ۋكراينادا 25 مامىرعا بەلگىلەنگەن مەرزىمىنەن بۇرىن وتەتىن پرەزيدەنتتىك سايلاۋدىڭ ناۋقانى باستالىپ كەتتى. ءسويتىپ, كەشە ۇمىتكەرلەردى ىلگەرىلەتۋ ۇدەرىسى باستالدى. ول 30 ناۋرىزعا دەيىن جالعاسادى. ال كانديداتتاردى تىركەۋدىڭ سوڭعى مەرزىمى 4 ءساۋىر دەپ بەلگىلەنگەن.
وڭتۇستىك كورەيا پرەزيدەنتى پاك كىن حە سولتۇستىك كورەيامەن بىرىگۋگە دايىندىق جونىندەگى كوميتەت قۇرۋ تۋرالى حابارلادى. ول وسىنداي مالىمدەمەنى كەشە وتكەن ءداستۇرلى جىل سايىنعى تەلەۇندەۋى كەزىندە جاساعان. جاڭا كوميتەت كحدر-مەن جاقىنداسۋ جوسپارىمەن اينالىسا وتىرىپ, كەلە-كەلە ەكى ەلدىڭ قوسىلۋى ءۇشىن جۇمىس ىستەيتىن بولادى.
ۋكراينانىڭ كوممۋنيستىك پارتياسى مەن ونىڭ جوعارعى راداداعى فراكتسياسى وپپوزيتسياعا ءوتۋ جونىندە شەشىم قابىلدادى. سوڭعى كەزدەرى كيەۆ پەن ەلدىڭ باسقا دا قالالارىندا كومپارتيانىڭ شتابىنا شابۋىل جاساۋ جيىلەپ كەتكەن ەدى. پەتر سيمونەنكو باستاعان ۋكپ-نىڭ مۇنداي شەشىم قابىلداۋىنا وسى ارەكەتتەردىڭ اسەرى دە بولۋى ىقتيمال.
اقش تاريحىنداعى ەڭ تاجىريبەلى كونگرەسسمەن دجون ديندجەل وكىلدەر پالاتاسىندا 58 جىل جۇمىس ىستەگەن بولاتىن. ەندى ول جاڭا مەرزىمگە سايلاۋعا تۇسپەيتىنىن حابارلادى. 87 جاستاعى قاريا ءوزىنىڭ مانسابى ولىممەن اياقتالعانىن, ياعني كونگرەستەن تابىتقا سالىنىپ شىققانىن قالامايتىن سەكىلدى.
يزرايل پوليتسياسى كەشە يەرۋساليمدە تارتىپسىزدىكتەرگە جول بەرگەن پالەستينالىقتاردى قۋىپ تاراتتى. ال پوليتسياعا قارسى تاس اتقان جاستار قاماۋعا الىندى. تارتىپسىزدىكتەرگە ەل پارلامەنتىنە شاتقال كۇمبەزى دەپ اتالاتىن مەشىت تۇرعان جەرگە يۋدەيلەردىڭ بارۋىنا رۇقسات بەرەتىن زاڭ جوباسى ەنگىزىلۋى سەبەپ بولدى.
مەكسيكا بيلىگى الەمدەگى ەڭ ىقپالدى قىلمىسكەرلەردىڭ ءبىرى, كوپتەن بەرى ىزدەۋ جاريالانعان ەسىرتكى بارونى – «سينالوا» ەسىرتكى كارتەلىنىڭ باسشىسى حواكين گۋسماندى ۇستادى. ول ءبىر وق جۇمسالماستان تۇتقىندالعان. وپەراتسياعا امەريكالىق ەسىرتكىمەن كۇرەسۋشىلەر دە قاتىسقان.
رەسەي سىرتقى ىستەر مينيسترلىگى قولباسشى ميحايل كۋتۋزوۆتىڭ ۋكراينانىڭ لۆوۆ وبلىسىنداعى ەسكەرتكىشى قۇلاتىلۋىنا بايلانىستى نارازىلىق ءبىلدىردى. «ءبىز ۋكراينانىڭ جاڭا باسشىلىعىنان مۇنداي شەكتەن شىعۋشىلىقتى توقتاتۋدى تالاپ ەتەمىز», دەلىنگەن ءسىم-ءنىڭ مالىمدەمەسىندە.
رەسەي بيۋدجەتى ءرۋبلدىڭ قۇنسىزدانۋىنان جىلدىڭ قورىتىندىسى بويىنشا 1 تريلليون رۋبلگە دەيىن (28,1 ملرد. دوللار) قاراجات الۋى مۇمكىن. مۇنداي بولجامدى ءوزىنىڭ ءداستۇرلى شولۋىندا ەكونوميكا جوعارى مەكتەبىنىڭ دامۋ ورتالىعى جاساعان.
چەليابى قالاسىنداعى تراكتور زاۋىتى اۋداندىق سوتى اسكەردە جۇرگەن كەزىندە العان جاراقاتى ءۇشىن مەملەكەتتەن وتەماقى تالاپ ەتكەن بۇرىنعى سولداتتىڭ تالابىن قاناعاتتاندىردى. سوت قارجى مينيسترلىگىنە زارداپ شەگۋشىگە وتەماقى رەتىندە 800 مىڭ رۋبل تولەۋدى مىندەتتەدى.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.