مەملەكەت باسشىسى نۇرسۇلتان نازارباەۆ رەسپۋبليكالىق ارداگەرلەر كەڭەسىنىڭ توراعاسى قايىربەك سۇلەيمەنوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ق.سۇلەيمەنوۆ پرەزيدەنتتى ۇلى وتان سوعىسىنداعى جەڭىستىڭ 65 جىلدىعىن مەرەكەلەۋ قارساڭىندا ارداگەرلەرگە قولداۋ كورسەتۋ ءۇشىن قازاقستاننىڭ بارلىق وڭىرلەرىندە كوپ ءىس اتقارىلعانى تۋرالى حاباردار ەتتى.
كەزدەسۋ كەزىندە قازاقستاندا 14376 سوعىسقا قاتىسۋشى تۇراتىنى اتاپ ءوتىلدى. مەرەيتوي قارساڭىندا 300-دەن استام ارداگەر مەملەكەتتىك ناگراداعا ۇسىنىلعان. جەڭىستى اتاپ وتۋگە ارنالعان سالتاناتتى مەرەكەگە قاتىسۋ ءۇشىن 32 قازاقستاندىق ماسكەۋگە, سوعىسقا قاتىسۋشىنىڭ بەسەۋى سانكت-پەتەربۋرگكە, ەكەۋى پراگاعا باراتىن بولدى. بۇدان باسقا, قايتىس بولعان قازاقستاندىقتاردىڭ تۋعان-تۋىستارى بولىپ كەلەتىن 155 وتباسى ءوز اكەلەرى مەن اتالارى جەرلەنگەن جەرگە بارۋعا تىلەك بىلدىرگەن. وسى ماقساتقا قاجەتتى قاراجات ءبولىندى.
اڭگىمە بارىسىندا پرەزيدەنت بىردە-ءبىر ارداگەر مەملەكەت تاراپىنان قامقورلىقسىز قالماۋى ءتيىس ەكەنىن ەرەكشە اتاپ ءوتتى.