سىر بويىندا بيزنەستى دامىتۋعا مەملەكەتتىك جانە وڭىرلىك باعدارلامالاردىڭ بارلىق مۇمكىندىگى پايدالانىلدى. بيىل 1 975 جوبا «بيزنەستىڭ جول كارتاسى-2025», «ەڭبەك» مەملەكەتتىك باعدارلامالارى مەن «قىزىلوردا» وڭىرلىك ينۆەستيتسيالىق قورى ارقىلى 23,8 ملرد تەڭگەگە قارجىلاندىرىلدى. بىلتىرمەن سالىستىرعاندا وسى جىلى نەسيە پورتفەلى 6 ەسە ۇلعايىپتى.
وبلىستىق كاسىپكەرلىك جانە تۋريزم باسقارماسىنىڭ مالىمەتىنە سايكەس مەملەكەتتىك باعدارلامالار اياسىنداعى نەسيەلەردىڭ سىياقى مولشەرلەمەسىنىڭ تومەندەۋى, مەملەكەتتىك كەپىلدىكتەر ليميتتەرىنىڭ ۇلعايۋى بيزنەس ءۇشىن كرەديت الاتىندارعا قولايلى بولىپ وتىر.
بۇدان بولەك, جەرگىلىكتى تاۋار وندىرۋشىلەردى قارجىلاندىرۋ ءۇشىن بيىل 2 پايىزدىق نەسيەلەۋ باعدارلاماسى ىسكە قوسىلدى. بۇعان وبلىستىق بيۋدجەتتەن «قىزىلوردا» وڭىرلىك ينۆەستيتسيالىق ورتالىعىنا 400 ملن تەڭگە قارالىپ, تاۋار وندىرۋشىلەردىڭ 348 ملن تەڭگەلىك 14 جوباسى ماقۇلداندى.
– كەلەر جىلعا 2 پايىزبەن نەسيەلەۋ باعدارلاماسىنا قارالاتىن قارجى وسەدى. بيزنەسىن جاڭا باستاعاندار مەن كاسىپكە ىنتالى جۇمىسسىزداردىڭ باستامالارىن قارجىلاندىرۋ دا جۇيەلى جۇرگىزىلدى. جىل باسىنان بەرى مەملەكەتتىك باعدارلامالار اياسىندا 2 592 جوباعا 1,7 ملرد تەڭگە وتەۋسىز گرانت بەرىلدى, – دەيدى وبلىستىق كاسىپكەرلىك جانە تۋريزم باسقارماسىنىڭ باسشىسى فەردوۋسي قوجابەرگەنوۆ.
مەملەكەتتىك قولداۋ شارالارى ارقىلى شاعىن جانە ورتا بيزنەستە جاستار ۇلەسىن ارتتىرۋ نازاردان تىس قالعان جوق. ون اي اياسىندا 317 جاس كاسىپكەر ءوز بيزنەس جوبالارىن ىسكە اسىرۋ ءۇشىن 6 پايىزبەن 2,8 ملرد تەڭگە نەسيە العان. جاستاردىڭ 868 ستارتاپ جوباسىنا 715,4 ملن تەڭگە مەملەكەتتىك گرانت ءبولىندى.
جالپى, بۇگىندە جاستار بيزنەستىڭ ءتۇرلى سالالارىندا كاسىپكەرلىك باستامالاردى بەلسەندى تۇردە جۇزەگە اسىرۋدا. وسى ارقىلى ايماقتان شىعاتىن ءتۇرلى تاۋارلار قاتارىن بيىل جاس كاسىپكەرلەر باستاماسىمەن جۇزەگە اسىرىلعان قۇرعاق قۇرىلىس ماتەريالدارى, كونديتەرلىك ونىمدەر, كۇرىشتەن دايىندالاتىن ءتاتتى تاياقشالار تولىقتىردى.
وسى ون ايدا شوب سۋبەكتىلەرىنىڭ سانى 56 867-گە جەتىپ, بىلتىرعى وسى كەزەڭمەن سالىستىرعاندا 5,3 پايىزعا ءوستى. ماماندار دەرەگىنشە, وڭىردە ءار توقسان سايىن ءىسىن جاڭا باستاعان 800 كاسىپكەر قاتارعا قوسىلىپ وتىر. وتكەن جىلدىڭ ون ايىندا ايماقتا شاعىن جانە ورتا بيزنەس 144,5 ملرد تەڭگەنىڭ ءونىمىن شىعارسا, بيىل بۇل كورسەتكىش 173,3 ملرد تەڭگەگە جەتتى.
ماماندار ساۋدا سالاسىندا قۇنى 718 ملن تەڭگە بولاتىن 13 ينۆەستيتسيالىق جوبا ىسكە اسىرىلىپ, 214 جۇمىس ورنى قۇرىلعانىن اتاپ ءوتتى.
– بۇدان بولەك, ەلەكتروندى ساۋدا سالاسىندا ءوسىم بايقالادى. جالپى, شاعىن جانە ورتا بيزنەس كورسەتكىشىن ۇلعايتا ءتۇسۋ ءۇشىن كەلەر جىلى 2 مىڭنان استام جوباعا جەڭىلدەتىلگەن نەسيە, 1500 جوباعا مەملەكەتتىك گرانتتار بەرۋ جوسپارلانۋدا, – دەدى باسقارما باسشىسى.
قىزىلوردا وبلىسى