جامبىل اتىنداعى قازاق مەملەكەتتىك فيلارمونياسىندا ۇلتتىق مادەنيەتكە, ءداستۇرلى ءان ونەرىنە ولشەۋسىز ۇلەس قوسقان مايتالمان ءانشى, سازگەر, كۇيشى ماناربەك ەرجانوۆتىڭ 120 جىلدىعىنا وراي ء«ان سۇڭقار» اتتى كونتسەرت بولىپ ءوتتى.
ءبىراز جىلدار جامبىل اتىنداعى قازاق مەملەكەتتىك فيلارمونياسىنىڭ بەلدى ءسوليسى بولعان قازاقستاننىڭ حالىق ءارتىسى ماناربەك ەرجانوۆتىڭ ەرەكشە دومبىرا تارتۋ تەحنيكاسى وسكەلەڭ ۇرپاققا ۇنەمى ۇلگى بولدى. ءان ەركەسى م.ەرجانوۆ ۇلتتىق ونەردەگى ارقا ءان داستۇرىندە ءوز مەكتەبىن قالىپتاستىرىپ, جەتىسۋ اندەرىن ناقىشىنا كەلتىرە ورىنداعان. ونىڭ «جەتىسۋ», «شالقار كول», «اققۋ», «ورنەك», «اققىز», «بالالىق شاق», «بي» اتتى كۇيلەرى حالىق اراسىنا كەڭ تاراعان. ونىڭ شىعارعان كۇيلەرىنە نازار اۋدارىپ, العاش كاسىبي باعاسىن بەرگەن اكادەميك احمەت جۇبانوۆ بولاتىن. ءان مادەنيەتىندەگى ورنى وزگەشە توپجارعان تالانتتى ەرتە تانىعان ا.جۇبانوۆ: «ماناربەك ەرجانوۆتىڭ كۇيلەرى – بىرىنەن ءبىرى اسىپ جاتقان قازىنا. وركەسترگە, وپەرالارعا, بالەتتەرگە, «مەنى ءتۇسىر» دەپ سۇرانىپ تۇرعان, ۇلكەن ساحناعا شىعۋدى اڭساپ تۇرعان شىعارمالار» دەپ ءانشىنىڭ قانات قاعىپ سامعاۋىنا قولداۋىن بىلدىرگەن.
م.ەرجانوۆ 1953 جىلدان ءومىرىنىڭ سوڭىنا دەيىن قازاق مەملەكەتتىك فيلارمونياسىندا جەكە داۋىستاعى ءانشى بولىپ, حالىقتىڭ ءان ونەرىندە كەڭ ورىن الاتىن تەرمە, جىر, جەلدىرمەلەردى, كەڭ تىنىستى اندەردى, اتاپ ايتساق, «ارداق», «سمەت», توپايكوك», «اعاشاياق», «جانبوتا», «بالقاديشا», «اققايىڭ», «تولىباي», «قورلان», «اقسيسا» اندەرىن شابىتتانا شىرقاعان.
ءبىرجان سال, اقان سەرى, جارىلعاپبەردى, ەستاي مەن شاشۋباي سىندى ءبىرتۋما دارىندى تۇلعالاردىڭ انشىلىك-سازگەرلىك مەكتەبىنىڭ ءىزباسارى بولعان م.ەرجانوۆتىڭ شىعارماشىلىق شابىتىنان تۋعان مول ءان مۇراسى حالىقتىڭ قۇندى قازىناسىنا اينالدى. ءداستۇرلى ءان ونەرىنىڭ كوشىن جالعاپ جۇرگەن كۇمىس كومەي, جەزتاڭداي انشىلەردىڭ قاي-قايسىسى دا اسقاق انشىگە ءىلتيپات تانىتپاي وتكەن ەمەس. ونىڭ رۋحاني يگىلىككە اينالعان 150-دەن اسا ءانى مەن كۇيى حالىق اراسىندا كەڭىنەن تارالىپ, ءوز ورىنداۋشىسىن تاپتى. لەكتسيا-كونتسەرت پىشىنىندە وتكەن ء«ان سۇڭقار» كەشىندە دە مىڭ قىرلى ماناربەكتىڭ كەڭ دياپازوندى اندەرى اۋەلەپ, اۆتورلىق شىعارمالارى شەبەرلىكپەن ورىندالدى.
كەشتى جۇرگىزگەن ماناربەكتىڭ ءىزىن جالعاستىرۋشى, قازاقستاننىڭ ەڭبەك سىڭىرگەن مادەنيەت قايراتكەرى دۇيسەنبەك ومىراليەۆ م.ەرجانوۆ اندەرىنىڭ شىعۋ تاريحى, ەرەكشەلىگى تۋرالى بايانداپ, قىزىقتى اڭگىمەنىڭ تيەگىن اعىتتى. مادەنيەت قايراتكەرى ەرجان الىمبەتوۆ «بالالىق شاق», «جەڭگەن سولدات» كۇيىن ورىنداپ, «اققۋلار», گ ۇلىم الشىنوۆا قالقانىڭ ءانى «قالقانى», رەسپۋبليكالىق بايقاۋلاردىڭ لاۋرەاتى امانگەلدى كۇزەۋباي «پاراۆوز», مادينا ءشارىپوۆا «باقىت جىرى», قازاقستاننىڭ مادەنيەت سالاسىنىڭ ۇزدىگى تىلەۋلەس قۇرمانعاليەۆ «امانگەلدى تۋرالى ءاندى», حالىقارالىق بايقاۋلاردىڭ لاۋرەاتتارى ماقپال قازىبەكقىزى «سايرا, بۇلبۇل», ەسبول شاڭباي «سمەتتى», قازاقستاننىڭ ەڭبەك سىڭىرگەن قايراتكەرلەرى ەركىن شۇكىمان ەستايدىڭ «قورلانىن», رامازان ستامعازيەۆ جارىلعاپبەردىنىڭ «ارداعىن» اۋەلەتىپ, تاۋدىڭ ءمولدىر تۇنباسىنداي ساف ونەردىڭ جاۋھارىمەن تىڭداۋشى قاۋىمنىڭ جانىن تەربەدى. ماناربەك ەرجانوۆتىڭ 120 جىلدىق مەرەيتويىنا ارنالعان لەكتسيا-كونتسەرت مارەسىنە جەتكەندە, ءداستۇرلى ونەردىڭ تۋىن جەلبىرەتىپ جۇرگەن مايتالمان انشىلەرگە حالىقتىڭ قوشەمەتى اسا جوعارى بولدى.
ءارى ءانشى, ءارى كومپوزيتور, كۇيشى, اكتەر, ءارى وپەرا ساحناسىنىڭ ساڭلاعى ماناربەك ەرجانوۆ ءوز ومىرىندەگى جەتىستىكتەردىڭ بيىك شىڭىنان كورىنگەن بىرەگەي تۇلعا. ساحنا سەركەسىنىڭ شىققان شىڭى ۋاقىتپەن بىرگە بيىكتەپ, جارقىراي تۇسەرى دە ءسوزسىز.
الماتى