قۇرمەتتى قازاقستاندىقتار!
بارشاڭىزدى ەلدىگىمىزدىڭ مەرەيلى بەلەسى – تاۋەلسىزدىكتىڭ 30 جىلدىعىمەن شىن جۇرەكتەن قۇتتىقتايمىن!
بۇل – ناعىز ەركىندىك پەن ەگەمەندىكتىڭ مەرەكەسى.
ءبىز تاۋەلسىزدىگىمىزدىڭ وسىناۋ تاريحي مەجەسىن عاسىرلارعا جۇك بولار زور جەتىستىكتەرمەن قارسى الىپ وتىرمىز. تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆتىڭ ستراتەگيالىق ساياساتىنىڭ ارقاسىندا بارلىق سالا جۇيەلى تۇردە دامىدى. شەكارامىز شەگەندەلدى, ەكونوميكامىز جۇيەلەندى, سىرتقى ساياساتىمىز سىندارلى جولعا ءتۇستى.
ەڭ باستىسى, وسى جىلدار ىشىندە مەملەكەتتىلىگىمىز تولىق قالىپتاستى. ءتول قۇندىلىقتارىمىز تورگە وزىپ, تاريحىمىز بەن مادەنيەتىمىز دارىپتەلدى. انا ءتىلىمىز ارداقتالىپ, ءدىلىمىز بەن ءدىنىمىز قايتا جانداندى. قازاقستان بۇكىل الەمگە تاتۋلىق پەن تۇراقتىلىقتىڭ, بەيبىتشىلىك پەن كەلىسىمنىڭ التىن بەسىگى رەتىندە تانىلدى.
ەلباسىنىڭ باتىل شەشىمىمەن ارقا تورىندە جاڭا استانامىزدى سالدىق. از ۋاقىتتىڭ ىشىندە بۇكىل تۇركى جۇرتى ءۇشىن كيەلى دە قاستەرلى مەكەن – تۇركىستاندى تۇلەتتىك. جالپى, 30 جىلدا ەلىمىزدىڭ بارلىق ءوڭىرى ءوسىپ-وركەندەدى. مۇنىڭ ءبارى – ەگەمەندىكتىڭ ارقاسىندا قول جەتكىزگەن جەڭىستەرىمىز بەن جەتىستىكتەرىمىز.
ەندى وسى باعىتتان اينىماي, تاۋەلسىزدىكتى ودان ءارى نىعايتۋ – ءبارىمىزدىڭ ەڭ باستى مىندەتىمىز. مەملەكەت باسشىسى قاسىم-جومارت كەمەل ۇلى توقاەۆتىڭ ساباقتاستىق پەن ورلەۋدى تۋ ەتكەن ساياساتى سونى كوزدەيدى.
شىن مانىندە, ءبىز ءۇشىن تاۋەلسىزدىكتەن ارتىق قۇندىلىق, ودان اسقان بايلىق جوق. تاۋەلسىزدىك ۇلتىمىزدى ۇيىستىردى, جۇرتىمىزدى جۇمىلدىردى, ابىرويىمىزدى اسقاقتاتتى. ەندىگى مىندەت – بارىمىزدى باعالاپ, جەڭىستى جولىمىزدى جالعاۋ. ول ءۇشىن تاتۋلىعىمىز بەرىك, بىرلىگىمىز بەكەم, تىرلىگىمىز تياناقتى بولۋعا ءتيىس. وسى جولدا ءبارىمىز بىرلەسىپ, ناتيجەلى ەڭبەك ەتە بەرەمىز دەپ سەنەمىن.
تاۋەلسىزدىگىمىزدىڭ 30 جىلدىعىمەن قۇتتىقتاي وتىرىپ, بارشاڭىزعا اماندىق پەن باق-بەرەكە تىلەيمىن. ەلدىگىمىز ەڭسەلى, ەگەمەندىگىمىز باياندى بولسىن! تاۋەلسىز قازاق ەلى جاساي بەرسىن!
مەيرام قۇتتى بولسىن!
ماۋلەن اشىمباەۆ,
قازاقستان رەسپۋبليكاسى پارلامەنتى سەناتىنىڭ توراعاسى