسىزدىك سارايىندا وتان قورعاۋشىلار كۇنى مەن ۇلى جەڭىستىڭ 65 جىلدىعىنا ارنالعان سالتاناتتى شارا ءوتىپ, مەرەكەلىك كەش “ەرلىك پەن بىرلىك – ءداستۇر ساباقتاستىعى” كونتسەرتىنە ۇلاستى.
تاۋەلسىزدىك سارايىنىڭ ءىشى ادەتتەگىدەن وزگەشە ايشىقتالىپ, ساحنا تورىنە قوس مەرەكەنى ۇلىقتايتىن بەينەلەر بەدەرلەنىپ, ءبىر جاعىنا اقوردا مەن قازاق ەلىنىڭ قازىرگى قايسار دا ساق ساربازدارىنىڭ قىرانداي تۇلعالارى تۇعىرعا قونسا, ەكىنشى قاپتالىنا 1945 جىلعى جەڭىس پارادىنداعى ساردارلار كورىنىسى وتتى جىلدار جاڭعىرىعىن ەسكە سالىپ, ۇرپاقتار ساباقتاستىعىن پاش ەتكەندەي اسەر قالدىردى. كەۋدەسى قاھارماندىق پەن قايسارلىق رۋحىمەن ورلەنگەن, كەشەگى وتان ءۇشىن وت كەشكەن قاھارمانداردىڭ جۇرناعىنداي ەلەستەيتىن مايدانگەر ۇرپاق پەن بەيبىت ومىردە ەل ىرگەسى بەرىكتىگىن بەلسەنە قورعاعان قازاق ساربازدارى قاتار جايعاسىپ, وتان دەگەن ۇلى ۇعىمنىڭ قاي كەزدە دە, قاي بۋىننىڭ وكىلىنە دە ورتاق قۇندىلىق ەكەنى سەزىلدى.
مەرەكەلىك كەشتى جۇرگىزۋشى زالعا ەل پرەزيدەنتى نۇرسۇلتان نازارباەۆتىڭ كىرىپ كەلە جاتقاندىعىن حابارلادى. قازاقستاننىڭ مەملەكەتتىك تۋى ساحنا تورىنە كوتەرىلىپ, بايتاق ەلدىڭ كوگىلدىر بايراعى ءاسكەري اۋەنىمەن اسقاقتاي جەلبىرەدى. قازاق ەلىنىڭ ءانۇرانى اۋەلەپ, تاۋەلسىزدىك رۋحىمەن جىگەرلەنگەن قارت مايدانگەرلەر مەن اسكەري ءمارتەبەلەرى مەملەكەتتىك ناگرادالارمەن تولىقسىعان جاس ساربازدار سىمداي تارتىلىپ, قازاق دالاسىن اسقاقتاتقان سازدى قوسىلا شىرقاعان. قورعانىس ءمينيسترى ادىلبەك جاقسىبەكوۆ قوس مەرەكە جايىندا بايانداپ وتكەننەن كەيىن (ۆەدومستۆو باسشىسىنىڭ ءسوزى گازەتتە جەكە بەرىلىپ وتىر — رەد.), ەلدىك پەن ەرلىكتى, قايسارلىق پەن ورلىكتى ۇلىقتايتىن اندەر ۇلان-عايىر دالاعا قانات قاعىپ كەتە باردى. قورعانىس مينيسترلىگى ورتالىق ءانسامبلى, ەسترادالىق-سيمفونيالىق وركەسترى, ب.بايقاداموۆ اتىنداعى حور كاپەللاسى مەن كۇلاش بايسەيىتوۆا اتىنداعى ۇلتتىق وپەرا جانە بالەت تەاترى حورى (ديريجەرى – قازاقستاننىڭ ەڭبەك سىڭىرگەن قايراتكەرى ا.بەلياكوۆ) ا.الەكساندروۆتىڭ ايگىلى “سۆياششەننايا ۆوينا” ءانىن شىرقاپ, ەكراننان تالاي تاعدىردى وت پەن وققا ۇشىرعان, ادامزات تاريحىندا الاپات جويقىن شىعىنىمەن, قاسىرەت-قايعىسىمەن قان قاقساتقان سوعىستىڭ سولقىلداعان جاراسى جاريالانىپ جاتتى. رەسپۋبليكالىق كونكۋرستاردىڭ لاۋرەاتى ەركىن شۇكىمانوۆتىڭ ورىنداعان ر.ەلەباەۆتىڭ “جاس قازاق” ءانى ارقىلى بۇل مايداننان قازاق حالقىنىڭ دا از قاسىرەت تارتپاعانى باياندالدى. نۇرجان باجەكەنوۆ پەن ولەگ تاتاميروۆ شىرقاعان ر.بورانباەۆ پەن ق.جۇماعاليەۆتىڭ “باتىر باۋىرجان” ءانى كەيىنگى ءوسىپ كەلە جاتقان جاس ساربازداردى قاھارماندىققا ۇندەيتىن, سانالارىن شيراتاتىن ەكپىنىمەن ەرەكشەلەندى. كسرو-نىڭ حالىق ءارتىسى الىبەك دىنىشەۆ م.تولەباەۆ پەن ق.لەكەروۆتىڭ “توس مەنى, توس”, ا.نوۆيكوۆ پەن يا.شۆەدوۆتىڭ “سمۋگليانكا” اندەرىن قوڭىر ۇنىمەن سىزىلتقاندا, تەبىرەنبەگەن جان جوق ەدى. يگور بلاگودارنىي, ولەگ تاتاميروۆ پەن مۇرات نۇرعازيەۆ, د.تۋحمانوۆ پەن ۆ.حاريتونوۆتىڭ “دەن پوبەدى” ءانىن ورىنداپ, كەشەگى وق بوراعان وتتى جىلداردىڭ جاڭعىرىعىن ەسكە سالدى. “جاس ۇلان” مەكتەبىنىڭ كۋرسانتتارى ازات باباجانوۆ پەن ادىلەت قۇرماشوۆ ن.بەكەتاەۆتىڭ “جاس ۇلان” ءانىن ۇلبىرەگەن ۇندەرىمەن ۇزبەي شىرقاپ شىقتى.
قۇراما حور مەن ەسترادالىق-سيمفونيالىق وركەستر تارتقان ت.مۇحامەدجانوۆ پەن ۇ.ەسداۋلەتوۆتىڭ “زامان-اي” ءانى قازاق دالاسىنىڭ تاعى ءبىر قاسىرەتىنەن سىر شەرتتى. ءمادينا سادۋاقاسوۆا مەن ستەپانيدا باسيۋك ا.جۇبانوۆ پەن ن.بايمۇحامەدوۆتىڭ “اق كوگەرشىن” ءانىن “ەلىگاي” بالالار حورىمەن بىرلەسە شىرقاۋى جاستىق ءۇنىنىڭ جارىق ساۋلەسىندەي توڭىرەككە ساۋلە قۇيدى. قورعانىس مينيسترلىگى ورتالىق ءانسامبلىنىڭ انشىلەرى قايرات ءجۇنىسوۆ, قايىربەك بەردىباي, داۋرەن ءبايبورىنوۆ قازاقتىڭ ءوزىنىڭ ءتول اسكەري اندەر شەرۋىنەن ءۇزىندى ۇسىندى. قاراعاندى قالاسىنان كەلگەن “اۋەن” ءانسامبلى ءى.جاقانوۆ پەن ق.بەگمانوۆتىڭ “تەمىرتاۋ ءتۇنى” ءانىن سەلكەۋسىز سەزىممەن سەرپىلە ورىنداعان. ماقپال يسابەكوۆا مەن الماس كىشكەنباەۆتىڭ ت.مۇحامەدجانوۆ پەن ق.ءابىل جازعان “استانا كەشى” ءبىر كەزدەرگى قيىندىق پەن سوعىس ءورتىن ىعىستىرىپ, قازاقتىڭ كەڭ ساحاراسىندا بوي كوتەرىپ كەلە جاتقان ەڭسەلى قالاسىنا نازار تىكتىرگەندەي ەدى. قورعانىس مينيسترلىگى ورتالىق ءانسامبلىنىڭ ءانشىسى ەرمۇرات زەيىپحان “كوك تۋدىڭ جەلبىرەگەنى” انىمەن تاۋەلسىزدىك تۋىن اسپانداتىپ, ايبىندى قازاق اسكەرىنىڭ ايشىقتى ناقىشتارىن اسپەتتەگەن. قۇرمەت قاراۋىلى روتاسى مەن رەسپۋبليكالىق ۇلاننىڭ پرەزيدەنتتىك ۇرمەلى اسپاپتار وركەسترى قارۋ-جاراقتارىمەن ءتۇرلى قىزىقتى امالداردى العا توستى. ازامات جىلتىركوزوۆ پەن يگور بلاگودارنىي ل.حاميدي مەن د.ءابىلوۆتىڭ “وتانىم” ءانىن شىرقاۋمەن مەرەكەلىك كەشتى قورىتىندىلاپ, وتان-انا الدىنداعى قارىز بەن پارىزدىڭ ءار سارباز ءۇشىن بيىك قۇندىلىق ەكەنىن سەزدىرگەن. ساربازدارعا سامالا كەشتە ساۋمال اۋەن سىيلاعان ونەرپازداردىڭ قۇرمەتىنە مەملەكەت باسشىسى نۇرسۇلتان نازارباەۆتىڭ اتىنان سەبەت تولى ىقىلاس گ ۇلى تارتۋ ەتىلدى.
قاراشاش توقسانباي.