“تۋعان جەر – التىن بەسىگىم!”

اكتسياسى وڭدى جالعاسىن تاپتى وبلىس اكىمى ب.ساپارباەۆتىڭ باستاماسىمەن وتكەن جىلى “تۋعان جەر – التىن بەسىگىم” اك­تسيا­سى ومىرگە كەلىپ, ول كوپشىلىكتەن ءتيىستى باعاسىن العان بولاتىن. جاقىندا وسىناۋ ومىرشەڭ باستاما جالعاسىن تاۋىپ, ونى مەملەكەتتىك قىز­مەتكەرلەر باستاپ كەتكەن ەدى. وسىلايشا وبلىستىق پروكۋراتۋرا, ىشكى ىستەر جانە كەدەندىك باقىلاۋ دەپارتامەنتتەرىنىڭ قىزمەتكەرلەرى اتالمىش اكتسيا بويىنشا ءوز ونەرلەرىن ورتاعا سالدى. ەكى ساعات بويى قۇقىق قورعاۋ ورگاندارىنىڭ قىزمەتكەرلەرى جينالعانداردى ءان مەن كۇيگە بولەدى. كەدەندىك باقىلاۋ دەپارتامەنتىنىڭ قىزمەتكەرى قايرات بازاروۆ “تۋعان جەر” اتتى ولە­ڭىن تامىلجىتىپ شىرقاسا, ىشكى ىستەر دەپار­تا­مەنتى­نىڭ 45 ادامنان تۇراتىن حورى اسكەري-پات­ريوتتىق اندەردىڭ بىرىنەن كەيىن ءبىرىن ورىندادى. ال وبلىستىق پروكۋراتۋرانىڭ وفيتسەرى دارحان كوزۋب “العا, قازاق جىگىتتەرى” ءانىن ورىنداعان كەز­دە جينالعاندار ريزاشىلىقپەن قول سوقتى. قا­لالىق ماي باستىعىنىڭ ورىنباسارى ەركىن انۋاربەكوۆ شىرقاعان “ال­عاشقى ماحاببات” انىنە, وبلىستىق پروكۋراتۋرانىڭ “كوز تيمەسىن” كتك قۇراما كومانداسىنىڭ ونەرىنە كوپشىلىك ريزا بولدى. اكتسياعا وبلىس اكىمى ب.ساپار­باەۆ, وبلىستىق پروكۋراتۋرا, كەدەندىك باقىلاۋ, ىشكى ىستەر دەپارتامەنتتەرىنىڭ باسشىلارى ق.تولەگەنوۆ, ۇ.جاڭاباەۆ, ق.قا­سى­موۆ قاتىستى. وڭداسىن ەلۋباي. وسكەمەن.