قازىر ءبىر جاقسى ءىس ءبىتىپ, جۇرت قۋانسا, سونىڭ ارتىنان شي شىعاتىنى ءجيى كەزدەسىپ ءجۇر. الايدا, وعان جۇرتتىڭ, قاراپايىم جانداردىڭ قاتىسى بولمايدى. شي سول ءىستىڭ اينالاسىندا جۇرگەندەردەن شىعادى. وتكەن جىلى جازدا قوستاناي قالاسىن اينالىپ اعىپ جاتقان توبىل وزەنىنىڭ ءبىر ءيىنىنەن قوستانايلىقتار مەن قالا قوناقتارى دەمالاتىن ساياباق سالىنعان ەدى. ونىڭ اشىلۋ سالتاناتى وتشاشۋمەن اتالىپ وتكەن بولاتىن. بىراق توبىلدىڭ سول جاعالاۋىندا ادامداردىڭ كوزىن قارىقتىرىپ تەك وت شاشۋ ەمەس, اقشا شاشۋ دا بولعان ەكەن. وبلىستىق قارجى پوليتسياسى قىزمەتكەرلەرى «قوستاناي قالالىق مادەنيەت جانە دەمالىس ساياباعى» مەملەكەتتىك كوممۋنالدىق كاسىپورنىنىڭ ديرەكتورى اندرەي تولپينسكيدى تۇتقىندادى. وعان ءوزىنىڭ لاۋازىمدىق قىزمەتىن اسىرا پايدالاندى, قىزمەت بابىن پايدالانىپ, جالعان قۇجات جاسادى دەگەن ايىپ تاعىلىپ وتىر.
سول ساياباقتىڭ شالا-شارپى اياقتالعان جۇمىسىنا ا.تولپينسكي 21 ميلليون قارجى جۇمسالدى دەپ جالعان اكت كورسەتكەن. وسىنشا قارجى ول باسقاراتىن مەملەكەتتىك كوممۋنالدىق كاسىپورىننىڭ ەسەپشوتىنا اۋدارىلىپ تا كەتكەن. ال تەكسەرە كەلگەندە, ساياباقتاعى اتقارىلعان جۇمىستىڭ كولەمى 721 مىڭ تەڭگەدەن اسپاعان. مەملەكەت 20 ميلليون تەڭگە زيان شەككەن. قازىر ءىس ودان ءارى تەكسەرىلۋ ۇستىندە.
ايتپاقشى, بيىل ءدال سونداي ساياباق توبىلدىڭ وڭ قاپتالىنان تۇسپەك. وندا قانشا ميلليون سۋعا باتارىن كىم ءبىلسىن؟
ءنازيرا جارىمبەتوۆا,
«ەگەمەن قازاقستان».
قوستاناي.