بيىل ەسكى كولىكتەردى جويۋعا قابىلداۋ باعدارلاماسى جۇزەگە اسىرىلىپ كەلە جاتقان جىلداردان بەرگى رەكوردتىق ناتيجەگە قول جەتتى. 2021 جىلى قازاقستاندىقتار 50 005 كولىكتى جويۋعا تاپسىردى. ونىڭ 37 495-ءى – جەڭىل كولىك, 4 040-ى جولاۋشىلار كولىگى جانە 8 470-ءى – جۇك كولىگى. ىستەن شىققان ماشيناسىن جويۋعا تاپسىرعاندارعا بيىل 13,7 ملرد تەڭگە قاراجات تولەنگەن.
ەسكى كولىكتەردى جويۋعا قابىلداۋ باعدارلاماسى ىسكە قوسىلعان ۋاقىتتان بەرى قازاقستاندىقتاردان بارلىعى 214 932 كولىك قابىلداندى.
اۋىلشارۋشىلىق تەحنيكاسى بويىنشا بۇگىنگى تاڭدا 3 206 تەحنيكا تاپسىرىلدى. ونىڭ 2 348-ءى تراكتور, 858-ءى كومباين. 2021 جىلى اگروتەحنيكالاردى قابىلداۋعا بارلىعى 3 380 كۆوتا بولىنگەن بولاتىن.
باعدارلاما اياسىندا جەڭىل اۆتوكولىكتەرگە 210 مىڭ, جولاۋشى جانە جۇك كولىكتەرىنىڭ ساناتىنا قاراي 420 مىڭنان 630 مىڭ تەڭگەگە (126-216 اەك) دەيىن باعالانادى. اگروتەحنيكانى تاپسىرۋشىلارعا 560 مىڭنان 2 ملن تەڭگەنىڭ جەڭىلدىك سەرتيفيكاتى بەرىلەدى.
جەڭىلدىك سەرتيفيكاتى باعدارلاماسى بويىنشا 54 834 اۆتوكولىك قابىلداندى. اتالعان باعدارلامانىڭ ناتيجەسىندە وتاندىق وندىرۋشىدەن 29 853 جاڭا اۆتوكولىك ساتىپ الىندى.
ايتا كەتۋ كەرەك, جويۋعا تاپسىرىلعان كولىكتەردىڭ باسىم بولىگى 1970-90 جىلدارى شىققان ماشينالاردى قۇراپ وتىر.
ايماقتار بويىنشا كولىك تاپسىرۋدىڭ ۇزدىك بەستىگىن شىمكەنت, الماتى, تاراز, قاراعاندى, پاۆلودار قالالارى باستاپ تۇر.
ەسكە سالايىق, 2021 جىلدىڭ 1 جەلتوقسانىنان باستاپ جەڭىل, جولاۋشى جانە جۇك كولىكتەرىن قابىلداۋ ۋاقىتشا توقتاتىلدى. سەبەبى, بيىلعا مەجەلى كۆوتا تولىعىمەن يگەرىلىپ وتىر. ال اۋىل شارۋاشىلىعى تەحنيكاسى ەلەكتروندى كەزەككە سايكەس جىل سوڭىنا دەيىن قابىلدانادى. ەسكى كولىكتەردى قابىلداۋعا قاجەتتى كۆوتا بولىنگەننەن كەيىن 2022 جىلدىڭ قاڭتار ايىنان باعدارلاما قايتا ىسكە قوسىلادى دەپ كۇتىلۋدە, دەپ حابارلادى وكم وپەراتورىنىڭ ءباسپاسوز قىزمەتى.