قازاقستاندىق سپورتشى جانبوتا الدابەرگەنوۆا فريستايل-اكروباتيكادان جىلدىڭ ءبىرىنشى الەم كۋبوگى كەزەڭىندە جۇلدەلى ورىننان كورىنىپ, جارىستىڭ كۇمىس جۇلدەگەرى اتاندى.
فينليانديانىڭ رۋكا تاۋ شاڭعىسى كۋرورتىندا ۇيىمداستىرىلعان فريستايل-اكروباتيكادان بيىلعى الەم كۋبوگى قازاقستاندىق سپورتشىلار ءۇشىن تابىستى باستالدى. سپورتتىڭ ءدال وسى تۇرىنەن ەكى دۇركىن قىسقى ۋنيۆەرسيادانىڭ قولا جۇلدەگەرى, بىلتىر الماتىدا وتكەن الەم كۋبوگىنىڭ سوڭعى كەزەڭدەرىندە دە ەل قورجىنىنا قولا مەدال سالعان جانبوتا الدابەرگەنوۆا بۇل جولى دا ۇزدىكتەر قاتارىنان كورىندى. العاشقى كەزەڭىندە الەمنىڭ مىقتى سپورتشىلارىمەن تەڭ دارەجەدە ونەر كورسەتكەن وتانداسىمىز فينالدا 80,04 ۇپاي جيناپ, جارىستى مەرەيلى ەكىنشى ورىنمەن اياقتادى. ءبىرىنشى كەزەڭنىڭ باس جۇلدەسىن قىتايلىق كۋن فانيۋي جەڭىپ السا, قولا جۇلدە تاعى ءبىر قىتايلىق سپورتشى شاو كيۋگە بۇيىردى.
ءبىر ايتا كەتەرلىگى, فينليانديانىڭ كۋرورتتى ايماعىنداعى جارىستار جانبوتا الدابەرگەنوۆا ءۇشىن ۇنەمى تابىستى اياقتالادى. ماسەلەن, ول 2019 جىلى ءدال وسى رۋكادا وتكەن ەۋروپا اشىق كۋبوگىندا ءبىر التىن, ءبىر كۇمىس مەدال جەڭىپ العان ەدى.