شىنىندا دا وڭتۇستىكتىڭ تىرلىگى وراسان. قولعا الىنىپ جاتقان وڭدى ىستەردىڭ قاتارى كوپ بولعاندىقتان وسىناۋ اۋىز تولتىرىپ ايتۋعا تۇرارلىق دۇنيەلەردىڭ ءبارىن ءتىزىپ جازىپ, ءبىر ماقالادا ارقايسىسىنا جەكە-جەكە توقتالۋ تىپتەن مۇمكىن ەمەس. ونداي جاعدايدا ۇزاققا شاۋىپ, قاپتاعان تسيفر-ساندارمەن ءبىراز باسىڭىزدى قاتىرار ەدىك. ءبىز بۇل جولى ناقتى جۇمىس, ناقتى ناتيجەلەرگە عانا توقتالۋدى ءجون كوردىك. كەشە وڭتۇستىك قازاقستان وبلىسىنىڭ اكىمى اسقار مىرزاحمەتوۆ حالىقپەن ەسەپتى كەزدەسۋىندە ايماقتىڭ قول جەتكىزگەن تابىستارىن مەيلىنشە سارالاپ ءوتتى. بەس جىلدان بەرى وسى وڭىرگە باسشىلىق جاساپ كەلە جاتقان اسقار يسابەك ۇلى وبلىستىڭ ءاربىر سالاسىن, ءاربىر مالىمەتىن بەس ساۋساعىنداي بىلەتىنى انىق.
سوڭعى جىلدارى وڭتۇستىكقازاقستاندىقتاردىڭ كاسىپ يگەرۋگە, ءوز بيزنەسىن اشۋعا دەگەن قۇلشىنىستارى تىپتەن ەرەكشە بولىپ وتىر. وتكەن جىلى ەلباسى وبلىسقا كەلگەن ساپارىندا شىمكەنتتىڭ شىرايىن شاعىن كاسىپكەرلىك اشاتىنىن, وڭتۇستىكتىڭ حالقى جەكە كاسىپ اشۋعا, ونى يگەرۋگە يكەمدى ەكەنىن باسا ايتقان ەدى. قازىر وڭتۇستىك قازاقستان وبلىسىندا بەلسەندى كاسىپكەرلىك سۋبەكتىلەرى 125,8 مىڭعا جەتىپ, 12,5 پايىزعا ءوستى. رەسپۋبليكا بويىنشا وبلىس بۇل ماسەلەدە 3-ورىندا نىق تابان تىرەپ تۇر. سالىق تولەمدەرى 30 ملرد. تەڭگەنى قۇراپ, 38 پايىزعا ارتتى. ەلىمىزدە العاش بولىپ اشىلعان «كاسىپكەرلەرگە قىزمەت كورسەتۋ ورتالىعىنىڭ» وتە قاجەت ۇيىم ەكەنىن بۇگىندە بارلىق كاسىپكەرلەر مويىندايدى. وسى ورتالىقتا 33 مىڭنان استام ادامعا, 4 مىڭ جوبالارعا كومەك كورسەتىلدى. كاسىپكەرلەردىڭ سوناۋ الىس اۋداندارعا بارىپ, كاسىپ اشۋعا تاۋەكەل ەتە بەرمەيتىنى ايان. اتالمىش ورتالىق وسى اۋدان باسشىلارى مەن كاسىپكەرلەردىڭ اراسىندا دانەكەر بولىپ, وڭىرلەردە قولعا الۋعا بولاتىن جوبالاردى جارىققا شىعاردى.
قازىر رەسپۋبليكا بويىنشا ىسكە قوسىلعان 135 كاسىپورىننىڭ 34 پايىزى وسى وبلىستىڭ ۇلەسىندە. وڭىردەگى كاسىپورىنداردا 552 ملرد. تەڭگەنىڭ ءونىمى ءوندىرىلىپ, 55 ملرد. تەڭگەگە ارتتى. جاڭا كاسىپورىنداردىڭ اشىلۋى جانە ءوندىرىستىڭ كەڭەيۋى ەسەبىنەن 28 315 جۇمىس ورنى اشىلدى. ال, يندۋستريالاندىرۋ كارتاسىنا 170 جوبا ەنگىزىلىپ, وبلىس جوبا سانى بويىنشا رەسپۋبليكادا ەڭ جوعارعى كورسەتكىشكە قول جەتكىزىپ وتىر. مۇنىڭ ءبىر باسا ايتا كەتەرى, باعدارلاما بارلىق اۋدان, قالالاردى قامتىپ, جوبالاردىڭ 65 پايىزى اۋىلدىق جەرلەردە جۇزەگە اسىرىلۋدا. ءدال سول سياقتى «ماكسيمۋم» اق تاراپىنان 5,6 ملرد. تەڭگەگە 1 872 جوبا قارجىلاندىرىلىپ, 8 312 جۇمىس ورنى اشىلدى. مۇندا دا جوبانىڭ 90 پايىزى اۋىلدىق جەرلەردە ىسكە اسۋدا. ياعني اۋىلداعىلاردىڭ دا ءوز كاسىپتەرىن باستاپ, تابىس تابۋعا, جۇمىس ورنىن اشۋعا مۇمكىندىكتەرى مول.
شىمكەنت قالاسىنىڭ شەتىنەن ورىن تەپكەن «وڭتۇستىك» يندۋستريالىق ايماعى كاسىپكەرلەردىڭ ناعىز ورداسى, ورتاق ءۇيى بولىپ وتىر. مۇندا كاسىپ اشامىن, بيزنەس باستايمىن دەگەن جاندارعا بارلىق جاعداي جاسالعان. سودان بولار, وتكەن جىلى بۇل ايماقتا 13 جاڭا جوبا قولعا الىنىپ, 996 جۇمىس ورنى اشىلدى. ايماق ىشىنەن تۇساۋىن كەسكەن كاسىپورىنداردىڭ سانى 31-گە جەتتى. مۇنداي يندۋستريالىق ايماق وتە ءتيىمدى بولعاندىقتان قازىر ولار اۋدان ورتالىقتارىنان دا قۇرىلۋدا. وڭتۇستىكتىڭ بارلىق اۋدان, قالالارىنان جالپى الاڭى 835 گەكتاردى قۇرايتىن 15 يندۋستريالىق ايماق قۇرۋ تۋرالى شەشىم قابىلدانعان. بيىل كەنتاۋ قالاسى, سوزاق, شاردارا, قازىعۇرت, سارىاعاش, ماقتاارال, تۇلكىباس اۋداندارىنداعى يندۋستريالىق ايماقتاردا 19 جوبا ىسكە قوسىلاتىن بولادى.
وڭتۇستىكتىڭ تىرلىگى وراسان ەكەنىن وڭىردە سالىنىپ جاتقان قۇرىلىستاردىڭ قارقىنىنان دا بىلۋگە بولادى. وتكەن جىلى «بالاپان» باعدارلاماسى بويىنشا 128 ۇيىم ىسكە قوسىلىپ, ناتيجەسىندە 133 مىڭ بالا قامتىلىپ, كورسەتكىش 67,2 پايىزدى قۇرادى. ونىڭ 34-ءى وبلىستىق بيۋدجەت ەسەبىنەن قوسىلدى. رەسپۋبليكا بويىنشا وتكەن جىلى 96 فاپ, وتباسىلىق-دارىگەرلىك امبۋلاتوريالار ىسكە قوسىلسا, ونىڭ 60-سى وڭتۇستىك قازاقستان وبلىسىنىڭ ەنشىسىندە.
ءبىر جاقسىسى, اسقار مىرزاحمەتوۆ ەسەپ بەرگەن جيىندا باياعىداعىداي جارىسسوزبەن ۋاقىتتى «ءولتىرىپ», جاسى بار, قارياسى بار, مىنبەگە شىعىپ, اكىمدى كوپىرتىپ ماقتاۋعا جول بەرىلگەن جوق. ەل ونسىز دا وبلىستىڭ جەتىستىگىن, جوعارى كورسەتكىشىن, تابىسىن كورىپ-ءبىلىپ وتىر. اكىمنىڭ بايانداماسىنان كەيىن بىردەن زالداعى حالىققا ءسوز بەرىلىپ, ەل دە ناعىز كۇيىپ تۇرعان ماسەلەلەردى كوتەرە ءبىلدى. شىمكەنت قالاسى «قايتپاس-1-2» شاعىن اۋداندارىندا كەشقۇرىم گاز بەن جارىقتىڭ ءجيى ءسونىپ قالاتىنى, قازىعۇرت اۋدانىنىڭ, قارجانتوبە اۋىلىنداعى مەكتەپتىڭ اپاتتى جاعدايى, سارىاعاش قالاسىنداعى رامادان كانالىنا جوندەۋ جۇرگىزۋ, داربازا اۋىلىنا جول سالۋ, بادام وزەنىن اباتتاندىرۋ, «نۇرتاس» شاعىن اۋدانىنا اۋىزسۋ جەتپەي جاتىر, ارىس قالاسى, «ساياجاي» شاعىن اۋدانىنداعى كوپىردى سۋ شايىپ كەتكەن, سوزاقتاعى قىزىلكولگە جىل سايىن قارجى بولىنەدى, بىراق كولگە سۋ تولماي-اق قويدى, اۋىلدىڭ ەكولوگيالىق جاعدايى ناشار... مىنە, جينالعان حالىق ءبىر ادامدى ەمەس, بۇكىل قاۋىمدى الاڭداتىپ وتىرعان وسىنداي ەلدىك ماسەلەلەردى كوتەردى. «ىنتىماق ءتۇبى – يگىلىك» دەگەن, وڭتۇستىك حالقىنىڭ ىنتىماعى, ءبىرلىگى ۇلكەن يگىلىككە جەتەلەيتىنى انىق. وبلىستىڭ ىسكەر اكىمى ا. مىرزاحمەتوۆ وسىناۋ كوتەرىلگەن ماسەلەلەردىڭ ءبارى ارنايى قارالىپ, ساراپتالىپ, ءوز شەشىمىن تاباتىنىن ناقتى ايتتى.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.