كۇنى كەشە وزبەكستاننىڭ باس شاھارى – تاشكەنتتە جالاۋى جەلبىرەگەن اۋىر اتلەتيكادان الەم چەمپيوناتى قازاقستاندىق سپورتشىلار ءۇشىن ءساتتى باستالدى. تورتكۇل دۇنيەنىڭ ءتورت بۇرىشىنان جينالعان مىقتىلار جارىسىنىڭ ءبىرىنشى كۇنىندە قازاقستان قۇراماسىنىڭ قورجىنىنا العاشقى التىن جۇلدە ءتۇستى.
تاشكەنتتەگى دودادا 55 كيلو سالماق دəرەجەسىندە ونەر كورسەتكەن ارلي چونتەي قوسسايىس قورىتىندىسى بويىنشا 260 (118+142) كيلو زىلتەمىردى ەڭسەرىپ, الەم چەمپيونى اتاندى. ەكىنشى ورىندى 256 (115+141) كيلونى باعىندىرعان تايلاند وكىلى تادا سومبۋنۋان يەلەنسە, ۇزدىك ۇشتىكتى بولگاريالىق انحەل رۋسەۆ تۇيىندەدى. ول قوسسايىستا 254 (110+144) كيلونى كوتەردى.
ايتا كەتەرلىگى, 2018 جىلى اشعابادتا (تۇرىكمەنستان) وتكەن جاھاندىق بىرىنشىلىكتە جەرلەسىمىز 258 (120+138) كيلومەن ەكىنشى ورىنعا تابان تىرەگەن ەدى. مىنە, اراعا ءۇش جىل سالىپ ول ءوز ناتيجەسىن ەكى كيلوعا جاقسارتىپ, كۇمىسىن التىن جۇلدەگە اۋىستىردى. بۇل – 2012 جىلدان بەرى قازاقستان تۋى استىندا ونەر كورسەتىپ كەلە جاتقان چونتەيدىڭ الەم بىرىنشىلىگىندەگى العاشقى التىن مەدالى.
ءبىر قىزىعى, بۇعان دەيىن بىرنەشە ازيا جəنە əلەم چەمپيوناتتارىندا باق سىناسا دا, التىن تۇعىردان كورىنە الماي كەلە جاتقان سپورتشى ءبىر جىلدا ەكى بىردەي ءىرى جارىستىڭ باس جۇلدەسىن جەڭىپ الدى. ياعني وسى جىلدىڭ ءساۋىر ايىندا ول ءدال وسى تاشكەنتتە وتكەن ازيا چەمپيوناتىندا 255 (115+140) كيلو زىلتەمىردى باسىنان اسىرا كوتەرىپ, ءوز سالماعىندا سارى قۇرلىقتىڭ تەڭدەسسىز اۋىر اتلەتى اتاعىن يەلەنىپ ەدى.
قازاقستان قۇراماسىنان الداعى كۇندەرى جارىس جولىنا نۇرعيسا ادىلەت ۇلى (96 كيلو), ارتەم انتروپوۆ (96 كيلو), كارينا قۇزعانباەۆا (81 كيلو) جانە ايزادا ءمۇپتىلدا (+87 كيلو) شىعادى. الەم چەمپيوناتى 17 جەلتوقسانعا دەيىن جالعاسادى.