قۇرلىقتىق حوككەي ليگاسىندا (قحل) ونەر كورسەتىپ جاتقان ەلوردانىڭ «بارىسى» ءوز ايدىنىنداعى ويىندار سەرياسىن ەكى جەڭىس, ەكى جەڭىلىسپەن اياقتادى. جەرلەستەرىمىز بەيسەنبى كۇنى وتكەن «بارىس ارەناداعى» سوڭعى ماتچتا ماسكەۋدىڭ «ديناموسىن» قابىلداپ, ءىرى ەسەپپەن ۇتىلىپ قالدى.
قحل-ءدىڭ «باتىس» كونفەرەنتسياسىندا ءۇشىنشى ورىندا كەلە جاتقان «دينامو» ءبىرىنشى كەزەڭنىڭ العاشقى سەگىز مينۋتىندا «بارىس» قاقپاسىنا جاۋاپسىز ءۇش شايبا سوعىپ, ەسەپتە العا شىعىپ الدى. شايبانىڭ اۆتورلارى – انتون ۆەدين, ۆياچەسلاۆ ۆوينوۆ جانە وسكار ليندبەرگ. قوناقتاردىڭ ءۇشىنشى گولىنان كەيىن «بارىس» قاقپاشى اۋىستىردى. مۇزايدىنعا نيكيتا بوياركين شىققان سوڭ, ماسكەۋلىكتەردىڭ قارقىنى ءبىراز باسەڭدەگەندەي بولدى.
ەكىنشى كەزەڭدە يۋرچو مەن ءديتستىڭ پاسىنان كەيىن كودي كۋنيك ەسەپ ايىرماسىن قىسقارتقانىمەن, ءۇشىنشى 20 مينۋتتىقتا قوناقتاردىڭ سۇرمەرگەنى ۆاديم شيپاچيوۆ كومانداسىنىڭ وسى ويىنداعى ءتورتىنشى, ءوزىنىڭ 20-شايباسىن سالدى. سوڭعى كەزەڭنىڭ ورتا تۇسىندا كەرتيس ۆولك ەسەپتى 2:4-كە جەتكىزگەنىمەن, جەڭىستى ج ۇلىپ الۋعا «بارىستىڭ» شاماسى جەتپەدى.