قاراعاندىلىق 41 مايدانگەر جانە تىل ارداگەرى كەشە قالانىڭ ادەمى ءبىر تۇسىندا وزدەرىنە ارنالىپ سالىنعان كوپ قاباتتى ۇيگە قونىس اۋداردى. ولاردىڭ ارقايسىسىنا وبلىس باسشىسى سەرىك احمەتوۆ ەكى جانە ءۇش بولمەلى پاتەرلەردىڭ كىلتىن تاپسىردى.
الدى توقساننان اسقان, سوڭى جەتپىستى القىمداعان قارتتاردى جاڭا مەكەن-جايلار جارقىراعان جيھازدارىمەن, تۇرمىستىق زاتتارمەن, بايلانىس قۇرالدارىمەن قارسى الدى. بۇلاردى دەمەۋشىلەر تارتۋ ەتتى.
مۇندا سۇلتان امانباەۆ, ءساتبەك ەلامانوۆ, نيكولاي پروتسەنكو, گريگوري نەيمان, قاسەن تۇسپەكوۆتەر باستاعان ارداگەرلەر بۇدان بىلاي قاراي بىرگە تۇرادى. “جاس ۇلعايعان شاقتا جايلى پاتەردە تۇرۋ كوپتەن بەرگى ويىم ەدى. ءوزى قولايلى جەرگە ورنالاسقان ەكەن. دۇكەندەر دە, ەمحانا دا جاپ-جاقىن. وسىنىڭ ءبارىن ويلاستىرىپ, جاعدايىمىزدى قارايلاستىرعان ازاماتتارعا العىسىم شەكسىز”, دەگەن زەينەپار ءبىلالوۆ اقساقالدىڭ جۇرەكجاردى ءسوزىن ونىمەن قوسا قۋانىش بولىسۋشىلەر مۇنىڭ ءوزى ەلباسىنىڭ قامقورلىعى ارقاسىندا ەكەنىن اتاپ, ريزالىقتارىن ءبىلدىردى.
وبلىستىڭ باسقا قالالارى مەن اۋداندارىندا دا بىرنەشە سوعىس جانە تىل ارداگەرلەرىنىڭ وتباسىلارى وسىنداي جاڭا پاتەرلەرگە يە بولدى.
ايقىن نەسىپباي.
قاراعاندى وبلىسى.