قۇرلىقتىق حوككەي ليگاسىندا (قحل) باق سىنايتىن ەلوردالىق «بارىستىڭ» ەڭ كوپ جالاقى الاتىن حوككەيشىسى داررەن ديتس كوماندادان كەتتى. شىققان تەگى كانادالىق سپورتشى كارەراسىن ماسكەۋدىڭ تسسكا كومانداسىندا جالعاستىراتىن بولدى.
28 جاستاعى كانادالىق حوككەيشى 2017 جىلى قازاقستانعا قونىس اۋدارىپ, «بارىستىڭ» جەيدەسىن كيگەن ەدى. ارادا ءبىر جىلدان اسا ۋاقىت وتكەن سوڭ ول قازاقستان ازاماتتىعىن الىپ, شايبالى حوككەيدەن ۇلتتىق قۇرامامىزدىڭ ساپىندا حالىقارالىق ارەنالاردا ويناي باستادى. «بارىس» ساپىندا وتكىزگەن سوڭعى بەس ماۋسىمنىڭ ىشىندە ديتس ءار جىلدارى قحل-ءدىڭ ەڭ ۇزدىك قورعاۋشىسى, ەڭ كوپ گول سوعاتىن قورعاۋشى-سۇرمەرگەن دەگەن اتاققا قول جەتكىزدى.
قازاقستان قۇراماسىنىڭ قورعاۋشىسى استانالىق كلۋب ساپىندا جالپى سانى 269 كەزدەسۋ وتكىزىپ, 174 ۇپاي (67+107) جينادى. داررەن ديتس «بارىستىڭ» ەڭ قىمبات ويىنشىسى رەتىندە ەستە قالماق. ءتۇرلى بونۋستار مەن سىياقىلاردى ەسەپتەمەگەندە, ديتس جىلىنا 100 ميلليون رۋبل (شامامەن 597 337 300 تەڭگە) كولەمىندە جالاقى الىپ كەلگەن ەدى.