الىستاعى اۋىلدا تۇراتىن اعايىننىڭ ساپالى مەديتسينالىق قىزمەتكە ءالى كۇنگە دەيىن ءزارۋ ەكەنى بەلگىلى. دەگەنمەن بۇل باعىتتاعى ماسەلەنى شەشۋ بويىنشا جۇرگىزىلىپ جاتقان جۇمىستاردى جوق دەپ تە ايتا المايمىز. مىسالى, قاراعاندى وبلىسىندا التى جىلجىمالى مەديتسينالىق كەشەن (جمك) جۇمىس ىستەي باستادى. مىنە, سونىڭ ناتيجەسىندە اۋىل تۇرعىندارى قالاعا سابىلماي-اق, مەديتسينالىق تەكسەرۋدەن ءوتىپ, سالالىق مامانداردان كەڭەس الۋ مۇمكىندىگىنە يە بولدى.
اۆتوبۋس ىشىندەگى مۇنداي كەشەندەردە بىرنەشە مامانداندىرىلعان كابينەت بار. سونداي-اق مۇندا تالداۋ الۋ ايماعى جانە فۋنكتسيونالدىق دياگنوستيكا كابينەتى, رەنتگەن جانە فليۋوروگرافياعا ارنالعان بولمە دە قاراستىرىلعان.
بيىل مەديتسينالىق ساقتاندىرۋ قورى جىلجىمالى مەديتسينالىق كەشەن قىزمەتتەرىنە 503,5 ملن تەڭگە ءبولىپتى. بۇل قاراجات تەگىن مەديتسينالىق كومەكتىڭ كەپىلدى كولەمى (تمككك) جانە مىندەتتى الەۋمەتتىك مەديتسينالىق ساقتاندىرۋ ء(مامس) اياسىندا كونسۋلتاتسيالار مەن زەرتتەۋلەر اقىسىن تولەۋگە باعىتتالعان. مەديتسينالىق ساقتاندىرۋ قورىنىڭ قاراعاندى بولىمشەسىنىڭ ديرەكتورى فازىل كوپوباەۆ جىلجىمالى مەديتسينالىق كەشەننىڭ قىزمەتتەرى تمككك جانە ءمامس پاكەتى اياسىندا دا كورسەتىلەتىنىن ايتادى.
– باسقاشا ايتقاندا, شالعاي ەلدى مەكەندەردىڭ تۇرعىندارى مەديتسينالىق ساقتاندىرۋ جۇيەسىندەگى مارتەبەسىنە قاراماستان, جمك-دە كونسۋلتاتسيالار مەن تەكسەرۋلەر الۋ مۇمكىندىگىنە يە بولدى, – دەيدى ول.
جىلجىمالى مەديتسينالىق كەشەندەر جەزقازعان كوپسالالى اۋرۋحاناسىنىڭ, اباي, وساكاروۆ جانە قارقارالى اۋداندارىنىڭ ورتالىق اۋداندىق اۋرۋحانالارىنىڭ, تەمىرتاۋ جانە قاراعاندى قالاسىنىڭ №4 جانە №5 ەمحانالارىنىڭ بالانسىندا تۇر.
ايتا كەتەتىن ءبىر جايت, ءاربىر مەديتسينالىق ۇيىمنىڭ ءوز قىزمەت كورسەتۋ اۋماعى بار. مىسالى, №5 ەمحانانىڭ دارىگەرلەرى جمك-مەن بۇقار جىراۋ اۋدانىنىڭ ەلدى مەكەندەرىنە بارىپ, قىزمەت كورسەتەدى. جاز ايلارىندا ولار اكۋشەر-گينەكولوگ, وفتالمولوگ, پەدياتر, ستوماتولوگ, تەراپەۆت, حيرۋرگتىڭ كەڭەستەرىن بەردى. سونىڭ ناتيجەسىندە 13,5 مىڭ ادام قانت ديابەتىن, ارتەريالىق گيپەرتەنزيانى, گلاۋكومانى جانە باسقا دا اۋرۋلاردى ەرتە انىقتاۋعا ارنالعان تەكسەرۋلەردەن وتكەن.
قاراعاندى وبلىسى