تابىس كوزى – تياناقتىلىقتا
اقمولا وبلىسى تاۋەكەلدى ەگىنشىلىك ايماعىندا ورنالاسقاندىعى جانە بولاشاق ءونىمنىڭ تاعدىرى الدىمەن توپىراقتىڭ ىلعالمەن قانشالىقتى قامتاماسىز ەتىلگەندىگىنە بايلانىستى بولىپ كەلەتىندىگى بەلگىلى. وسىعان وراي, اگروتەحنيكالىق شارالاردا قاتەلىكتەرگە جول بەرمەۋ ءۇشىن ءار شارۋاشىلىقتا, ءار القاپتا قانشا ىلعال بارىن ءدال انىقتاپ, ءبىلىپ وتىرۋدىڭ ماڭىزى زور. وبلىس اۋداندارى بويىنشا تۇتاستاي العاندا, كۇزگى-قىسقى كەزەڭدەردە ورتا ەسەپپەن 111 ميلليمەتردەن 223 ميلليمەترگە دەيىن ىلعال جيناقتالدى. ءسويتىپ, وتكەن جىلدىڭ ءتيىستى مەرزىمىمەن سالىستىرعاندا ىلعال قورى جوعارى بولۋىمەن ەرەكشەلەندى. ونىڭ ۇستىنە, 1,2 ميلليون گەكتار القاپتا قار توقتاتىلدى. بۇل وتكەن جىلعى كورسەتكىشتەن 26 پايىزعا ارتىق.
بيىل دا بۇرىنعىسىنشا ەگىس القاپتارىنىڭ قۇرىلىمىندا ازىق-ت ۇلىكتىك بيداي جەتەكشى ورىن الادى. ونىڭ ۇلەس سالماعى 90 پايىزدان اسقالى وتىر. كوكتەمگى ەگىستى ويداعىداي وتكىزۋ ءۇشىن وبلىس تۇقىم قورىمەن تولىق قامتاماسىز ەتىلگەن. ءتىپتى, جەكەلەگەن سورتتارى بويىنشا ارتىق تۇقىم قورى دا بار. بارلىق تۇقىم ءتيىستى سەبۋ كونديتسياسىنا جەتكىزىلگەن. ولاردىڭ 83 پايىزى ءبىرىنشى, ەكىنشى كلاستى تۇقىم.
الەمدىك رىنوكتاعى استىق باعاسى تەك قانا ءداندى داقىلدارمەن شەكتەلۋگە بولمايتىندىعىن كورسەتۋدە. ياعني, ەگىنشىلىك سالاسىن ءارتاراپتاندىرۋ ۋاقىت تالابىنا اينالدى. بيىل مايلى داقىلدار 86 مىڭ گەكتار القاپقا سەبىلىپ, ەكى ەسە وسپەك. ناقتى تابيعي-كليماتتىق جاعدايلارعا قاراي ونى ءوسىرۋ تەحنولوگياسى دا يگەرىلگەن. وسى باعالى داقىلدى قابىلداپ, ءوڭدەيتىن كاسىپورىندار قاتارى ءوسكەندىگىن ايتقىم كەلەدى. ولاردىڭ وندىرىستىك قۋاتتارى وزدەرىندە وندىرىلگەن مايلى داقىلداردى عانا ەمەس, سونىمەن بىرگە, ءارىپتەستىك ىنتىماقتاستىقتاعى شارۋاشىلىقتارعا قولقابىس جاساۋعا دا مۇمكىندىك بەرەدى.
اعىمداعى جىلى كارتوپ ءوسىرۋ 19 پايىزعا جانە كوكونىس كولەمى 13 پايىزعا ارتاتىن بولادى. ءويتكەنى, وڭىرلىك دامۋ باعدارلاماسىندا اقمولالىقتار ششۋچە-بۋراباي كۋرورتتى ايماعى مەن استانا قالاسىن ازىق-ت ۇلىكپەن جابدىقتاۋشىلاردىڭ ءبىرى ەكەندىگى اتاپ وتىلگەن. بيىل كارتوپ ءوندىرىسىن ىنتالاندىرۋ ماقساتىندا قارجى كولەمىنىڭ ارتتىرىلعاندىعى جۇرتشىلىقتى سەرپىلتىپ وتىر.
كوكتەمگى ەگىس القاپتارىنىڭ قۇرىلىمىندا مالازىقتىق داقىلدار 61 مىڭ گەكتاردى قۇرايتىن بولادى. بۇل مال شارۋاشىلىعىن وركەندەتۋ ارقىلى جاڭا تۇرپاتتى اگرارلىق-يندۋستريالىق ءوندىرىستى قۇرۋىمىزعا جول اشاتىنى ءسوزسىز.
سوڭعى ءۇش جىلدا وبلىستىڭ اۋىل شارۋاشىلىعى كاسىپورىندارى جالپى قۇنى 45 ميلليارد تەڭگە قۇرايتىن 696 تراكتور, 1030 استىق جيناۋ كومباينىن, 600 تۇقىمسەپكىش, 390 بىرلىك جوعارى ونىمدىلىكتەگى ەگىستىك كەشەندەرىن ساتىپ الدى. بۇل اۋىل شارۋاشىلىعىن قۇرالدارمەن جابدىقتاۋدى نورماتيۆتىك دەڭگەيگە جەتكىزدى.
اعىمداعى جىلدىڭ كەشەندى جوسپارلارىنا سايكەس, تاعى دا 156 استىق كومباينى مەن 46 ەگىس كەشەندەرىن ساتىپ الۋ كوزدەلىپ وتىر. ولاردىڭ بارلىعى كوكتەمگى ەگىس جانە استىق جيناۋ جۇمىستارىنا قاتىستىرىلاتىن بولادى. مۇنىمەن قوسا, شارۋا قوجالىقتارىندا 4 مىڭ تەحنيكا بار. بۇل وبلىستىڭ ەگىستىك القاپتارىنىڭ 23 پايىزدىق ۇلەسىن يەلەنەدى. بىراق, مۇندا ماشينە-تراكتور پاركىن جاڭارتۋ قولعا الىنباي وتىرعانىن ايتۋعا ءتيىسپىز.
قازىر قولدا بار تەحنيكالاردى جوندەۋ جۇمىستارى ەڭسەرىلىپ قالدى. سونداي-اق, مەملەكەتتىڭ قاتىسۋىمەن قۇرىلعان 6 ماشينە-تەحنولوگيالىق ستانسالارىنىڭ تەحنيكالارىن ءتيىمدى پايدالانۋ مىندەتى قويىلدى. ولاردىڭ بارلىق قۋاتى ەڭ الدىمەن شارۋا قوجالىقتارىنا قىزمەت كورسەتۋگە باعىتتالاتىن بولادى.
كوكتەمگى ەگىس ناۋقانىن ويداعىداي وتكىزۋدە جانار-جاعارماي ماتەريالدارىمەن جابدىقتاۋ ايرىقشا ماڭىزدى. اعىمداعى جىلى ديزەل وتىنىنىڭ قاجەتتىلىگى 72 مىڭ توننانى قۇراسا, بۇگىنگى كۇنگە دەيىن ونىڭ 52 پايىزى ساتىپ الىندى.
ورىن العان فيتوسانيتارلىق جاعداي وسىمدىكتەردى زيانكەستەردەن, ارامشوپتەر مەن اۋرۋلاردان قورعاۋ بويىنشا شارالار وتكىزۋگە ەرەكشە نازار اۋدارۋدى قاجەت ەتەدى. بيىلعى جىلى ءداندى داقىلدار تۇقىمىنىڭ 90 پايىزىن نەمەسە 512 مىڭ تونناسىن ءدارى-دارمەكپەن زالالسىزداندىرۋ جوسپارلانۋدا.
وبلىس بويىنشا تىڭايتقىش قولدانۋدىڭ ەڭ تومەنگى دەڭگەيى 120 مىڭ توننانى قۇرايدى. مينەرالدى تىڭايتقىشتاردىڭ ارزانداۋىنا مەملەكەت تاراپىنان قولداۋ كورسەتىلىپ كەلەدى. بيىل 23 مىڭ توننادان استام مينەرالدى تىڭايتقىشتاردى قوسىمشا قارجىلاندىرۋعا 701 ميلليون تەڭگە ءبولىندى. اتاۋلى مەملەكەتتىك قولداۋ تىڭايتقىش باعاسىن 50 پايىزعا ارزانداتۋعا مۇمكىندىك بەرەدى. مۇنداي كومەكتىڭ كەڭ تارماقتىلىعى بايقالۋدا.
ۇكىمەتتىڭ ارنايى شەشىمىمەن جانار جانە جاعارماي, گەربيتسيدتەر باعاسىنىڭ ارزانداۋى ءۇشىن ءبىزدىڭ وبلىسقا بيۋدجەتتىك قاراجاتتان 2,2 ميلليارد تەڭگە ءبولىنىپ, ەگىستىك القاپتارىنىڭ قۇرىلىمى مەن كولەمىنە بايلانىستى اۋداندارعا تاراتىلدى.
جالپى, وبلىستىڭ ەگىستىك القابىن سۋبسيديالاۋدىڭ بارلىق باعدارلاماسى بويىنشا 3,6 ميلليارد تەڭگە قاراجات باعىتتالدى. سونداي-اق, ۇستىمىزدەگى جىلى كوكتەمگى ەگىس پەن وراق جۇمىستارىن وتكىزۋدىڭ قاراجات اينالىمىن تولتىرۋ ماقساتىندا “كازاگرو” ۇلتتىق حولدينگى “ازىق-ت ۇلىك كەلىسىم-شارت كورپوراتسياسى” جانە “اگرارلىق نەسيەلەۋ كورپوراتسياسى” اق-تار ارقىلى بولىنگەن نەسيەلىك قاراجاتتىڭ جالپى سوماسى 34 ميلليارد تەڭگەنى قۇرايدى. قازىر اتالعان كولەمنەن 20 ميلليارد تەڭگە نەسيە قولعا ءتيدى. ءوتىنىم قابىلداپ, ولاردى قاراۋ جالعاسۋدا.
كەز كەلگەن سالادا بىلىكتى ماماندار دايارلاماي, بەلگىلى ءبىر ءناتيجەگە جەتۋ مۇمكىن ەمەس. بۇل باعىتتا ايتارلىقتاي جۇمىستار اتقارىلدى. بىلىكتىلىكتى ارتتىرۋ كۋرستارىندا 300 مەحانيزاتور وقىتىلدى. سونداي-اق, 50 شارۋا قوجالىعىنىڭ جەتەكشىسى قايتا دايارلىقتان ءوتىپ, 100 اگرونوم ارنايى ەمتيحان سىناقتارىن تاپسىردى.
مەحانيزاتورلاردى دايارلاۋ بويىنشا “اگروماشحولدينگ” فيليالى جانە “دجون دير”, “كلااس” كومپانيالارىنىڭ فيليالدارىمەن مۇددەلى جۇمىستار جۇرگىزىلۋدە. سونىمەن بىرگە, شورتاندى اۋدانىنداعى باراەۆ اتىنداعى عىلىمي-وندىرىستىك ورتالىق بازاسىندا بىلتىر ۇيىمداستىرىلعان “كازاگرويننوۆاتسيا” اكتسيونەرلىك قوعامىنىڭ وقىتۋ ورتالىعى بەلسەندىلىك تانىتىپ وتىرعانىنا ريزامىز.
ديقاندارىمىز 2010 جىلدى “ساپا مەن ونىمدىلىكتى ارتتىرۋ جىلى” ۇرانىمەن باستاعالى وتىر. ۋاقىت مولشىلىقتى عانا ەمەس, تيىمدىلىكتى دە العا تارتىپ وتىرعانى وسىدان-اق اڭعارىلادى. بۇل ورايدا اقمولالىق ديقانداردىڭ ءجۇزى جارقىن بولاتىندىعىنا سەنىمدىمىز.
قادىرحان وتاروۆ, اقمولا وبلىسى اكىمىنىڭ ورىنباسارى.
اقمولا وبلىسى.