تاليبتەرمەن جەكە قالدىرماق
اقش پرەزيدەنتى باراك وباما ەگەر كابۋل قاۋىپسىزدىك تۋرالى ەكىجاقتى كەلىسىمگە قول قويماسا, امەريكالىق اسكەريلەر ەلدەن تولىقتاي شىعارىلۋى ىقتيمال ەكەنىن ايتىپ, اۋعانستان پرەزيدەنتى حاميد كارزايعا دوق كورسەتتى. بۇل ەكى مەملەكەت باسشىسى تەلەفون ارقىلى سويلەسكەن كەزىندە ايتىلعان.
ب.وباما پەنتاگونعا قازىردىڭ وزىندە اۋعانستاننان اسكەرلەردى تولىقتاي شىعارۋ بويىنشا جوسپار جاساۋ تاپسىرىلعانىن اتاپ كورسەتكەن. سوعان سايكەس, 2014 جىلدان كەيىن ەلدەگى قاۋىپسىزدىكتى قامتاماسىز ەتۋ تۇتاستاي جەرگىلىكتى قارۋلى كۇشتەر مەن قۇقىق قورعاۋ ورگاندارىنا كوشۋى ىقتيمال. اقش پرەزيدەنتىنىڭ ايتۋىنا قاراعاندا, كەلىسىمگە نەعۇرلىم كەش قول قويىلسا, اۋعانستاندا قالاتىن اقش اسكەريلەرى دە سوعۇرلىم ازايا تۇسەتىن بولادى.
جاڭا پرەمەردى بەكىتتى
يتاليا پارلامەنتىنىڭ دەپۋتاتتار پالاتاسى ماتتەو رەنتسيدىڭ كواليتسيالىق ۇكىمەتىنە سەنىم كورسەتتى. جاڭا ۇكىمەتتى قولداپ, 378 دەپۋتات داۋىس بەرسە, قارسىلار 220 ادامدى قۇرادى. بۇل ارادا پارلامەنتتە كوپشىلىك بولىپ تابىلاتىن دەموكراتيالىق پارتيا مەن «جاڭا وڭشىل ورتالىق» جەڭىستى قامتاماسىز ەتتى.
جاڭا ۇكىمەت تە نەگىزىنەن وسى ەكى پارتيا وكىلدەرىنەن قۇرالىپ وتىر. بۇعان دەيىن جاڭا كابينەت سەناتتان سەنىم ۆوتۋمىن العان بولاتىن. وسىلايشا رەنتسيدىڭ ۇكىمەتى يتاليا پارلامەنتىنىڭ قوس پالاتاسى تاراپىنان دا قولداۋ تاپتى. ال 39 جاستاعى ماتتەو رەنتسي يتاليا تاريحىنداعى ەڭ جاس ۇكىمەت باسشىسى سانالادى. جاڭا ۇكىمەتتىڭ جارتىسىن ايەلدەر قۇرايدى.
شابۋىل قۇرباندارى – 59 ادام
«بوكو حارام» توبىنىڭ قارۋلى جاساقتارى نيگەرياداعى فەدەرالدىق كوللەدجگە شابۋىل جاساعان ەدى. وسى سودىرلىق ارەكەت سالدارىنان 59 ادام قازا تاپتى. وقۋشىلاردىڭ كوپشىلىگى پارتالارىندا وتىرعان جەردە كوز جۇمسا, ءبىرازى العان جاراقاتتارىنا قاراماستان, ورتەنگەن عيماراتتان شىعىپ ۇلگەرگەندەرىمەن ءبارىبىر وپات بولعان.
شابۋىلداۋشىلار تەك ەر بالالارعا عانا وق اتقان. سوندىقتان اجال قۇشقاندار اراسىندا قىز بالالار جوق. ال وسىنداي وقيعا وتكەن جىلدىڭ شىلدە جانە قىركۇيەك ايلارىندا دا ورىن العان ەدى. سول كەزدەرى جاتاقحانالارعا جاسالعان شابۋىل سالدارىنان 90-نان استام وقۋشى قازا تاپقان بولاتىن. «بوكو حارام» نيگەريا باسشىلىعىمەن 2009 جىلدان بەرى ەلدىڭ سولتۇستىك اۋماعىنىڭ تاۋەلسىزدىگى ءۇشىن كۇرەس جۇرگىزىپ كەلەدى.
قوس مەرەكە قوسىلماق
قىتاي بيلىگى ەكى جاڭا مەملەكەتتىك مەرەكە ەنگىزۋ نيەتىندە: العاشقىسى جاپونيانى جەڭگەن كۇن بولسا, ەكىنشىسى نانكين قىرعىنىنىڭ قۇرباندارىن ەسكە الۋ كۇنى بولماق ەكەن. ءسويتىپ, قىتايلىقتار 3 قىركۇيەكتە جاپونيامەن سوعىستاعى جەڭىسىن تويلاماق.
بۇل سوعىس 1937-1945 جىلدار ارالىعىندا جالعاسقان بولاتىن جانە ەكىنشى دۇنيەجۇزىلىك سوعىستىڭ ءبىر بولىگىنە اينالعان ەدى. ال نانكيندە قازا تاپقانداردى ەسكە الۋ شارالارىن وتكىزۋ 13 جەلتوقسانعا بەلگىلەنىپ وتىر. بۇل كۇنى جاپون اسكەريلەرى سول كەزدە قىتايدىڭ استاناسى بولعان نانكينگە باسا-كوكتەپ كىرىپ, 6 اپتا بويى قالادا بىلگەندەرىن ىستەگەن. قىتاي تاريحشىلارىنىڭ باعالاۋىنشا, 300 مىڭ قىتايلىق قۇرباندىققا اينالعان.
«ماين كامپف» اۋكتسيونعا قويىلدى
لوس-اندجەلەستەگى (اقش) ينتەرنەت-اۋكتسيونعا ادولف گيتلەردىڭ افتوگرافىمەن «ماين كامپف» كىتابىنىڭ ەكى باسىلىمى شىعارىلدى. بۇعان قوسا, ساتۋعا گيتلەردىڭ جەكە ارحيتەكتورى البەرت شپەەردىڭ بىلعارى پالتوسى قويىلعان.
ەكى كىتاپتان تۇراتىن «ماين كامپفتىڭ» قوس كىتابىنىڭ العاشقى سۇرانىم باعاسى 20 مىڭ دوللاردى قۇرايدى. شپەەر پالتوسى 5 مىڭ دوللارعا باعالانعان. اۋكتسيونعا شىعارىلعان كىتاپتار 1926-1927 جىلدارى باسىلىپتى. گيتلەر بۇل كىتاپتاردى ناتسيستەر پارتياسىنىڭ مۇشەسى يوزەف باۋەرگە روجدەستۆو مەرەكەسىنە وراي سىيعا تارتسا كەرەك. ال شپەەر اۋكتسيونعا قويىلعان پالتوسىن 1945 جىلدىڭ 23 ساۋىرىندە گيتلەرمەن سوڭعى كەزدەسۋىنە كيىپ كەلىپتى.
قىسقا قايىرىپ ايتقاندا:
ۆەنەسۋەلادا بيلىككە قارسى جاپپاي نارازىلىق اكتسيالارى جالعاسىپ جاتىر. ولاردىڭ اراسىندا جاستار كوپ. ستۋدەنتتەر وزدەرىنىڭ بۇل ارەكەتتەرىن بولاشاقتارىنىڭ ب ۇلىڭعىر ەكەندىكتەرىمەن ءتۇسىندىرەدى. ەلدە بيلىكتى جاقتاۋشىلار قاتارى دا قالىڭ. ولار دا شەرۋلەرىن جالعاستىرۋدا.
ۋكراينادا بيلىكتىڭ ايتقانىمەن نارازىلىق اكتسيالارىنا قاتىسۋشىلارعا قارسى قارۋ جۇمساعان «بۇركىت» ارنايى توبى تاراتىپ جىبەرىلدى. ەندى ونىڭ قۇرامىنداعى ميليتسيونەرلەر رەسەيگە كوزقاراسى ءتۇزۋ وڭتۇستىك ۋكراينا اۋماعىندا قىزمەتتەرىن جالعاستىرۋلارى مۇمكىن.
گرۋزيانىڭ بۇرىنعى پرەزيدەنتى ميحايل سااكاشۆيليگە جاقىندا بيلىك اۋىسقان ۋكراينادا بىرنەشە جوعارى لاۋازىمدى قىزمەتتەر ۇسىنىلعان. بىراق ول بۇل ۇسىنىستىڭ كىمنەن تۇسكەنىن ناقتىلامايدى جانە ءوزىنىڭ اقش-قا كەتۋگە شەشىم قابىلداعانىن دا جاسىرمايدى.
گەرمانيانىڭ سپورتتىق گيمناستيكادان 9 دۇركىن چەمپيونى يۋرگەن بريۋممەر ءوزىنىڭ 15 جاسار سال ۇلىن ءولتىرىپ, ارتىنان وزىنە ءوزى قول سالعان. سايمون بريۋممەر 2009 جىلى كولىك قاعىپ كەتكەن سوڭ مۇگەدەك بولىپ قالىپتى. سول ۋاقىتتان بەرى جاسوسپىرىم قوزعالا دا, سويلەسە دە المايدى ەكەن.
ينتەرنەت ماتەريالدارى نەگىزىندە ازىرلەندى.